અમદાવાદ બોંબ વિસ્ફોટ

ત્રણ શકમંદોના સ્કેચ જારી કરાયા

Thu, 07 Aug 2008 19:15:32 +0530

P.R

અમદાવાદ સીરીયલ બ્લાસ્ટની તપાસ કરી રહેલી ક્રાઈમ બ્રાંચે આજે વધુ ચાર સ્કેચ જાહેર કર્યા છે. તેમજ બ્લાસ્ટ કરવા માટે કાલુપુર વિસ્તારમાંથી ગેસનાં બાટલા ખરીદવામાં આવ્યા હોવાનું તપાસ દરિમયાન બહાર આવ્યું છે.

મહત્ત્વપૂર્ણ છે કે સીરીયલ બ્લાસ્ટનાં કેસને ઉકેલવા પોલીસ આકાશ પાતાળ એક કરી રહી છે. મુંબઈ પોલીસની એટીએસ પણ મદદ કરી રહી છે. પોલીસને આશા છે કે આવનાર દિવસોમાં ચોક્કસ કોઈ પુરાવો મળશે.

P.R

અમદાવાદમાં આંતક, 53ના મોત

Wed, 30 Jul 2008 12:04:25 +0530

અમદાવાદ. તાજેતરમાં જ દેશના ઈન્ફોસિટી બેંગલુરૂમાં થયેલા ત્રણ શ્રેણીબધ્ધ બોંબ વિસ્ફોટની શાહી સુકાઈ નથી ત્યારે શનિવારે સાંજે અમદાવાદમાં થયેલા 16 શ્રેણીબધ્ધ વિસ્ફોટથી અમદાવાદમાં ભારે સનસનાટી મચી જવા પામી હતી. જેમાં 53ના મોત તથા 200થી વધુ લોકો ઘાયલ થયાનું જાણવા મળ્યું છે.

બેંગલુરૂમાં બ્લાસ્ટ બાદ અમદાવાદમાં હાઈ એલર્ટ જાહેર કરી દેવામાં આવ્યો હતો તેમ છતાં 24 કલાકની અંદર અમદાવાદમાં બ્લાસ્ટ થતાં રાજ્ય પોલીસ અને સરકાર પણ ચોંકી ઉઠી છે. આ આતંકી ઘટના પાછળ ઈન્ડીયન મુઝાહીદ્દીન નામના સંગઠને જવાબદારી ઉઠાવી છે. આ સંગઠને સાંજે 6.31 વાગે આઈ.બી.અને ખાનગી સમાચારને ચેનલને ઈ મેઈલ કરીને અમદાવાદમાં બોમ્બ બ્લાસ્ટ કરવાની ધમકી આપી હતી. આ ઈમેઈલ બાદ પાંચ મિનિટ બાદ શહેરમાં 14 સ્થળોએ એક પછી એક 16 જેટલા બ્લાસ્ટ થયા હતાં.

પ્રથમ બ્લાસ્ટ મણીનગરનાં જવાહર ચોક વિસ્તારમાં થયો હતો. ત્યારબાદ એક પછી એક બ્લાસ્ટે સમગ્ર શહેરને હલાવીને મુકી દીધુ હતું. લોકો પોતાના સ્વજનના હાલચાલ પુછવા માટે ફોન કરતાં નજરે પડતાં હતાં. પણ લેન્ડલાઈન અને મોબાઈલ ફોનનું નેટવર્ક જામ થઈ જતાં દહેશત વધી ગઈ હતી. તો શહેરમાં અફવાનું બજાર પણ ગરમ હતું.

શહેરમાં મણીનગરનાં જવાહર ચોક બાદ સરદાર પટેલ હીરાબજાર, સરદાર નગર ચાર રસ્તા, રાયપુર ચોકી, ઓઢવ રાજેન્દ્ર પાર્ક, હાટકેશ્વર સર્કલ, ખોડીયાર મંદિર ઓઢવ, ઈસનપુર, જયમાળા બસ સ્ટેન્ડ, ઈસનપુર ગોવિંદવાડી, સારંગપુર ચકલા, જુહાપુરા, અંબર ટાવર, સરખેજ સંગમ સિનેમા, ગોમતીપુર મરીયરબીબીની ચાલી, સિવીલ હોસ્પિટલ ટ્રોમા વોર્ડ અને એલજી હોસ્પીટલ બોર્ડ પાસે થયેલા સીરિયલ બ્લાસ્ટથી સમગ્ર શહેરમાં અફડાતફડી મચી જવા પામી હતી.

બીજી બાજુ શહેરની તપાસ એજન્સીઓ પણ તપાસ માટે પોતાનો કાફલો ઉતારી દીધો હતો. તેમણે વિવિધ વિસ્તારો કોર્ડન કરી લીધા હતા. અને, લોકોને શાંતિ બનાવી રાખવા વારંવાર અપીલ કરતાં હતાં. પણ તેમનું કોઈ માનતું નહતું. તો પોલીસે એસટી સ્ટેશન અને રેલ્વે સ્ટેશનને સીલ કરી દેવામાં આવ્યું હતું.

લોકોનાં ટોળાને દૂર કરવા માટે પોલીસે હળવો લાઠીચાર્જ પણ કરવો પડ્યો હતો. મુખ્યમંત્રી નરેન્દ્ર મોદીએ પરિસ્થિતિ ગંભીરતાથી લઈને તાત્કાલિક કેબીનેટની મીટીંગ બોલાવી હતી. અને, વડાપ્રધાને ઘાયલોને રૂ. 50 હજાર તથા મૃત્યુ પામેલાને રૂ.1 લાખની સહાયની જાહેરાત કરવામાં આવી હતી.

આ સીરીયલ બ્લાસ્ટની તીવ્રતા ઓછી હતી, પણ તેમાંના કેટલાંકની તીવ્રતા વધારે હોવાથી મરનાર અને ઈજાગ્રસ્તોની સંખ્યા વધવા પામી હતી. આ બ્લાસ્ટથી સમગ્ર શહેર ચિચીયારીઓ અને રોક્કળથી ગુંજી ઉઠ્યા હતાં. તેની સાથે તંત્રે અફવાથી દૂર રહેવા નગરજનોને અપીલ કરી હતી. .

સુરતને બદસુરત કરવાનો ઘાતકી પ્લાન

Tue, 29 Jul 2008 16:20:54 +0530

અમદાવાદમાં મોતની હોળી ખેલ્યા બાદ નરાધમોની મેલી મુરાદ સુરતને પણ બદસુરત કરવાની હતી. વિસ્ફટકો ભરેલી બે કાર મળ્યા બાદ આજે વધુ 17 જીવતા બોમ્બ મળી આવતાં સૌના ધબકારા વધી ગયા છે.

હમે કીસી ભી હાલમેં કામ પુરા કરના હૈ, અમદાવાદકા કામ પુરા કરને કે બાદ મેં સુરત કે લીયે રવાના હો ગયા હું, આ કોઇ ફિલ્મના ડાયલોગ નથી પરંતુ આંતકીઓની ગંદી જબાન છે. ભુલથી આવેલા ફોન ઉપર આ સંવાદ બોલાયા હતા.

આ સંવાદ પરથી સ્પષ્ટ વરતાઇ આવે છે કે, અમદાવાદમાં મોતની હોળી ખેલ્યા બાદ સુરતનો વારો લેવાનો હતો. જોકે સદનસીબે સુરત બાલ બાલ બચી ગયું છે.

પરંતુ સુરતના માથેથી મોતનો આંતક ઓછો થયો નથી. બે દિવસમાં 6 જીવતા બોમ્બ તથા વિસ્ફટરોથી ભરેલી બે કાર મળી આવતાં સુરતીઓના ધબકારા વધી ગયા હતા. આટલું ઓછુ ન હોય તેમ મંગળવારે શહેરમાંથી વધુ 17 જીવતા બોમ્બ મળી આવતાં સૌ કોઇના ચહેરા ઉપર ભયની આભા ખેંચાઇ ગઇ છે. પોલીસે 17 પૈકી હાલ આઠ બોમ્બ નિષ્ક્રીય કરી દીધા છે અને આગળની કાર્યવાહી ચાલી રહી છે.

માતાવાડી, વરાછા, લાભેશ્વર, ફલાયઓવર, પકવાન રેસ્ટોરન્ટ, હિરાબજાર સહિતના વિસ્તારોમાંથી મળી આવેલા 17 બોમ્બે નરાધમો કેટલી હદે ધમાકા કરી આંતક ફેલાવવા માગે છે એ બતાવી જાય છે. એર બોમ્બ રેસ્ટોરન્ટમાંથી, એક બોમ્બ ફલાય એવર બ્રીજ ઉપરથી, એક બોમ્બ ઝાડ ઉપરથી મળી આવતાં આ નરાધમો કેવા કેવા વિસ્તારોમાં બોમ્બ છુપાવી શકે છે એ આપણી સુરક્ષા તંત્રની વાતોને જડમુળમાંથી ઉખાડી ફેંકે છે.

આપણા જ ઘરમાં, આપણા જ નગરમાં આપણે કેટલા સલામત છીએ એ કહેવુ આજે મુશ્કેલ બન્યું છે. આમ જનતાની સલામતી માટે રચાયેલ પોલીસ સહિતની આપણી સુરક્ષા ટીમો કેટલી કાબેલિયત તારીફ છે, આપના વિચારો રજુ કરો.....

.

મૃતકોના પરિવારજનોને કેન્દ્રની 3.5 લાખની સહાય

Mon, 28 Jul 2008 18:09:40 +0530

શનિવારના બોમ્બ ધડાકા બાદ સોમવારે અમદાવાદની મુલાકાતે આવેલા વડાપ્રધાન મનમોહનસિંહે મૃતકોના પરિવારજનો માટે રૂ.3.5 લાખની સહાયની જાહેરાત કરી છે.

આજે બપોરે દિલ્હીથી ખાસ વિમાન દ્વારા તેઓ અમદાવાદ આવી પહોચ્યા હતા. તેમની સાથે કોંગ્રેસ અધ્યક્ષા સોનિયા ગાંધી, ગૃહમંત્રી શિવરાજ પાટીલ , કાપડમંત્રી શંકરસિંહ વાઘેલા સહિત નેતાઓ હાજર રહ્યા હતા.

વડાપ્રધાને એલ.જી .હોસ્પીટલ અને સિવીલ હોસ્પીટલની મુલાકાત લઈને પરિસ્થિતિનું જાતનિરીક્ષણ કર્યુ હતું. તેમજ તેમણે ઘાયલોને આશ્વાસન આપ્યું હતું. તો દિલ્હી પાછા ફરતાં પહેલાં વડાપ્રધાને બ્લાસ્ટમાં મૃત્યુ પામેલાઓ માટે સહાયતા જાહેર કરી હતી.

જેમાં મૃત્યુ પામેલાઓનાં પરિજનોને કેન્દ્ર સરકાર તરફથી રૂ.3.5 લાખની જાહેરાત કરી હતી. જો કે ઉલ્લેખનીય છે કે ગઈકાલે કેન્દ્ર સરકારે રૂ. 1 લાખની જાહેરાત કરી હતી. જેને વડાપ્રધાનની મુલાકાત બાદ વધારીને રૂ.3.5 લાખ કરવામાં આવી છે. આ સાથે ગુજરાત કોંગ્રેસે પણ મૃતકોને રૂ.1 લાખની સહાય આપવાની જાહેરાત કરી છે. આ સાથે રાજ્ય સરકારે મૃતકોને રૂ. 5 લાખની રોકડ સહાય કરવાની જાહેરાત કરી ચુક્યા છે.

બેંગલુરૂના બ્લાસ્ટમાં દેશી બોમ્બ

Mon, 28 Jul 2008 17:05:36 +0530

બેંગલુરૂ પોલીસ અને ફોરેન્સીક સાયન્સ લેબોરેટરીનાં અધિકારીઓએ !શુક્રવારે થયેલા બ્લાસ્ટની કડી મેળવવાનું શરૂ કરી દીધુ છે. જેમાં ઉપયોગમાં લેવાયેલ બોમ્બ સ્થાનિક બનાવટનાં હોવાનું જાણવા મળ્યું છે.

શનિવારે બેંગલુરૂમાંથી એક બોમ્બ મળી આવ્યો હતો, જેને ડીફ્યુઝ કરાતાં એફએસએલને તેની બનાવટ જાણવા મળી હતી. જેને કોરામંગલા વિસ્તારમાં તૈયાર કરવામાં આવ્યા હોવાનું મનાય છે.

બોમ્બ ડેટા સેન્ટરનાં નિષ્ણાંતોએ બેંગલુરૂમાં મુકાયેલા બોમ્બ ઓછી તીવ્રતા ધરાવતો હતો. તેમજ તેને ઉતાવળમાં મુકી દેવાયો હતો. આ બોમ્બ સ્થાનિક બજારમાં મળતી વસ્તુ વડે બનાવવામાં આવ્યો છે.

આ બોમ્બ બનાવવામાં એમોનીયમ નાઈટ્રેટ અને પેટ્રોલનાં મિશ્રણથી બનાવવામાં આવ્યા હતાં. તેમજ તેની સાથે છરા અને નટ બોલ્ટ લગાવવામાં આવ્યા હતા. જેથી લો ઈન્ટેનસિટી બોમ્બ હોવા છતાં વધુ લોકોની જાનહાની કરી શકાય.

બોમ્બ ધડાકામાં હલીમને રિમાન્ડ

Mon, 28 Jul 2008 15:40:54 +0530

અમદાવાદ બ્લાસ્ટની તપાસ કરી રહેલા ક્રાઈમ બ્રાંચ અને એટીએસને બ્લાસ્ટ પાછળ સીમીનો હાથ હોવાની શંકા છે. ક્રાઈમ બ્રાંચે ગઈકાલે સીમીનાં કાર્યકર્તા અબ્દુલ હલીમની ધરપકડ કરી હતી. તેને કોર્ટમાં રજુ કરાતાં 14 દિવસના રિમાન્ડ અપાયાનું જાણવા મળ્યું છે.

હલીમ ગોધરા કાંડ બાદ રાહત કેમ્પમાં રહેતાં યુવાનોને આતંકવાદની ટ્રેનીંગ આપવા માટે ઉત્તરપ્રદેશ મોકલતો હતો. ત્યાંથી તેમને સરહદ પાર મોકલવામાં આવતાં હતાં.

ઈન્ડીયન મુઝાહીદ્દીન કે જેણે બ્લાસ્ટની જવાબદારી લીધી છે તે સંગઠન પણ સીમી અને લશ્કરે તોયબા દ્વારા બનાવવામાં આવ્યું છે. જેમાં સીમીનાં કાર્યકર્તાઓ મોટાભાગે કામ કરતાં હોય છે.

જો કે ક્રાઈમબ્રાંચે દાણીલીમડા વિસ્તારમાંથી અબ્દુલ હલીમની ધરપકડ કરી હતી. પોલીસ છેલ્લાં કેટલાંક સમયથી હલીમની શોધ કરી રહી હતી. આ સાથે પોલીસે 20 જેટલાં લોકોની પણ અટકાયત કરી છે.

સુરતમાં સિનેમા-મોલ બંધ કરાયા

Sun, 27 Jul 2008 18:43:10 +0530

સુરતમાં રવિવારે સવારે એક બોમ્બને ડીફ્યુઝ કરવામાં આવ્યો હતો. ત્યારબાદ એક કારમાંથી બોમ્બ બનાવવાના સામાન બાદ સમગ્ર શહેરમાં પોલીસનો બંદોબસ્ત સખ્ત કરી દેવામાં આવ્યો છે.

સુરતના સીટીલાઈટ વિસ્તારનાં નુપૂર હોસ્પીટલ નજીક થી આજે એક બોમ્બ મળી આવ્યો હતો. બોમ્બ મળતાં આસપાસ રહેતાં લોકોમાં ચિંતાની લાગણી ફેલાઈ ગઈ હતી. આ બોમ્બ સાથે ટાઈમર સેટ કરવામાં આવ્યો હતો.

લોકોએ પોલીસને જાણ કરતાં એન્ટી ટેરેરીસ્ટ સ્કવોર્ડે બોમ્બને ડીફ્યુઝ કરીને મોટી જાનહાની ટાળી દીધી હતી. તો સુરતનાં બધાં જ મોલ અને સિનેમા હોલ આજે બંધ કરી દેવામાં આવ્યા છે. પોલીસે તમામ જાહેર જગ્યાનું ચેકીંગ હાથ ધર્યુ છે.

તો બીજી બાજુ મધ્યપ્રદેશ પર આતંકી હુમલાનો ખતરો વધતાં ભોપાલમાં પોલીસે વિશેષ પગલાં લીધા છે. ભોપાલનાં સિનેમામાં રાત્રિનાં શો થોડા દિવસો સુધી બંધ રાખવા આદેશ કર્યો છે.

બોમ્બ ધમાકાનો ઘટનાક્રમ

Sun, 27 Jul 2008 17:57:21 +0530

અમદાવાદ શહેર શનિવારે સાંજે રાબેતા મુજબ પોતાની મરજીમાં હતું ત્યાં સાંજે થયેલા સિરિયલ બ્લાસ્ટે શહેરને તહસનહસ કરી મુક્યું છે. શહેરમાં એક કલાકના સમયગાળામાં 17 જેટલા ધમાકા થયા હતા.

સમય સ્થળ
6-30 મણીનગર ચાર રસ્તા પાસે
6-30 રાયપુર ચકલામાં બે ધમાકા
6-30 બાપુનગર ડાયમંડ માર્કેટ
6-35 સારંગપુર ચકલા
6-35 મણીનગર બસ સ્ટેન્ડ
6-35 જવાહર ચોક
6-35 ઇસનપુર ગોવિંદવાડી
6-45 સારંગપુર સર્કલ
6-42 બાપુનગર ડાયમંડ માર્કેટ
6-45 નરોડા ગેલેક્સી સિનેમા
7-52 મણીનગર એલ.જી હોસ્પિટલ
7-52 સરખેજ જુહાપુરા રોડ
7-54 સિવિલ હોસ્પિટલ ટ્રોમા સેન્ટર
9-30 ગોતા-વડસર રોડ

આતંકવાદ દેશ સામે ખતરો-અડવાણી

Sun, 27 Jul 2008 17:24:08 +0530

હોસ્પિટલ પર આતંકવાદી હુમલોએ આતંકની ચરમસીમા છે. આતંકવાદ કોઈ રાજ્ય કે ધર્મ કે રાજકીય પાર્ટી વિરૂધ્ધ નથી, પણ સમગ્ર દેશ સામે ખતરો છે. તેની સામે લડવા એક ફેડરલ ઈન્વેસ્ટીગેશન એજન્સીની જરૂરીયાત ઊભી થઈ છે એવું લોકસભાનાં વિરોધ પક્ષનાં નેતા અને ગાંધીનગરનાં સાંસદ લાલકૃષ્ણ અડવાણીએ અમદાવાદ બ્લાસ્ટ બાદ શહેરની મુલાકાત દરમિયાન જણાવ્યું હતું.

તેમણે કેન્દ્ર સરકાર પર આરોપ મુકતાં જણાવ્યું હતું કે આતંકવાદ વિરૂધ્ધ ફેડરલ એજન્સી બનાવવાનો સમય આવી ગયો છે. તેમજ ગુજરાત સરકારે બનાવેલા ગુજકોકનો કાયદો પસાર કરવા કેન્દ્રને જણાવ્યું હતું.

દેશમાં વધી રહેલ આતંકવાદી પ્રવૃત્તિ માટે કેન્દ્ર સરકારની તૃષ્ટિકરણની નીતિને જવાબદાર ગણાવી હતી. તેમણે જણાવ્યું હતું કે આતંકવાદ કોઈ ધર્મ સાથે નહીં પણ વિકૃત માનસિકતા સાથે સંકળાયેલો છે. તેથી તેને છાવરવાની જરૂર નથી. આપણે તેનો મુકાબલો જેટલો મોડો કરીશું, તેટલું નુકસાન થશે.

બોમ્બ બ્લાસ્ટની મોડસ ઓપરેન્ડી સરખી....

Sun, 27 Jul 2008 17:23:42 +0530

ગયા વર્ષેથી ઉત્તર પ્રદેશનાં ત્રણ શહેરોમાં થયેલા બ્લાસ્ટ હોય કે જયપુરમાં થયેલા બ્લાસ્ટ હોય. કે પછી શુક્રવારે બેંગલુરૂ અને શનિવારે અમદાવાદમાં થયેલા બ્લાસ્ટ હોય તેમની વચ્ચે કોઈને કોઈ સમાનતા જોવા મળે છે.

તમામ બ્લાસ્ટની પેટર્ન એકસરખી છે. તેમાં ઈન્ડીયન મુઝાહીદ્દીન નામના સંગઠનનો હાથ હોવાની વાત બહાર આવી છે. અને, છેલ્લા ત્રણ બ્લાસ્ટો ભાજપ શાસિત રાજ્યોમાં કરવામાં આવ્યા છે.

આ આતંકી સંગઠન બ્લાસ્ટ કર્યા બાદ ઈમેઈલ કરીને બોમ્બ બ્લાસ્ટની જવાબદારી લઈ લે છે. જે સાબિત કરે છે કે તેમની વચ્ચે કંઈક તો સમાનતા છે.

સિક્યોરીટી એક્સપર્ટનાં જણાવ્યું હતું કે ઈન્ડીયન મુઝાહીદ્દીન નામનું કોઈ સંગઠન નથી. તે આતંકવાદી સંગઠન દ્વારા બ્લાસ્ટ કરવામાં આવે છે, તેમનું નામ બહાર આવે નહીં તે માટે પોતાનું નામ ઉછાળી દે છે.

ખરેખર તો આ ખુબ વિચારીને કરવામાં આવતાં બ્લાસ્ટ છે. તેનું સંચાલન કોઈ ટ્રેડ ઓર્ગેનાઈઝેશનનું કામ છે. જેણે ભારતમાં પોતાનું નેટવર્ક વિસ્તારી દીધું છે. તેમજ તેણે દરેક શહેરમાં પોતાના માણસોને ટ્રેનીંગ આપી છે. જે આતંકવાદીઓને છુપાવાવ માટે તથા જે જોઈએ તે મદદ કરવા તત્પર હોય છે. તેમજ તેઓ હથિયાર અને બોમ્બ ચલાવવાની ટ્રેનીંગ લીધી હોય છે.

સિવિલમાં તબીબ દંપતિનું મોત

Sun, 27 Jul 2008 17:23:30 +0530

અમદાવાદ. શનિવારે અમદાવાદમાં થયેલા બોમ્બ ધડાકાઓમાં હોસ્પિટલમાં બ્લાસ્ટ કરી માનવતાને ચીઁથરેહાલ કરી છે.

શહેરમાં વિવિધ વિસ્તારોમાં સાંજે થયેલા બોમ્બ બ્લાસ્ટ બાદ ઘાયલોને સારવાર માટે હોસ્પિટલોમાં લઇ જવાઇ રહ્યા હતા. ત્યાં શહેરની સિવિલ હોસ્પિટલ તથા એલ.જી હોસ્પિટલ બોંબથી ધણધણી ઉઠતાં ઘાયલો તથા દર્દીઓને જીવતદાન આપતી હોસ્પિટલો લોહી, માંસના ખાબોચીયાથી ભરાઇ ગઇ હતી. સારવાર માટે આવેલા કેટલાયના મોત નીપજ્યા હતા તો ઘાયલો ફરી વાર અ6ી ઘાયલ બન્યા હતા. જ્યારે સિવિલ હોસ્પિટલમાં ફરજ બજાવતા તબીબ ડા. પ્રેરક શાહ તથા તેમની પત્ની ડા. કિંજલ શાહ બંનેના ટ્રોમા હોસ્પિટલમાં થયેલા ધમાકામાં મોત નીપજ્યાનું જાણવા મળે છે.

સિવિલ હોસ્પિટલમાં થયેલા બોંબ વિસ્ફોટમાં માનવ બોંબનો ઉપયોગ કરાયો હોવાનું પણ ચર્ચાઇ રહ્યું છે.

સીમીના કાર્યકરોને છોડાવવા કરાયો બ્લાસ્ટ!

Sun, 27 Jul 2008 16:21:38 +0530

અમદાવાદ અને બેંગલુરૂમાં થયેલા બ્લાસ્ટની તપાસ કરતી એજન્સીને બ્લાસ્ટ પાછળ મહારાષ્ટ્રનાં સીમી એકમનો હાથ લાગે છે.

શનિવારે થયેલા અમદાવાદનાં બ્લાસ્ટની પાંચ મિનિટ પહેલાં એક ઈમેઈલ આવ્યો હતો. જેમાં બ્લાસ્ટ કરવાની ધમકી આપવામાં આવી હતી. જે બરાબર પાંચ મિનિટ બાદ સાચી પડી હતી. એજન્સીઓને શક છે કે હવે પછીનો ટારગેટ ઈન્દોર હોવાની શક્યતા છે. કારણકે પોલીસ છેલ્લા કેટલાંક સમયથી સીમીનાં ઘણા લોકોની ધરપકડ કરી છે.

ઈન્ડીયન મુઝાહીદ્દીન નામનાં સંગઠને મોકલેલા ઈ મેઈલ યાહુનાં એકાઉન્ટ પરથી મોકલવામાં આવ્યો હતો. તેમજ તે મેઈલ અલઅરબી ગુજરાત પરથી મોકલવામાં આવ્યો હતો. આ મેઈલનું આઈપી એડ્રેસ સી-1503-1504, ગુનીના સીએચએસ પ્લોટ, સેક્ટર 2 અને 3, સંપદા, નવી મુંબઈ છે.

આ ઈમેઈલમાં સીમીનાં કાર્યકર્તાઓને પોલીસ મુક્ત નહીં કરે તો મુંબઈમાં બે વર્ષ પહેલાં ધડાકાઓની રીપીટ કરવાની ચેતવણી આપવામાં આવી છે. આ મેઈલમાં સ્પષ્ટ જણાવ્યું છે કે ઈન્દોરમાં પકડાયેલા સીમી કાર્યકર્તાઓનો બદલો લેવા માટે બ્લાસ્ટ કર્યો હોવાનું જણાવ્યું છે. તો ગોધરા કાંડ બાદ થયેલા તોફાનોનો બદલો લેવાની વાત કરવામાં આવી છે.

તેમજ મેઈલમાં મહારાષ્ટ્રનાં મુખ્યમંત્રી વિલાસરાવ દેશમુખ, ડેપ્યુટી સી.એમ. આર.આર.પાટીલને મુંબઈમાં મસ્જિદો પર થયેલા હુમલા તથા લોકલ ટ્રેનોમાં થતી મદ્રેસાઓની છાત્રાઓનાં અપમાન માટે જવાબદાર ગણાવ્યા હતા. આ મેઈલમાં ટાઈમ્સ ઓફ ઈન્ડીયા અને ટાઈમ્સ નાઉ ને પણ ધમકી આપવામાં આવી છે.

તો ગુજરાતનાં મુખ્યમંત્રી નરેન્દ્ર મોદી, ભાજપ, વીએચપી, આરએસએસ તથા બજરંગ દળનાં નેતાઓને પણ ધમકી આપેલી છે. તેમજ રિલાયન્સનાં મુકેશ અંબાણી તથા ગુજરાતનાં ઉદ્યોગપતિઓની મારી નાંખવાની પણ ધમકી આપી હતી.

આંતકવાદ વિરૂધ્ધ અલગ દળ તૈયાર કરાશે

Sun, 27 Jul 2008 15:50:15 +0530

અમદાવાદ બ્લાસ્ટમાં માર્યા ગયેલા કમભાગી લોકોના પરિવારજનોને સહયા કરવાની કેન્દ્રીય ગૃહમંત્રી શિવરાજ પાટીલે વડાપ્રધાન વતીથી જાહેરાત કરી હતી. આંતકવાદ વિરોધ લડવા માટે અલગ દળ ઉભું કરવાની તેમણે જાહેરાત કરી હતી.

પાટીલે જણાવ્યું હતું કે જાસુસી એજન્સી વચ્ચે કો ઓર્ડીનેશન કરવાની તથા આતંકવાદ વિરૂધ્ધ લડવા માટે ખાસ દળ બનાવવાની પણ જાહેરાત કરી હતી. તેમણે રાજ્યનાં લોકોને શાંતિ બનાવી રાખવાની પણ અપીલ કરી હતી. કેન્દ્ર સરકારે પણ મૃત્યુ પામેલાઓને રૂ. 1-1 લાખની રોકડ સહાય કરવાની ઘોષણા કરી છે. તેમજ ઘાયલ થયેલાઓને રૂ.50-50 હજારની સહાય કરશે.

અમદાવાદ બ્લાસ્ટમાં મૃત્યુ પામેલા કમનસીબ નાગરિકોનાં પરિવારજનોને મુખ્યમંત્રી તરફથી રૂ.5-5 લાખની સહાય જાહેરાત કરાઇ છે. તો ઘાયલ થયેલાઓને રૂ.50 -50 હજાર અપાશે.

બોમ્બ બ્લાસ્ટના તાર કોની સાથે...

Sun, 27 Jul 2008 15:50:07 +0530

બેંગલુરૂ બ્લાસ્ટ બાદ તેની તપાસમાં પડેલી કેન્દ્રીય અને રાજ્યની ગુપ્તચર એજન્સી કઈ વિચાર કરે, તે પહેલાં તો અમદાવાદમાં દેશનો સૌથી મોટો સીરીયલ બ્લાસ્ટ થયો. જેના તાર ક્યાં જોડાયેલા છે એ મુદ્દો વિચાર માંગી લે તેવો તેમજ પેચીદો થઇ પડ્યો છે.

અમદાવાદ બ્લાસ્ટએ હૈદરાબાદ, બેંગલુરૂ , જયપુર વગેરે બ્લાસ્ટ વચ્ચે કેટલીક સમાનતા છે. તો કેટલીક વાતો ખરેખર જાણવા જેવી છે.

યુપીએ સરકારે સંસદમાં વિશ્વાસમત મેળવ્યા બાદ બે દિવસમાં બેંગલુરૂ અને ત્યારબાદ અમદાવાદમાં બ્લાસ્ટ થવા તે સાબિત કરે છે કે તેઓને આ ડીલ પસંદ નથી.

જો કે આ ડીલ પાકિસ્તાનને પણ પસંદ નથી. જે સાબિત કરે છે કે આ બ્લાસ્ટ પાછળ પાકિસ્તાનનો હાથ છે. વળી, આ બ્લાસ્ટ ભાજપ શાસિત કર્ણાટક અને ગુજરાતમાં થયા છે. જે દેશમાં કોમી અશાંતિ ફેલાવવા માટે કરવામાં આવ્યા હોવાનું સાબિત કરે છે.

આ સાથે કેટલાંક લોકો સાંજે નમાઝ બાદ બ્લાસ્ટને અંજામ આપવો. તે પણ એક ધર્મ વિશેષનાં વિસ્તારોમાં જ બ્લાસ્ટ કરવો, તે સાબિત કરે છે કે ઈસ્લામિક આતંકવાદનો હાથ છે.

વળી ગુજરાતમાં સીમીની પ્રવૃત્તિ પર પ્રતિબંધ મુકવામાં આવ્યો છે. અને, તેની પર પોલીસની કડક પકડ છે. વળી, તેના ઘણાં કાર્યકર્તાઓ જેલમાં બંધ છે. તેથી તેનો બદલો લેવા પણ બ્લાસ્ટ કર્યો હોવાનું જાણવા મળ્યું છે. જેમાં સાંજનાં સમયે બ્લાસ્ટ થવો એ સાબિત કરે છે કે તેઓ વધુ ને વધુ નાગરિકોની જાનહાનિ કરવા માંગતા હતાં.

ઈન્દોરમાં વિરોધ રેલી નીકળી

Sun, 27 Jul 2008 15:49:51 +0530

W.D

બેંગલુરૂ બાદ અમદાવાદમાં થયેલા બ્લાસ્ટ બાદ દેશભરમાંથી લોકો કડક પ્રતિક્રિયા આપી રહ્યા છે. ઠેર ઠેર આતંકવાદ વિરૂધ્ધ લોકો પ્રદર્શન કરી રહ્યા છે. આતંકવાદને કચડી નાંખવા માટે લોકોમાં જાગૃતિ આવી રહી છે. તો બીજી બાજુ ગુજરાત સાથે બીજા રાજ્યોમાં પણ વિરોધ પ્રદર્શન થઈ રહ્યું છે.

જેમાં મધ્યપ્રદેશનાં આર્થિક પાટનગર ઈન્દોરમાં રવિવારે વિશાળ રેલી કાઢવામાં આવી હતી. આ રેલીમાં સેંકડો યુવાનો હાથમાં બેનર લઈને રસ્તા ઉપર નીકળી આવ્યા હતાં અને અંતકવાદી પ્રવૃત્તિ સામે વિરોધ વ્યક્ત કર્યો હતો.

ઈન્દોર માથે પણ આતંકવાદનું સંકટ ટોળાઈ રહ્યું હોવાનું બહાર આવ્યું છે. જુલાઈ મહિનાની શરૂઆતમાં થયેલા કોમી તોફાનો બાદ સ્થાનિક પોલીસે કેટલાંક સીમી કાર્યકર્તાઓની ધરપકડ કરી હતી. જેમને હજી મુક્ત કરવામાં આવ્યા નથી. તેથી તેમનો બદલો લેવા ઈન્દોરમાં પણ બ્લાસ્ટ થાય તેવી શક્યતા ઈન્દોર પોલીસ જોઈ રહી છે. અને તેનો સામનો કરવા માટે તેઓ તૈયારી કરી રહ્યા છે. અત્યારે ઈન્દોર પોલીસને હાઈએલર્ટ પર મુકવામાં આવી છે.

30 શંકાસ્પદોની ધરપકડ

Sun, 27 Jul 2008 15:49:32 +0530

અમદાવાદની અંદર ગઈ કાલે થયેલ શ્રેણીબદ્ધ બોમ્બ ધડાકાઓની શંકામાં ક્રાઈમ બ્રાંચ દ્વારા લગભગ 30 જેટલી વ્યક્તિઓની ધરપકડ કરાઈ છે.

તેઓનું માનવું છે કે આ બોમ્બ ધડાકામાં એમોનિયમ નાઈટ્રોજનનો ઉપયોગ થયેલ છે. તેમજ ગેસ સીલીંડરનો પણ ઉપયોગ થયો હોય તેવી શંકા સેવાઈ રહી છે.

બોમ્બ વિસ્ફોટ થયો તે પહેલાં મળી આવેલ ઈ-મેલનું આઈપી એડ્રેસ નવી મુંબઈના સુત્રાપાડા વિસ્તારનું છે. જેથી ત્યાં પોલીસે છાપો મારીને આ કોમ્પુટરની હાર્ડ ડિસ્ક જપ્ત કરી લીધી છે.

આ વિસ્ફોટની અંદર લગભગ 50 જેટલી વ્યક્તિના મૃત્યું નીપજ્યાં છે તેમજ 100 કરતાં પણ વધારે ઘાયલ થયેલ છે.

ન્યાય આપવા હુ કટિબદ્ધ છું: નરેન્દ્ર મોદી

Sun, 27 Jul 2008 14:35:30 +0530

બેંગલુરૂમાં થયેલા સિરીયલ બોંબ બ્લાસ્ટની કળ વળી નથી ત્યાં શનિવારે સાંજે અમદાવાદમાં 17 સિરીયલ બોંબ બ્લાસ્ટ થતાં 30થી વધુના મોત થયાના તથા 200થી વધુ ઘાયલ થયા છે. અમદાવાદમાં સર્જાયેલી આ તારાજીને ધ્યાનમાં રાખી નરેન્દ્ર મોદી સફાળા જાગ્યા છે અને રવિવારે એક મીટીંગ બોલાવી છે.

અત્યાર સુધીના સૌથી વધારે 16 સીરીયલ બ્લાસ્ટના પગલે નરેન્દ્ર મોદીએ આવતીકાલે મંત્રીઓની બેઠક બોલાવી છે, નરેન્દ્ર મોદી આવતી કાલે આ ઘટનાની ગંભીર ચર્ચા કરશે. નરેન્દ્ર મોદીએ ખાનગી ટીવી ચેનલને જણાવ્યું હતું કે આપણે આપણા ગુજરાતના વિકાસને આવી આતંકવાદી ઘટનાઓથી અટકવા નહી દઈએ.

તેમણે વધુમાં જણાવ્યું હતું કે આ હરકત કોઈ આતંકવાદી દેશની જ હોઈ શકે. ગુજરાતની જનતાને હું ન્યાય આપવા કટિબદ્ધ છુ. દરેક મૃતકને એક એક લાખ અને ઘાયલોને પચાસ હજાર આપવામાં આવશે તથા હોસ્પિટલનો સર્વ ખર્ચ સરકાર તરફથી આપવામાં આવશે. એવી જાહેરાત તેમણે કરી હતી.

ઘટનાની સંપૂર્ણ તપાસ પોલિસતંત્રને સોપી દેવામાં આવી છે. પોલિસે રેલ્વે બસસ્ટેંડ જેવા સ્થળોએ કર્ફ્યુ લાદી દીધો છે. તથા આખા શહેરમાં પેટ્રોલીંગ ચાલુ કરી દીધું છે.

પોલીસની પોલ ખુલી...

Sun, 27 Jul 2008 14:33:52 +0530

અમદાવાદમાં હાઈએલર્ટ હોવા છતાં જે રીતે સીરીયલ બોમ્બ બ્લાસ્ટ થયા છે. તેનાથી ગુજરાત પોલીસ અને ખાસ કરીને અમદાવાદ પોલીસની નિષ્ક્રીયતા સાબિત થઈ ગઈ છે. આઈબીને ઈમેઈલ મળ્યો હોવા છતાં તેમજ અને અમદાવાદમાં હાઈએલર્ટ હોવા છતાં સીરીયલ બ્લાસ્ટ થયા છે.

અમદાવાદ પોલીસ ક્યાંક ને ક્યાંક જવાબદાર છે. બપોરે આઈબીને ઈન્ડીયન મુઝાહીદ્દીન સંગઠન દ્વારા ઈમેઈલ કર્યો હતો. બાદમાં એક ટીવી ચેનલને સીરીયલ બોમ્બ ધડાકાની બરાબર પાંચ મિનીટ પહેલા ઈમેઈલ મળ્યો હતો.

જેમાં અમદાવાદમાં બોમ્બ ધડાકા થવાના હોવાનું જણાવવામાં આવ્યું હતું. આ ઈમેઈલમાં ગોધરાકાંડ બાદનાં તોફાનોની તસ્વીરો જોડવામાં આવી હતી.

અમદાવાદ સાયકલ બોંબથી ધણધણ્યું

Sun, 27 Jul 2008 14:33:17 +0530

અમદાવાદમાં સીરીયલ બોમ્બ વિસ્ફોટે સમગ્ર શહેરને હચમચાવી નાંખ્યું છે. ટીફીન બોમ્બ અને સાયકલ બોમ્બનો ઉપયોગ કરવામાં આવ્યો છે.

બેંગલુરૂમાં પણ આ રીતે સાત બ્લાસ્ટ કરવામાં આવ્યા હતા. આ બ્લાસ્ટ પાછળ ઈન્ડીયન મુઝાહીદ્દીન નામના આતંકી સંગઠનનો હાથ હોવાનું બહાર આવ્યું છે.

આ સંગઠને આઈ.બી. અને ખાનગી ચેનલને ઈ મેઈલ કરીને બ્લાસ્ટ અંગે સ્પષ્ટ જણાવવામાં આવ્યું હતું. અને , ઈમેઈલની પાંચ મિનીટ બાદ સીરીયલ બ્લાસ્ટ શરૂ થઈ ગયા હતાં.તો પોલીસ દ્વારા ઈમેઈલની તપાસ શરૂ કરી દેવામાં આવી છે.

રાજ્યને છિન્ન ભિન્ન કરવાનું કાવતરૂ

Sun, 27 Jul 2008 14:31:23 +0530

અમદાવાદ. ભાજપનાં વરિષ્ઠ નેતા લાલકૃષ્ણ અડવાણીએ બેંગલુરૂ બ્લાસ્ટ બાદ અમદાવાદ બ્લાસ્ટને વખોડી કાઢ્યો હતો. તેમણે ભોગ બનેલી વ્યકિતઓનાં પરિવારજનો પ્રત્યે દિલસોજી વ્યક્ત કરી આ કૃત્યને રાજ્યની સમૃધ્ધિને છિન્ન ભિન્ન કરવાના કાવતરા સાથે સરખાવ્યું હતું.

મુખ્યમંત્રી નરેન્દ્ર મોદીએ આજે સાંજે સીરીયલ બ્લાસ્ટને આતંકવાદીઓની માનવતાહીન ઘટના સાથે સરખાવી હતી. આ દુષ્કૃત્યને તેમણે કડક શબ્દોમાં વખોડી કાઢી હતી. આ કપરા સમયે રાજ્યની જનતાને શાંતિ વ્યવસ્થા જાળવી રાખવા નાગરિકોને અપીલ કરી હતી. અને, પોલીસને વ્યવસ્થા જાળવવામાં મદદ કરવા અપીલ કરી હતી.

રાજ્ય સરકારે આતંકવાદીઓની મેલી મુરાદ બર આવવાની નથી, અને, તેમાં સંડોવાયેલા લોકો સામે કડક હાથે કામ કરશે તેવી પ્રતિબધ્ધતા જાહેર કરી હતી.

દોડતું અમદાવાદ થંભી ગયું

Sun, 27 Jul 2008 14:30:46 +0530

અમદાવાદ. બેંગલુરૂ બ્લાસ્ટની શાહી સુકાઈ નથી, ત્યાં અમદાવાદમાં થયેલા સીરીયલ બ્લાસ્ટને કારણે શહેરનું જનજીવન થંભી ગયું છે. શહેરની નજીકનાં વિવિધ હાઈવે સહિત રસ્તા પર ટ્રાફીક જામ થઈ ગયો હતો.

લોકોને પોતાના ઘરે જવામાં તકલીફોનો સામનો કરવો પડ્યો હતો. ચારેબાજુ અફડાતફડીનો માહોલ હતો. તો દરેક વ્યકિત જલ્દી ઘરે જવા ઉતાવળમાં હતો. અમદાવાદમાં એક પછી એક થયેલા 20 બ્લાસ્ટ એક કલાકની અંદર થયા હતાં. જેને કારણે લોકો એક સાથે પોતાના ઘરે જવા નીકળ્યા હતા. તેથી ટ્રાફીક વ્યવસ્થા ખોરવાઈ ગઈ હતી.

પોતાના ઘરે કે સ્વજનોનાં ખબર અંતર પુછવા ફોન કરવાનો પ્રયત્ન કરવા છતાં ફોન લાગતાં ન હતાં. લેન્ડલાઈન બ્લોક થઈ ગઈ હતી. તો મોબાઈલ ફોનનાં નેટવર્ક જામ કરી દેવામાં આવ્યા હતાં. તેને કારણે લોકોમાં ચિંતાની લાગણી ફેલાઈ ગઈ હતી.

ઘણાં લોકો એવા હતા કે જે પોતાના વાહનો મુકીને જેમ તેમ સ્વજન સુધી પહોંચવાનો પ્રયત્ન કરતાં હતા. તે સ્થિતિમાં ટ્રાફીક વ્યવસ્થા ખોરવાઈ ગઈ હતી. આ જ રીતે હાઈવે પર પણ ચેકીંગ માટે ટ્રકોને રોકવામાં આવી હતી. જેને કારણે હાઈવે ટ્રાફીકની લાંબી કતારો લાગી હતી.

આંતકીઓએ દર્દીઓને પણ ના છોડ્યા...

Sun, 27 Jul 2008 14:30:10 +0530

અમદાવાદમાં થયેલા બોમ્બ વિસ્ફોટોની સંખ્યા વધારે હોવાના તેમજ સિવીલ હોસ્પિટલમાં પણ વિસ્ફોટ થયો હોવાના બનાવથી સત્તાવાળાઓ પણ ચિતિંત બન્યા છે. હજુ અહીં બોંબ હોવાની આશંકાએ બોંબ શોધવાની કવાયત હાથ ધરાઇ છે.

કારણ કે ઘાયલ લોકોને સિવિલ હોસ્પિટલમાં લાવવામાં આવે છે. તે સમયે એશિયાની સૌથી મોટી હોસ્પિટલમાં બ્લાસ્ટ થવાથી મૃત્યુ આંકમાં વધારો થયો છે. તો સિવિલમાં વધારે બોમ્બ હોવાની શક્યતાને કારણે બોમ્બ ડીપ્લોઝલ સ્કવોર્ડે તપાસ હાથ ધરી બોમ્બ શોધવાની કવાયત હાથ ધરી છે. અને કેટલાક દર્દીઓને અન્ય સ્થળે ખસેડાયાનું જાણવા મળે છે.

તો શહેરમાં રાત્રે વધુ વિસ્ફોટો થશે તેવી અફવાને કારણે શહેરીજનોમાં ડરની લાગણી પેદા કરી દીધી છે. તો સત્તાવાળાઓ પણ નાગરિકોને સાચી માહિતી પુરી પાડવા પ્રયત્ન કરવામાં લાગી પડ્યા છે. અને, શહેરની દરેક હોસ્પિટલમાં બંદોબસ્ત ગોઠવી દેવામાં આવી છે.

દેશમાં મોતનું નગ્નનાચ

Sun, 27 Jul 2008 14:29:34 +0530

અમદાવાદ. આંતકવાદીઓએ દેશમાં છાશવારે મોતનુ નગ્નનાચ ખેલતા આવ્યા છે. છેલ્લા પાંચ વર્ષ દરમિયાન 13 ગોઝારી ઘટનાઓ બાદ આજે બનેલી વધુ એક ઘટનાએ વધુ એકવાર લોહીની હોળી ઉછાળી છે.

છેલ્લા પાંચ વર્ષમાં દેશમાં થયેલા બ્લાસ્ટની તવારીખ
13 માર્ચ, 2003- મુંબઈમાં ટ્રેનમાં બોમ્બ બ્લાસ્ટ, 13 મોત
25 ઓગસ્ટ, 2003-- બે કાર બોમ્બ વિસ્ફોટ, મુંબઈનાં 60નાં મોત
15 ઓગસ્ટ, 2004--આસામમાં બ્લાસ્ટ, 16નાં મોત
29 ઓક્ટોબર, 2005--નવી દિલ્હી ત્રણ ધડાકા, 66નાં મોત
7 માર્ચ, 2006--વારાણસીમાં બ્લાસ્ટ, 15નાં મોત
11 જુલાઈ , 2006- મુંબઈનાં રેલ્વે સ્ટેશનમાં સાત સીરીયલ બ્લાસ્ટ, 180નાં મોત
8 સપ્ટેમ્બર, 2006--માલેગાંવ મસ્જિદમાં સીરીયલ બ્લાસ્ટ, 32નાં મોત
19 ફેબ્રુઆરી,2007--ભારત-પાકિસ્તાન વચ્ચેની ટ્રેનમાં બ્લાસ્ટ, 66નાં મોત
18 મે, 2007--હૈદરાબાદમાં ઐતિહાસિક મસ્જિદમાં બ્લાસ્ટ, 11નાં મોત
25 ઓગસ્ટ, 2007--હૈદરાબાદમાં ફુડ સ્ટોલ અને પાર્કમાં ત્રણ વિસ્ફોટમાં 40નાં મોત
13 મે 2008--જયપુરમાં શ્રેણીબધ્ધ બ્લાસ્ટ 63નાં મોત
25 જુલાઈ, 2008-- આઈટી શહેરમાં સાત ધડાકામાં બેનાં મોત
26 જુલાઈ, 2008-- અમદાવાદમાં સાંજે 6.40 કલાકે 20 બ્લાસ્ટમાં 50નાં મોત..

મોતના ધમાકા ગૂંજી ઉઠ્યા

Sun, 27 Jul 2008 14:26:38 +0530

અમદાવાદ. શહેરના પૂર્વ વિસ્તારને જ નહીં બલ્કે સમગ્ર દેશને હચમચાવી દેનાર આ બોંબ ધડાકાના પડઘા દિલ્હીમાં પડી રહ્યા છે. શહેરના કેટલાક લોકોને મોતની સફર કરાવનારા આ ગોઝારા ધમાકા આ સ્થળોએ ગુંજ્યા હતા.

(1)સરદાર પટેલ ડાયમંડ માર્કેટ
(2)સરદાર ચાર રસ્તા
(3)મણીનગર ચાર રસ્તા
(4)ઠક્કરનગર ચાર રસ્તા
(5)રાયપુર ચોકી પાસે
(6)ઓઢવ રાજેન્દ્ર પાર્ક
(7)ખોડીયાર મંદિર, ઓઢવ
(8)ઈસનપુર જયમાલા બસ સ્ટેન્ડ
(9)ઈસનપુર ગોવિંદવાડી
(10)સારંગુપર ચકલા
(11)જુહાપુરા અંબર ટાવર
(12)સરખેજ સંગમ સિનેમા
(13)ગોમતીપુર મરીયમબીબીની ચાલી
(14)સીવીલ હોસ્પીટલ ટ્રોમા વોર્ડ
(15)એલજી હોસ્પીટલ નજીક કારમાં..

બોંબ વિસ્ફોટ...બસથી લઇને હોસ્પિટલ સુધી

Sun, 27 Jul 2008 14:24:52 +0530

અમદાવાદ. અમદાવાદમાં એક પછી એક થયેલા ક્ષેણી બંધ બોમ્બ વિસ્ફોટમા બસ થી લઈને બ્રીજ સુધી, બજાર થી લઈ હોસ્પીટલ સુધી કોઈ સ્થળ બાકી નથી.

ટાઈમર બોમ્બ થી કરવામાં આવેલા બ્લાસ્ટને કારણે ફક્ત અડધો કલાકમાં જ 14થી વધુ બ્લાસ્ટ થયા હતાં. તો બાકીનાં બ્લાસ્ટ તેના પછીનાં એક કલાકમાં થયા હતાં.

આ બ્લાસ્ટમાં શહેરનાં જુહાપુરા થી લઈને મણીનગર તેમજ ગોમતીપુર થી લઈ રાયપુર ચકલા એમ બ્લાસ્ટે સમગ્ર શહેરને કવર કર્યુ છે. તેમજ આ બ્લાસ્ટમાં સાયકલ અને ટીફીનનો ભરપૂર ઉપયોગ કર્યો હતો.

અડવાણી અમદાવાદની મુલાકાતે

Sun, 27 Jul 2008 14:23:54 +0530

શનિવારે મોડી સાંજે અમદાવાદમાં થયેલાં સીરીયલ બ્લાસ્ટમાં ભારે જાન હાની થઈ છે. સત્તાની આંખો હવે ખુલી છે, આ ઘટનાને વખોડવા અને ઘાયલોને મળવા આડવાણી રવિવારે અમદાવાદ રવાના થશે.

બેંગ્લોરમાં હજી બોમ્બના પડઘા સમ્યા નથી ત્યાં જ અમદાવાદનાં 17થી વધારે ભીડભાડવાળા શહેરોમાં શનિવાર સાંજે ધડાકાઓએ હાહાકાર મચાવી દિધો હતો. નરેન્દ્ર મોદીએ હુમલા પાછળ માસ્ટર માઈન્ડ આતંકવાદી સંગઠનનો હાથ હોવાનું જણાવ્યું હતું.

વડાપ્રધાન મનમોહન સિંહ પણ અમદાવાદની મુલાકાત લેવાના છે, જ્યારે આડવાણી રવિવારે અમદાવાદની મુલાકાતે આવશે.