દિલ્હી બન્યુ ટારગેટ...

બોમ્બ મુકનારા જલ્દીમાં હતા-સાક્ષી

Mon, 29 Sep 2008 11:10:58 +0530

દક્ષિણી દિલ્હીમાં મહરૌલી વિસ્તારમાં મોટરસાયકલ પર આવેલા અને બોમ્બ રાખનારા બે યુવકોને જોયા હોવાનો દાવો કરનારી એક મહિલાએ આજે કહ્યું હતું કે આ યુવાનો ખુબ જલ્દીમાં મોટરસાયકલ ચલાવતાં હતાં, અને તેણે ધીમે ચલાવવા પણ જણાવ્યું હતું.

આયશા ખાન નામની યુવતિએ એક ટીવી ચેનલને જણાવ્યું હતું કે મોટરસાયકલ પર સવાર બે યુવકોએ અમને ઓવરટેક કર્યા, ત્યારે મેં તેમને ધીમે ચલાવવાની ટકોર કરી, કે જેથી તે કોઈ વ્યક્તિને ટક્કર ન મારી દે. તેથી મોટરસાયકલની પાછળ બેઠેલા યુવાને કહ્યું કે અમે જલ્દીમાં છીએ.

પોતાના પતિની પાછળ બેઠેલી આયેશાએ તેનાં જવાબમાં યુવકોને કહ્યું હતું કે તમારે તો પ્લેન ઉડાડવું જોઈએ.

આયેશાએ દાવો કર્યો કે તેના બાદ તે આગળ વધ્યા હતાં. અને, થોડીવાર બાદ બોમ્બ ધડાકાનો અવાજ સંભળાયો હતો.

આખરે શું છે આ વૉઈસ ઓવર પ્રોટોકોલ ટેકનિક?

Fri, 19 Sep 2008 19:27:08 +0530

અમદાવાદ અને દિલ્હીમાં થયેલા બ્લાસ્ટ દરમિયન આતંકવાદીયોએ પોતના સંદેશાઓ મોકલવા માટે જે ટેકનિકનો ઉપયોગ કર્યો હતો તેને વૉઈસ ઓવર ઈંટરનેટ પ્રોટોકોલ ટેકનિક તરીકે ઓળખવામાં આવે છે, અને આ ટેકનોલોજીને લઈને આજકાલ સામાન્યજનમાં પણ ચર્ચાઓ થઈ રહી છે.

આખરે શું છે આ ટેકનીક... આવા જ મુંઝવતા અને આપણી જિજ્ઞાશાભર્યા પ્રશ્નોના જવાબો મેળવવા અમારા મુંબઈના પ્રતિનિધિ નરેન્દ્ર રાઠોડે કરી એક ખાસ મુલાકાત સની વાઘેલાની જે હાલમાં એટીએસના કમ્પ્યુટર એક્સપર્ટ છે.

પ્રશ્ન: આ વોઈસ ઓવર ઈંટરનેટ પ્રોટોકોલ ટેકનિક શું છે, તેમજ તેને કયા ઉપયોગમાં લાવી શકાય છે?

જવાબ: કેટલાક સોફ્ટવેર એવા છે જે આઈપી ટેલિફોનિકનો ઉપયોગ કરે છે. જેનાથી અહીથી કરાયેલ કોલ પહેલા યુએસ સર્વર પર જાય છે. અને ત્યાંથી તમે આપેલા નંબરથી કોલ લોકલ સર્વર પર આવે છે. પરંતુ આયપી ટેલિફોનિક સર્વરથી લોકલ સર્વર પર આવનાર કોલ માટે અહી એવી કોઈ સુરક્ષા વ્યવસ્થા નથી કે તમે તેની ઓળખ કરી શકો કે કોલ સાચા કે ખોટા નંબર પરથી આવ્યો હતો તેની પણ માહિતી મેળવી શકાય નહી.

ત્યારબાદ કોલનું જે પેકેટ હોય છે તેમાં ડેસ્ટિનેશન નંબર તપાસીને કોલને ડેસ્ટિનેશન નંબર પર રાઉટ કરવામાં આવે છે. ત્યારે આ સંભવ થઈ શકે છે કે આ તે જ નંબર હોય જેના પરથી કોલ કરાયો હતો. આ રીતે તે ખુબ જ સરળ પ્રક્રિયા છે જેમાં નાની મોટી 10-15 ડોલરની ક્રેડિટથી આ સેવાને ઉપયોગમાં લાવી શકાય છે.

તાજેતરમાં જ આપણી સરકારે આયપી ટેલિફોનિકને પરવાનગી આપી છે. જોકે હાલમાં તો 4-5 સર્વર જ છે જેનાથી ભારતને અનુમતિ આપવી શક્ય બની શકે છે, પરંતુ આ ટેકનીકનો ઉપયોગ વધાવાની સાથેસાથે તેના દુરઉપયોગની સંખ્યામાં પણ વધારો થશે.

પ્રશ્ન: તમારા કહેવા પ્રમાણે આ સોફ્ટવેર સામાન્ય રીતે ઉપલબ્ધ છે તો શું તેનો ઉપયોગ કોઈ પણ વ્યક્તિ કરી શકે, કે તેના માટે ખાસ આવડતની જરૂર હોય છે?

જવાબ: હાલમાં તો યુએસના માત્ર 4-5 પ્રદાતાઓ છે જે આ સેવાને ઉપલબ્ધ કરાવી શકે છે, અને ભારતના કેટલાક આ સેવાનો લાભ પણ લે છે. એટલે જ કોલ ટ્રેસ કરી શકાય છે. પરંતુ ભવિષ્યમાં 100 -200 પ્રદાતાઓ આ સેવાને ઉપલબ્ધ કરાવતા થઈ જશે તો આ કોલ્સને ટ્રેસ કરવા મુશ્કેલ થઈ જશે.

પ્રશ્ન: પાંચમો ટેરર મેલ ક્યાં અને કઈ રીતે પકડાયો?

જવાબ: જી-મેલ પર પાંચમો આવવાની સાથે તેની સઘન તપાસ શરૂ કરી દેવામાં આવી હતી. રાત્રે લગભગ 12 વાગ્યે ટાટા કમ્યુનિકેશનનો આઈપી ટ્રેસ કરી લેવામાં આવ્યો હતો. અને સબસ્ક્રાઈબલની જાણકારી મળતા જ સબસ્ક્રાઈબરને પણ ટ્રેસ કરી લેવામાં આવ્યો હતો. જે ખાલસા કોલેજની એક લેબથી મોકલાયેલો હતો. પરંતુ લેબની તપાસ કરતા જાણવા મળ્યુ હતું કે ત્યાં વાઈફાઈ સ્ટિસ્ટમ લાગેલી હતી જે કોઈ સુરક્ષા હેઠળ હતી નહી, જેનો ઉપયોગ કરીને આ મેલ મોકલવામાં આવ્યો હ્તો. આ તપાસમાં એક એ પણ વાત જાણવા મળી કે જેણે પણ આનો ઉપયોગ કર્યો છે, તેની પાસે અધિકારીક યોગ્યતા પણ હતી, જેનાથી તેણે ટ્રેસિંગ લૉગ પણ ડિલીટ કરી દીધું હતું.

પ્રશ્ન: શું સમગ્ર પ્રક્રિયા લેબમાં બેસીને જ કરવી શક્ય છે, અથવા જેની પાસે માહિતી હોય કે તે અધિકારીક કમ્પ્યુટર છે, અને તેનાથી રાઉટર સંચાલિત કરી શકાય છે?

જવાબ: તે પ્રશાસકના આઈડી અને પાસવર્ડ વગર જ કામમાં લેવાયુ હ્તું. પ્રશાસકને તો માત્ર ડિફોલ્ટ રૂપે જ સેટ કરાવામાં આવ્યો હતો.

મુંબઈમાં ત્રણે રાજ્યોની પોલિસના છાપા

Fri, 19 Sep 2008 13:20:54 +0530

જયપુર, બેગલુર, અમદાવાદ અને ત્યારબાદ દિલ્હીમાં થયેલા સીરિયલ બ્લાસ્ટ્ના મુખ્ય સુત્રધાર તૌકિરની શોધ તમામ રાજ્યોની પોલિસ અને એંટી ટેરરીસ્ટ સ્કોર્ડ દ્વારા થઈ રહી છે.

તાજેતરમાં દેશની રાજધાનીમાં થયેલા સીરિયલ બ્લાસ્ટથી સમગ્ર રાજ્યોની ઊંઘ હરામ થઈ ગઈ છે. તાજેતરમાં દિલ્હી, અમદાવાદ, અને મુંબઈની પોલિસ મળીને એટીએસ સાથે મુંબઈના મીરારોડના નયાનગરમાં છાપો માર્યો હતો.

આ ત્રણે રાજ્યની પોલિસ સાથે મળીને સઘન તપાસ આદરી રહી છે. પરંતુ નક્કર પરિણામો સામે આવતા નથી. જે પોલિસતંત્ર અને સરકારની નબળાઈ સાબિત કરી આપે છે.

અમદાવાદ બ્લાસ્ટ થયા બાદ ગુજરાતના મુખ્યમંત્રી નરેન્દ્ર મોદીનું કહેવુ છે કે તેમણે દિલ્હી સરકારને ચેતવ્યા હતાં. પણ આ તેમની આળસ અને આડોડાઈનું પરિણામ હતું.

દિલ્લી પોલિસે શંકાસ્પદોના સ્કેચ જાહેર કર્યા

Fri, 19 Sep 2008 13:19:23 +0530

દિલ્લી પોલિસે શનિવારે રાજધાનીમાં થયેલા બ્લાસ્ટમાં સંકળાયેલા ત્રણ શંકાસ્પદ વ્યક્તિઓના સ્કેચ જાહેર કર્યા છે.

દિલ્હી પોલીસનાં પ્રવક્તા રાજન ભગતે જણાવ્યું હતું કે કોનોટ પેલેસ અને કરોલ બાગનાં ગફ્ફાર માર્કેટમાં થયેલા વિસ્ફોટોમાં સમાયેલા ત્રણ શંકાસ્પદ નાગરિકોનાં પાંચ સ્કેચ જાહેર કર્યા છે.

ભગતે જણાવ્યું હતું કે પાંચ સ્કેચમાં એક ગફ્ફાર માર્કેટ અને ચાર બારાખંભા રોડ પર થયેલા બ્લાસ્ટ વિસ્ફોટોમાં સામેલ સંદિગ્ધોનાં છે. તેમણે જણાવ્યું છે કે કેટલાંક પ્રત્યક્ષદર્શીઓ પાસેથી પ્રાપ્ત માહિતીનાં આધારે કોનોટ પ્લેસનાં વિસ્ફોટમાં સામેલ સંદિગ્ધોનાં બે બે સ્કેચ જાહેર કરવામાં આવ્યા છે.

તેમણે જણાવ્યું હતું કે દિલ્હીનાં લોકોને અપીલ કરવામાં આવે છે કે આ સંદિગ્ધોનાં વિશે ખબર પડે તો, તરત જ પોલીસનો સંપર્ક કરવામાં આવે. તેના માટે પોલીસ નિઃશુલ્ક 1090 ફોનસેવા પણ શરૂ કરી છે.

મંત્રીમંડળની બેઠકઃ

તો કેન્દ્રીય કેબીનેટે લાલુ યાદવની માંગનો સ્વીકાર કરતાં, તાજેતરમાં થયેલા બ્લાસ્ટ બાદ આંતરીક સુરક્ષા બાબતે ચર્ચા કરવા બુધવારે મંત્રીમંડળની બેઠક મળશે. આ બેઠકમાં તાજેતરમાં થયેલા બ્લાસ્ટ અંગેની ચર્ચા કરવામાં આવશે.

તૌકીર દોષી હોય તો ફાંસી આપો-માતા

Fri, 19 Sep 2008 13:15:48 +0530

દેશની રાજધાની દિલ્હીમાં શનિવારે થયેલા બોમ્બ વિસ્ફોટનાં માસ્ટર માઈન્ડ ગણાતાં તૌકીરનાં પરિવારજનોએ ઘટનાને વખોડ઼ી કાઢતાં જણાવ્યું હતું કે જે કોઈપણ લોકોએ વિસ્ફોટમાં ભાગ ભજવ્યો છે, તેઓ સાચા મુસલમાન નથી

તૌકીરની માતા ઝુબેદા કુરેશીએ પત્રકાર પરિષદને સંબોધન કરતાં કહ્યું હતું કે તપાસ ખોટી દિશામાં જઈ રહી છે. તેમજ જ્યાં સુધી તૌકીર ગુનેગાર સાબિત ન થાય,ત્યાં સુધી તેને ગુનેગાર ન ચીતરવા મીડિયાને અપીલ કરી હતી. પોતાનાં પુત્રનો બચાવ કરતાં તેમણે કહ્યું હતું કે મારો પુત્ર કોઈપણ રીતે બ્લાસ્ટમાં સંડોવાયેલો નથી.

અમારૂ બાળક એક સન્માનિત પરિવારમાંથી આવે છે. અમે તેને સારાં સંસ્કાર આપ્યા છે. મારો પુત્ર ક્યારેય આવું ન કરી શકે. જો મારા પુત્રની સંડોવણી સાબિત થાય તો તેને ફાંસીની સજા આપજો.

તૌકીર નાસી છુટયો !

Fri, 19 Sep 2008 13:13:10 +0530

જામીયાનગરના બે બિલ્ડીંગમાં પોલીસને આતંકવાદીઓ સાથે અથડામણ થઇ હતી એ બિલ્ડીંગમાંજ તૌકીર સંતાયો હોવાનુ તથા તે આ ગોળીબારની આડમાં નાસી ગયો હોવાની દ્રઢ આશંકા સેવાઇ રહી છે.

અમદાવાદ બ્લાસ્ટ બાદ ગત શનિવારે થયેલા દિલ્હી બ્લાસ્ટમાં પણ જેની મુખ્ય. સુત્રધાર તરીકે ઓળખ થઇ રહી છે એવો ખૂંખાર ત્રાસવાદી તૌકીર દિલ્હીમાં છુપાયો હોવાની વાત બહાર આવી હતી. જેને પગલે આજે સવારે પોલીસે અહીના જામીયાનગરમાં તપાસ હાથ ધરતાં સામેથી આતંકીઓએ ગોળીબારી શરૂ કરી દેતાં આ આશંકા વધુ દ્રઢ બની હતી.

જોકે પોલીસ સાથે થયેલી આ ગોળીબારીની આડમાં તૌકીર પોલીસને હાથ તાળી આપી ગયો હોવાની આશંકા સેવાઇ રહી છે. હૈદરાબાદનો રહેવાસી એવો તૌકીર અમદાવાદ બ્લાસ્ટ બાદ તાજેતરમાં થયેલા દિલ્હી બ્લાસ્ટમાં પણ મુખ્ય સુત્રધાર મનાઇ રહ્યો છે.

દિલ્હી બન્યુ ટારગેટ...ક્લીક કરો.

પાંચ આતંકવાદીઓ હોવાની આશંકા

Fri, 19 Sep 2008 13:10:42 +0530

દિલ્હીમાં શુક્રવાર સવારે દિલ્હીના ઝામિયા વિસ્તારમાં આવેલી ખલિલઉલ્લા મચ્છિદ પાસે આવેલી એલ-18 બિલ્ડીંગમાં આંતકવાદીઓ છુપાયેલા છે તેવી માહીતી મળતા દિલ્હી પોલીસે આતંકીઓને પકડવાનો પ્રયાસ કરતાં આતંકીઓએ સામે ગોળીબાર કર્યો હતો. જોકે પાંચ આતંકવાદીઓ હોવાનું બહાર આવ્યુ છે.

પોલીસ અને એએસજીના જવાનોએ મળીને આ ચાર આતંકીઓ પર એક્સન ફાયર કરતા બે આતંકીઓને ઠાર મરાયા હતાં. કહેવાય છે કે અમદાવાદ અને દિલ્હીમાં થયેલા બ્લાસ્ટનો મુખ્ય સુત્રધાર તૌકીર પણ આ જ બીલ્ડીંગમાં સંતાયેલો છે.

જોકે પ્રાપ્ત અહેવાલ અનુસાર બે આતંકવાદીઓને ઠાર મરાયા છે જ્યારે એક આતંકવાદીને જીવતો પકડી લેવામાં આવ્યો છે. જ્યારે બે આતંકવાદી પોલીસને ચકમો આપી ફરાર થવામાં સફળતા મેળવી લીધી છે.

જોકે દિલ્હી પોલીસનું મીશન હજી સમાપ્ત થયુ નથી તે ફરાર બંને આતંકવાદીને પકડવા દોડધામ કરી રહી છે, તેમજ પકડાયેલા આતંકવાદી સાથે સઘન પૂછપરછ કરાઈ રહી છે.

દિલ્હીમાં આતંકવાદી અથડામણ

Fri, 19 Sep 2008 13:08:48 +0530

દિલ્હીના જામીયા નગરમાં આજે સવારે આતંકવાદીઓ ઘુસી આવતાં પોલીસ સાથે અથડામણ થઇ હતી. જેમાં પોલીસ ગોળીબારીમાં બે આતંકવાદી ઠાર મરાયા હોવાનું તેમજ એક પોલીસજવાન ઘાયલ થવાના અહેવાલ છે.

દિલ્હીમાં ગત શનિવારે સાંજે થયેલા સિરિયલ બ્લાસ્ટની હજુ કળ વળી નથી ત્યાં આજે સવારે ફરી એકવાર આંતકી છાયો શહેરમા ડોકાયો છે. અહીના જામીયા નગરમાં બિલ્ડિંગ નંબર 18 માં આતંકીઓ છુપાયા હોવાની બાતમી મળતાં પોલીસે તેમને ઘેરો ઘાલ્યો હતો, આ સમયે આતંકવાદિઓએ ગોળીબારી શરૂ કરી હ્તી. જેનો સખત જવાબ પોલીસ અને તાત્કાળ ઘટના સ્થળે પહોચી ગયેલા એનએસજીના જવાનોએ ગોળીબારથી આપ્યો હતો.

આ અથડામણમાં એક આતંકી ઠાર મરાયો છે અને આ લખાય છે ત્યારે પણ સામસામે ગોળીબારી ચાલુ છે પોલીસ અને આતંકવાદીઓ સાથેની અથડામણ શુક્રવારે સવારે 11 વાગાથી શરૂ થઈ હતી. કહેવાય છે કે દિલ્હીબ્લાસ્ટનો માસ્ટરમાઈંડ તૌકિર આ જ બિલ્ડીંગમં પહેલા છુપાયેલો છે એવા માહિતી મળી રહી છે.

દેશમાં થયેલા બ્લાસ્ટનો ઈતિહાસ

Tue, 16 Sep 2008 13:27:49 +0530

આંતકવાદીઓએ દેશમાં એક પછી એક મોતની હોળી ખેલી રહ્યા છે. છેલ્લા પાંચ વર્ષ દરમિયાન 13 ગોઝારી ઘટનાઓ બાદ આજે બનેલી વધુ એક ઘટનાએ વધુ એકવાર આપણી સુરક્ષાની પોલ ખોલી છે. અત્રે ઉલ્લેખિનય છે કે, આ બ્લાસ્ટમાં 13મી તારીખ, શનિવાર અને સાંજે 6-00 વાગ્યાનો સમય એક સરખુ મળતું આવે છે.

છેલ્લા પાંચ વર્ષમાં દેશમાં થયેલા બ્લાસ્ટની તવારીખ
13 માર્ચ, 2003- મુંબઈમાં ટ્રેનમાં બોમ્બ બ્લાસ્ટ, 13 મોત
25 ઓગસ્ટ, 2003-- બે કાર બોમ્બ વિસ્ફોટ, મુંબઈનાં 60નાં મોત
15 ઓગસ્ટ, 2004--આસામમાં બ્લાસ્ટ, 16નાં મોત
29 ઓક્ટોબર, 2005--નવી દિલ્હી ત્રણ ધડાકા, 66નાં મોત
7 માર્ચ, 2006--વારાણસીમાં બ્લાસ્ટ, 15નાં મોત
11 જુલાઈ , 2006- મુંબઈનાં રેલ્વે સ્ટેશનમાં સાત સીરીયલ બ્લાસ્ટ, 180નાં મોત
8 સપ્ટેમ્બર, 2006--માલેગાંવ મસ્જિદમાં સીરીયલ બ્લાસ્ટ, 32નાં મોત
19 ફેબ્રુઆરી,2007--ભારત-પાકિસ્તાન વચ્ચેની ટ્રેનમાં બ્લાસ્ટ, 66નાં મોત
18 મે, 2007--હૈદરાબાદમાં ઐતિહાસિક મસ્જિદમાં બ્લાસ્ટ, 11નાં મોત
25 ઓગસ્ટ, 2007--હૈદરાબાદમાં ફુડ સ્ટોલ અને પાર્કમાં ત્રણ વિસ્ફોટમાં 40નાં મોત
13 મે 2008--જયપુરમાં શ્રેણીબધ્ધ બ્લાસ્ટ 63નાં મોત
25 જુલાઈ, 2008-- આઈટી શહેરમાં સાત ધડાકામાં બેનાં મોત
26 જુલાઈ, 2008-- અમદાવાદમાં સાંજે 6.40 કલાકે 20 બ્લાસ્ટમાં 50નાં મોત...
13મી સપ્ટેમ્બર, 2008--દિલ્હીના ત્રણ વિસ્તારમાં સાજે 6.10 કલાકે બ્લાસ્ટ કરાયા જેમાં 25થી વધુના મોત, 100થી વધુ ઘાયલ થયાનું બહાર આવ્યું છે, હજું આ આંકડો વધે તેમ છે.
અમદાવાદ બોમ્બ વિસ્ફોટ

દિલ્હી બ્લાસ્ટનો મુખ્ય સુત્રધાર તૌકીર

Mon, 15 Sep 2008 17:10:45 +0530

દિલ્હીમાં શનિવારે સાંજે એક પછી એક થયેલા પાંચ ધમાકાઓમાં અમદાવાદ બ્લાસ્ટમાં સંડોવાયેલ સીમીનો કાર્યકર તૌકીર મુખ્ય સુત્રધાર હોવાનું બહાર આવ્યું છે.

શનિવારે સાંજે પાટનગર દિલ્હીમાં કરૌલી બાગ, કેનોટ પેલેસ તથા ગ્રેટર કૈલાસ વિસ્તારમાં થયેલા પાંચ ધમાકાઓમાં 25 જેટલા લોકોના મોત થયાનું તથા 75 જેટલા ઘાયલ થયાનું બહાર આવી રહ્યું છે ત્યારે દિલ્હી પોલીસે આ પ્રકરણમાં છ શખ્સોની ધરપકડ કરી છે. જ્યારે આ બોમ્બ ધમાકાઓમાં તૌકીર મુખ્ય ભેજુ હોવાનું બહાર આવ્યું છે.

અત્રે ઉલ્લેખનિય છે કે, બહુનામધારી અબ્દુલ સુભાન ઉસ્માન કુરેશી ઉર્ફે કાસીમ ઉર્ફે ઝાકીર ઉર્ફે કબ ઉર્ફે તૌકીર મુંબઇ, અમદવાદ તથા સુરત બોમ્બકાંડનો મુખ્ય સુત્રધાર હોવાનું માનવામાં આવે છે

અમદાવાદ બોમ્બ વિસ્ફોટ

નાગરિકો આંતંકવાદ સામે લડેઃ કલામ

Mon, 15 Sep 2008 12:39:25 +0530

વધી રહેલી આંતકવાદી પ્રવૃત્તિ સામે લડત આપવા એ પી જે અબ્દુલ કલામે નાગરિકોને કાનૂન સાથે કદમ મિલાવવાની સલાહ આપી હતી.
તેમણે એકીકૃત ખાનગી એજેંસી 'યુનીફાઈડ ઈંટેલિઝંસ એજેંસી' ની સ્થાપના કરવાની વાત કરી હતી. તેમણે જણાવ્યુ કે આ એજંસીમાં દેશના નાગરિકોને પણ સમાવવા જોઈએ.

આંતકવાદને ખત્મ કરવા એક રાષ્ટ્રીય મિશનની જરૂર છે. આંતકવાદીઓ સ્માજમાં જ રહીને આંતકવાદી પ્રક્રિયાનુ આયોજન કરે છે, તેઓ આપણા જ ઘરો, કે હોટેલમાં રહે છે, જો લોકોને આંતકવાદી વિરૂદ્ધ પ્રક્રિયામાં સામેલ કરવામાં આવે તો આંતકવાદને દેશમાંથી નષ્ઠ કરી શકાય.
કડક કાનૂની વ્યવસ્થા ઉભી કરવાની જરૂરીયાત છે, જેથી ન્યાયની પ્રક્રિયા ઝડપી બને.

આ આપણી કાયરતાની કિમત છે !

Sun, 14 Sep 2008 18:11:24 +0530

PTI

બેંગલુર, અમદાવાદ અને હવે દિલ્હી.. એક પછી એક આંતકવાદી હુમલાઓથી દેશ ખળભળી ઉઠ્યો છે. જ્યારે બેંગલુરમાં બ્લાસ્ટ થયો હતો તેના બાદ બાદની ક્ષણોમાં જ આખા દેશમાં હાઈ એલર્ટ લાદી દેવાયો હતો. છતાં અમદાવાદમાં તેનાથી પણ વધારે સંખ્યામાં બ્લાસ્ટ થયા. અને હવે દેશની રાજધાની દિલ્હી પણ શ્રેણીબદ્ધ વિસ્ફોટોનો શિકાર બન્યો છે.

દિલ્હી આ પહેલા પણ આતંકવાદી હુમલાઓનો શિકાર બની ચુક્યું છે. આપણા રાષ્ટ્રની સંસદ જ જ્યારે સુરક્ષીત ના હોય ત્યા બીજી સુરક્ષાઓની વાત જ શુ કરવી. કહેવાય છે કે દિલ્હી પણ 'રેડ એલર્ટ'માં જ હતું. શું અર્થ આ રેડ એલર્ટનો ? શુ આ માત્ર એક શબ્દ જ છે? અને જો આની પ્રક્રિયાનો કોઈ મતલબ હોય તો તેનું પરિણામ શા માટે નથી દેખાતું ?

ખરેખર તો આ દેશના નાગરિકોને આવા પ્રકારનો ત્રાસવાદ જેલવાની આદત પડી ગઈ છે. ભ્રષ્ઠાચાર, જાતિવાદ, પ્રદેશવાદમાં ફાસાયેલા આ દેશમાં કોઈને પણ દેશ વિશે વિચારવાનો સમય નથી. ઘટના ઘટી ગયા બાદ દરેક પોતાના હાથ ઉચા કરી મુકે છે. જે દેશ સંસદ પર હુમલો કરનાર આરોપીઓને હજી સુધી ફાંસી પર લટકાવી શકી નથી, તે દેશ પાસે શુ આશા રાખવી?

આજ રીતે હુમલો વાઈટ હાઈસમાં કરવાની કોશિશ કરી હતી ત્યા એક આખા દેશને હતો ન હતો જેવો કરી મુક્યો હતો. આપણે તે ભલે ન કરી શકતા હોઈએ તો તેના અપરાધીને ફાંસીએ તો ચડાવી શકીએ. શુ એટલું પણ રાજનૈતિક પૌરુષત્વ આપણી પાસે નથી.

સાચીવાત તો એ છે કે આપણે વર્ષોથી સહિષ્ણુતાની આડમાં કાયરતા બતાવતા આવ્યા છીએ. રાષ્ટ્ર અંગે વિચારીને નિર્ણય લેવાનો સમય હવે આપણી પાસે નથી. નિર્ણય શુ લેવા, તેનો સીધો સંબંધ વોટ પર આધારિત છે.

અંગ્રેજીમાં એક કહેવત છે -' અ સ્ટિચ ઈન ટાઈમ, સેવ નાઈન' એટલે કે કપડામાં જો એક સિલાઈનો દોરો નિકળી જાય તો તેને સમયે સીવી લેવુ જોઈએ, નહિતર આગળ જઈને તેમાં નવ વખત સીલાઈ કરવી પડે છે. જો કઈ ખોટુ થતુ હોય તો તેને તત્કાળ જ ઉકેલ માટે પગલા ભરવા જોઈએ.
વ્યવસ્થા અને જવાબદાર વ્યકિઓ તો જાણે નવી વિપદાની રાહ તકતા બેઠા હશે. હવે તો આપણી રખેવાળી કરીએ.. તથા કોશિશ કરીએ કે તમામ વ્યક્તિગત કાર્યોની સાથે સાથે રાષ્ટ્રીય સ્વાભિમાન અને રાષ્ટ્રીય ચેતનાને હ્ર્દયમાં પ્રજ્વલિત રાખીએ. અને આપણી અને દેશની સુરક્ષા કરીએ.

ક્યારે થશે આતંકનું એન્કાઉન્ટર !

Sun, 14 Sep 2008 17:37:15 +0530

PTI

13મી માર્ચ 2003ના દિવસે મુંબઇ થંભી ગયું. મુંબઇની દોડતી ધડકન એવી ટ્રેનના ફુરચે ફુરચો બોલી ગયા, 13 નિર્દોષ જીંદગી ભગવાનને પ્યારી થઇ. કેટલાય ઘાયલ થયા. આંતકીઓના બોમ્બ ધમાકા પછી મોટા બણગા ફુકતા રાજકારણીઓ, અધિકારીઓએ આંતકવાદીઓને કાબુમાં લેવાના મનસુબા ઘડ્યા. પરંતુ આ મનસુબા તો કામયાબ ના થયા પણ આંતકીઓની જાણે કે હિંમત ખુલી ગઇ છે. એક પછી એક શહેરમાં તેઓ ખેલી રહ્યા છે મોતનો ખેલ.

25મી ઓગસ્ટે ફરી એક વાર મુંબઇ ધણધણી ઉઠ્યું..બે કારમાં થયેલા બોમ્બ બ્લાસ્ટે હરતી ફરતી 60 જીંદગીઓને લાશમાં ફેરવી, મોતના આ તાંડવ પછી પણ જાણ કે આંતકીઓની શેતાની શાન ઠેકાણે ના આવી.

આસામ, નવી દિલ્હી, વારાણસી, મુંબઈ, માલેગાંવ, હૈદરાબાદ, જયપુર, બેંગલોર, અમદાવાદ અને 13મી સપ્ટેમ્બરે ફરી એકવાર પાટનગર ધ્રુજી ઉઠ્યું છે. શહેરના ત્રણ વિસ્તારમાં એક પછી એક થયેલા પાંચ ધડાકાઓમાં 25 મોત થયા છે જ્યારે 75થી વધુ ઘાયલ થયા.

દેશની આબરૂ ફરી એક વાર સંકટમાં મુકાઇ, દેશની ગુપ્તચર એજન્સીઓ, પોલીસની આંખોમાં ધુળ નાંખી આંતકીઓએ સરેઆમ આપણી આબરૂને ચીંથરેહાલ કરી છે. આમ છતાં આપણી સરકારી રેર્કડો એમની એમ વાગ્યા જ કરે છે. અમે એમ કરીશું તેમ કરીશું...! પરંતુ ક્યાં સુધી આમ નિર્દોષોની જીંદગી લૂંટાતી રહેશે...ક્યાં સુધી આપણે કાયરતા દેખાડતા રહીશું....ક્યાં સુધી નપાણી સરકારીના ભરોસે આપણી જિંદગી દાવ પર મુકતા રહીશું...

આપણી કાયરતાનો જ આ રાક્ષસો લાભ ઉઠાવી રહ્યા છે. આપણા ભાઇ-બહેનોને આ રીતે ઘવાયેલા ના જોવા હોય તો હવે કાયરતાને ગળે ટુંપો દેવો પડશે. મક્કમ બનવું પડશે. રાષ્ટ્રભક્તિ સાથે સમાજશક્તિનો અનોખો સમન્વય સાધવો પડશે. આંતકીઓનું નું અન્કાઉન્ટર કરવું પડશે ! કોણ કરશે આંતકીઓનું એન્કાઉન્ટર ? દેશને જરૂર છે આ માટે બાહોશ નેતા, બાહોશ અધિકારીઓ સાથોસાથ બાહોશ નાગરિકોની....ક્યારે આગળ આવશે આવા નેતા, અધિકારી અને નાગરિકો દેશની લાજ બચાવવા, સમય તેમની રાહ જોઇ રહ્યો છે. તકેદારી એ રાખવાની છે કે ક્યાંક મોડુ ના થઇ જાય !!

ફરીથી કેન્દ્રની પીપુડી વાગી

Sun, 14 Sep 2008 12:15:26 +0530

અમદાવાદ, જયપુર, હૈદરાબાદ, મુંબઈ શહેરોમાં છેલ્લાં થોડા વર્ષોમાં બ્લાસ્ટ થયા છે. જેમાં કેટલીય માતાએ તેના પુત્રો ખોયા છે, કેટલાય સુહાગનો સ્ત્રી વિધવા થઈ ગઈ છે, તો બાળકોએ પોતાનાં માતા પિતા ખોયા છે. આ સ્થિતિમાં આતંકવાદીઓ વિરૂધ્ધ કડક હાથે કામ લેવાની જગ્યાએ કેન્દ્રીય ગૃહમંત્રી શિવરાજ પાટીલ અને ગૃહરાજ્યમંત્રી શ્રીપ્રકાશ જયસ્વાલ ફરીથી એકવાર પોતાની ટેપ વગાડી છે.

શનિવારે દિલ્હીમાં થયેલા બ્લાસ્ટ બાદ કેન્દ્રીય ગૃહરાજ્યમંત્રી શ્રીપ્રકાશ જયસ્વાલે ફરીથી એ જ ટેપ વગાડી હતી. તેમણે જણાવ્યું હતું કે આતંકવાદીઓને છોડવામાં આવશે નહીં. તેમનાં વિરૂધ્ધ કડક પગલાં લેવામાં આવશે.

મંત્રી દરેક બ્લાસ્ટ બાદ આ લાઈન બોલે છે. લોકોને આશ્વાસન આપે છે. પણ આતંકવાદી વિરૂધ્ધ પગલાં ભરવાની વાત આવે છે, ત્યારે લઘુમતી વોટબેન્ક મેળવવા માટે કુણુ વલણ અપનાવે છે. પણ જનતા ચુંટણી સુધી સહન કરશે. જે સરકાર જનતાનું રક્ષણ ન કરી શકે, તેને ચુંટણી વખતે જનતા પરચો બતાવી દેશે તે વાત નક્કી છે.

કોનોટ પેલેસમાં સેકડોનો બચાવ

Sun, 14 Sep 2008 12:14:22 +0530

નવી દિલ્હીમાં થયેલા વિસ્ફોટમાં સેંકડો નિર્દોષ લોકોની જાન લીધી છે. પણ કોનોટ પેલેસમાં જાહેર જનતા અને પોલીસે વિકસાવેલી ખાસ સિસ્ટમને કારણે સેકડો લોકોનાં જીવ બચી ગયા છે.

એક પછી એક ભીડભાડવાળા માર્કેટ થયેલા બ્લાસ્ટને કારણે દિલ્હી આજે ધ્રુજી ઉઠ્યું હતું. કોનોટ પેલેસ, ગ્રેટર કૈલાસ અને કારોલીબાગમાં બ્લાસ્ટ થયાં હતા. પણ આ બધાની વચ્ચે કોનોટ પેલેસમાં સેકડો લોકોનાં જાન બચી ગયાં છે.

સેકડો લોકોનાં જીવ બચી જવા પાછળ પોલીસ અને વેપારીઓએ એકબીજાનાં સહકારથી વિકસાવેલ ખાસ પબ્લીક એલર્ટ સિસ્ટમ છે. જેમાં સમગ્ર માર્કેટ વિસ્તારમાં ખાસ સિસ્ટમ વિકસાવી છે. જેમાં લોકોને લાઉડ સ્પીકર દ્વારા સુચના આપવામાં આવે છે.

આ સિસ્ટમનો સંકટ ઘડીએ સ્થાનિક વેપારીઓએ ખુબ સારો ઉપયોગ કર્યો હતો. જેમાં પ્રથમ બ્લાસ્ટ બાદ તરત જ વેપારીઓએ લાઉડ સ્પીકર દ્વારા સુચના આપી હતી, જેમાં તેમણે લોકોને ચિંતા ન કરવા જણાવ્યું હતુ. અને, પોતાનું વાહન છોડીને શાંતિથી સેન્ટ્રલ પાર્ક તરફ આવવા કહેવામાં આવ્યું હતું. આ સુચના બાદ લગભગ 600 થી 800 લોકો સેન્ટ્રલ પાર્કમાં ભેગા થયાં હતાં. લોકો જેવા સેન્ટ્રલ પાર્કમાં ભેગા થયા કે તરત જ બીજો બ્લાસ્ટ થયો હતો.

આમ કોનોટ પેલેસમાં સમયસર સુચના આપવામાં ન આવી હોત તો વધારે લોકોનાં જીવ લેવાઈ જાત. પણ જરૂર બ્લાસ્ટ પહેલાં જાગવાની. દેશની અંદર રહેલા આતંકવાદીઓને પકડીને તેમનું નેટવર્ક તોડી નાંખવાની જરૂર છે.

દિલ્હી કેટલું સુરક્ષિત..?

Sun, 14 Sep 2008 12:14:08 +0530

દિલ્હીને હચમચાવી રાખનાર બોમ્બ વિસ્ફોટ બાદ સવાલ એ ઉભો થાય કે દિલ્હી કેટલી સુરક્ષિત? દેશની રાજધાની કેટલી સુરક્ષિત?

જે શહેર માત્ર દેશની જ નહીં પણ ખુદ એક રાજ્યની રાજધાની છે. તેવા દિલ્હીમાં વારંવાર થતાં આતંકી હુમલાએ દેશનાં સત્તાધીશો સામે પણ પ્રશ્નાર્થ ચિહ્ન કરે છે. દેશનો વહિવટ જ્યાંથી ચાલે છે. દરેક સેના અને જાસુસી સંસ્થાનાં હેડક્વાર્ટર આવેલા છે. તેવા દિલ્હી કેમ વારંવાર આતંકીઓનું શિકાર બને છે.

દિલ્હીમાં આટલી કડક સુરક્ષા વ્યવસ્થા હોવા છતાં આતંકીઓ સફળ થાય છે. સેના,પોલીસ અને જાસુસી સંસ્થાનાં હજારો જવાનો 500 જેટલા વીઆઈપી અને વીવીઆઈપીઓની સુરક્ષામાં લાગેલા હોય છે. બાકીનાં એક કરોડ દિલ્હીવાસીઓ માટે બચે છે, ફક્ત થોડાક હજાર પોલીસ જવાનો. આજે દિલ્હી આતંકીઓ જ નહીં, પણ બાઈકચોરોથી પણ સુરક્ષિત નથી.

હવે, જનતાએ નક્કી કરવાનું છે કે કેન્દ્રમાં બેઠેલા તેમના નેતાઓમાં કેટલું પાણી છે. સામાન્ય લોકોનું માનવું છે કે જે સરકાર જનતાનું રક્ષણ ન કરી શકે, તેને સત્તા પર રહેવાનો કોઈ હક્ક નથી.

દિલ્હીમાં બોમ્બ બ્લાસ્ટ, 25ના મોત

Sun, 14 Sep 2008 12:13:40 +0530

શનિવારે મોડી સાંજે નવી દિલ્હીમાં પાંચ સીરીયલ બ્લાસ્ટ થતાં દિલ્હી સહિત દેશ હચમચી ઉઠ્યો હતો. પાટનગરમાં સાંજે 6.10ની આસપાસ પ્રથમ બ્લાસ્ટ બાદ બીજા બે સ્થળોએ બ્લાસ્ટ થયા હતા. આમ ગણત્રીની મિનિટોમાં એક પછી એક છ બ્લાસ્ટ બાદ થયાં હતાં. આ બોમ્બ લો ઈન્ટેનસીટીવાળા હોવા છતાં 25થી વધુના મોત થયાંનું તથા 75થી વધુ લોકો ઘાયલ થયાનું જાણવા મળે છે.

આતંકવાદીઓએ જયપુર, બેગ્લોર અને અમદાવાદ બાદ શનિવારે દિલ્હીને નિશાન બનાવ્યુ હતું. સાંજે 6.10 વાગ્યે પ્રથમ બ્લાસ્ટ કરોલબાગનાં ગફ્ફાર માર્કેટમાં થયો હતો. આ બ્લાસ્ટ લો ઈન્ટેનસીટીવાળો હતો. તેથી નુકસાની ઓછી થઈ હોવાનું જાણવા મળ્યું છે. તેમાં વીસેક જેટલાં લોકો ઘાયલ થયા હોવાનું જાણવા મળ્યું છે.

ત્યારબાદ કોનોટ પેલેસમાં બે બ્લાસ્ટ થયો હતો. જેમાં પ્રથમ બ્લાસ્ટ ગોપાલદાસ બિલ્ડીંગનાં ગેટ નંબર એક પર થયો હતો. આ બોમ્બ રીક્ષામાં રાખવામાં આવ્યો હતો. બ્લાસ્ટ બાદ રીક્ષાનાં ભુક્કે ભુક્કા બોલાઈ ગયા હતા. જ્યારે બીજો બ્લાસ્ટ પાલિકા બજારમાં થયા હતા. જ્યાં સ્કુટર પર બોમ્બ રાખવામાં આવ્યો હોવાની પ્રાથમિક વિગતો મળી છે. આ સ્થળે આસપાસ ઉભેલા વાહનોને પણ ખુબ નુકસાન થયું હતું. જ્યારે ત્રીજો બ્લાસ્ટ ગ્રેટર કૈલાસ એકમાં આવેલા ગોપાલદાસ બિલ્ડીંગ નાં ગેટ પર થયો હતો. અહીં ત્રણ બ્લાસ્ટ થયાનું જાણવા મળ્યું છે.

આ બ્લાસ્ટ બાદ ભીડભાડ ધરાવતાં બજારમાં અફડાતફડી મચી ગઈ હતી. લોકો પોતાનો જીવ બચાવવા માટે ભાંગભાગ કરતાં નજરે પડતાં હતાં. પોલીસે સમગ્ર દિલ્હીમાં હાઈ એલર્ટ કરાયું છે. અને, આવન જાવનનાં તમામ માર્ગો બ્લોક કરી દીધા છે.

આતંકીઓની એકસરખી મોડસ મોડરન્ડી

Sun, 14 Sep 2008 12:13:20 +0530

નવી દિલ્હીનાં ભીડભાડ ધરાવતાં માર્કેટ વિસ્તારમાં શનિવારે થયેલા બ્લાસ્ટે ફરીથી આતંકવાદીઓની રણનીતિ સાબિત કરી દીધી છે. વધારેમાં વધારે લોકોની જાનહાનિ કરવા તેણે નવી દિલ્હીનાં પોશ વિસ્તારનાં માર્કેટને નિશાન બનાવ્યું છે.

રાજધાની દિલ્હી હંમેશાથી આતંકવાદીઓનાં નિશાન પર રહ્યું છે. આ પહેલાં પણ દિલ્હીને 2005માં નિશાન બનાવ્યું હતું. જેમાં ત્રણ સ્થળોએ સીરીયલ બ્લાસ્ટ કરવામાં આવ્યા હતા. જેમાં કુલ 62 નાગરિકોનાં મોત થયાં હતા. જ્યારે 210 લોકો ઘાયલ થયા હતાં. દિવાળીનાં થોડા દિવસ પહેલાં થયેલા બ્લાસ્ટને કારણે માર્કેટમાં ખુબ ભીડ હોવાથી મૃત્યુઆંક પણ વધી ગયો હતો.

આ વખતે પણ 13 સપ્ટેમ્બરનાં રોજ સીરીયલ બ્લાસ્ટે ત્રણ વર્ષ પહેલાંનાં બ્લાસ્ટની યાદ અપાવી દીધી હતી. આતંકવાદીઓની રણનીતિને જોઈને આ કૃત્ય સિમી એટલે ઈન્ડીયન મુઝાહીદ્દીનનું કામ હોવાનું જાણવા મળ્યું છે. કારણ કે અમદાવાદ, જયપુર, હૈદરાબાદ થયેલા સીરીયલ બ્લાસ્ટ સાથે તેની મોડસ ઓપરેન્ડી જોતાં સિમી આતંકવાદીઓનો તેમાં હાથ હોય તેમ લાગે છે.

સામાન્ય રીતે કોનોટ પેલેસ અને કરોલબાગમાં હજારો લોકો ખરીદી કરવા આવતાં હોય છે. તેને કારણે રસ્તા પર ચાલવાની જગ્યા હોતી નથી. આતંકવાદીઓએ લો ઈન્ટેનસીટી બ્લાસ્ટ કરીને ઓછી મહેનતે સેકડો લોકોને મારવાનો પ્લાન કર્યો હતો.

બ્લાસ્ટ બાદ આઈએમનો ઈ મેઈલ

Sun, 14 Sep 2008 12:12:21 +0530

દેશમાં થયેલા બ્લાસ્ટ બાદ આઈએમ એટલે ઈન્ડીયન મુઝાહીદ્દીને ઈ મેઈલ કરીને સીરીયલ બ્લાસ્ટની જવાબદારી લીધી છે. તો પોલીસે ઈન્ડીયા ગેટ પાસેથી જીવતો બોમ્બ પકડીને તેને નિષ્ક્રીય કરી નાંખી, વધુ જાનહાનિ થતી રોકી દીધી છે.

અમદાવાદ, જયપુર બાદ ઈન્ડીયન મુઝાહીદ્દીને પણ દિલ્હી પોલીસને ઈ મેઈલ કરીને સીરીયલ બ્લાસ્ટની જવાબદારી સ્વીકારી લીધી છે. દિલ્હી પોલીસને સિમી પર શક હતો. જે સાચી ઠરી છે. સિમીનાં એક ભાગ એવા
ઈન્ડીયન મુઝાહીદ્દીને બ્લાસ્ટ બાદ ઈમેઈલ કર્યો હતો. આ મેઈલમાં બ્લાસ્ટની જવાબદારી સ્વીકારી લેવામાં આવી હતી.

ઉલ્લેખનીય છે કે અમદાવાદમાં પણ ઈન્ડીયન મુઝાહીદ્દીને એ જ મોડસ ઓપરેન્ડીનો ઉપયોગ કર્યો હતો. જેમાં આરડીએક્સ જેવા ભારે વિસ્ફોટકની જગ્યાએ બજારમાં આસાનીથી ઉપલબ્ધ એવા તત્ત્વોથી બોમ્બ બનાવીને વિસ્ફોટ કરવામાં આવ્યા હતાં. આ બોમ્બમાં છરા, લોખંડનાં ટુકકા વગેરેનો ઉપયોગ કરવામાં આવ્યો હતો.

મેં આતંકવાદીને જોયા છે-રાહુલ

Sun, 14 Sep 2008 12:12:02 +0530

દિલ્હીનાં કોનોટ પેલેસમાં થયેલા ત્રણ બ્લાસ્ટ પૈકી એક બ્લાસટ કચરાપેટીમાં થયો હતો. આ કચરાપેટીમાં બોમ્બ મુકતાં રાહુલ નામના ફુગ્ગા વેચતાં છોકરાએ જોયા હતાં.

રાહુલે પત્રકારોને જણાવ્યું હતું કે તે જ્યારે અહીથી પસાર થઈ રહ્યો હતો. ત્યારે બે યુવાનો હાથમાં કાળા રંગની બેગ લઈને કચરાપેટી તરફ જતાં જોયા હતાં. તેમજ તેમણે કચરાપેટીમાં તે બેગમાં નાંખતાં જોયા હતાં.

આ બેગ કચરાપેટીનાં બેગ નાંખ્યાની થોડી વાર પછી એટલે કે પંદર મિનીટ બાદ બ્લાસ્ટ થયો હતો. આ બે વ્યક્તિઓ રીક્ષામાં આવ્યા હતાં.

દિલ્હી બ્લાસ્ટઃ ગુજરાતમાં હાઈએલર્ટ

Sun, 14 Sep 2008 12:11:42 +0530

આજે શનિવારની સાંજે દિલ્હીમાં થયેલા સીરીયલ બ્લાસ્ટ બાદ ગુજરાતમાં પણ હાઈ એલર્ટ લાદી દેવામાં આવ્યુ છે.

ગુજરાતના ગૃહરાજ્યમંત્રી અમિત શાહે જણાવ્યુ હતુ કે રાજ્યમાં કડક સુરક્ષા લાદી દેવામાં આવી છે. નોંધનીય છે કે તાજેતરમાં જ થયેલા અમદાવાદ અને સુરત બ્લાસ્ટ બાદ શહેરમાં સુરક્ષા બન્દોબસ્ત લાદી દેવાયોલો છે.

ત્યારબાદ મળેલી માહીતી અનુસાર વડોદરામાં પણ પૂરતી સુરક્ષા ગોઠવી દેવાઈ છે. શહેરના પોલિસ કમિશ્નર રાકેશ આસ્થાનાએ જણાવ્યુ હતુ કે રવિવારે સુરજ ડુબતા પહેલા ગણપતિ વિસર્જન કરી દેવાની વિવિધ મંડળોને તાકિદ કરાઈ છે.

દિલ્હીનું બોમ્બે કનેકશન...

Sun, 14 Sep 2008 12:11:23 +0530

દરેક બ્લાસ્ટનું મૂળ મુંબઈમાં નીકળી રહ્યું છે. અમદાવાદ બ્લાસ્ટ બાદ ઈન્ડીયન મુઝાહીદ્દીને એક ઈમેઈલ કર્યો હતો. તેવી રીતે દિલ્હી બ્લાસ્ટ બાદ પણ ઈમેઈલ કરવામાં આવ્યો છે. જેમાં બ્લાસ્ટની જવાબદારી સ્વીકારવામાં આવી છે.

આ ઈ મેઈલ મુંબઈનાં ચેમ્બુર વિસ્તારમાં કામરાન પાવર, 201-202,એટીક હાઉસ, 16 રોડ પરથી આવ્યો હતો. આ અંગે નાયબ મુખ્યમંત્રીએ માહિતી આપી હતી. જો કે આ અંગે તેમણે વધુ માહિતી આપી નહતી.

જ્યારે દિલ્હી પોલીસે ઈ મેઈલ અંગે જણાવ્યું હતું કે મેઈલમાં દિલ્હીમાં નવ બ્લાસ્ટ કરવાની વાત કરવામાં આવી છે. અને, તેનું હવે પછીનું ટારગેટ મુંબઈ છે. તો મુંબઈમાં ગણેશ ચતુર્થીનો તહેવાર આવતો હોવાથી મુંબઈ પોલીસ અને મહારાષ્ટ્ર પોલીસને એલર્ટ પર મુકી દેવામાં આવી છે.

આ વખતે પણ ઈ મેઈલ મુંબઈથી આવ્યો છે. જે સાબિત કરે છે કે આતંકીઓએ મુંબઈ શહેરને પોતાનો અડ્ડો બનાવી દીધો છે. અને, તે મુંબઈમાં ગમે ત્યારે કોઈ મોટી દુર્ઘટના કરી શકે છે. મુંબઈ એટીએસે મીરાં રોડ દરોડો પાડ્યો હતો. જે અંગે વધુ વિગતો મળી નથી.

નેતાઓએ ઘટનાને વખોડી

Sun, 14 Sep 2008 12:11:00 +0530

રાષ્ટ્રપતિ પ્રતિભા પાટિલે રાજધાનીમાં થયેલા સીરીયલ બ્લાસ્ટને અમાનવીય કૃત્ય ગણાવી દેશના નાગરિકોને શાંતિ જાળવવાનું કહ્યુ હતું.

રાષ્ટ્રપ્તિભવનથી પ્રાપ્ત માહિતી અનુસાર પાટિલે મૃત્યુ પામેલા લોકો પ્રત્યે સંવેદના વ્યક્ત કરી હતી. અને ઘાયલ લોકો જલદી સ્વસ્થ થાય તેવી પ્રાર્થના કરી હતી.

પંજાબના મુખ્યમંત્રી પ્રકાશસિંહ બાદલે દિલ્હીમાં થયેલા બ્લાસ્ટની નિંદા કરતા જણાવ્યુ હતુ કે આ રાષ્ટ્રવિરોધિઓનુ કારસ્તાન છે. ઉપરાંત પ્રકાશસિંહ બાદલે સમાજમાં દરેકા નાગરિકોને શાંતિ જાળવી રાખવાની સલાહા આપી હતી.

દિલ્હીમાં થયેલા બ્લાસ્ટની નિંદા કરતા એનસીપી પાર્ટીના મહાસચિવ તારિક અનવરે આ ઘટનાને આંતકવાદીઓની કાયરતાભરી હરકત ગણાવી છે. તેમજ દરેક સમુદાયના લોકોને શાંતિ જાળવવા વિનંતી કરી હતી.

તેમણે દેશના નાગરિકોને શાંતિ જાળવી આંતકવાદિઓના ઈરાદાને તોડવાની સલાહ આપી હતી.

બિહાર અને મધ્યપ્રદેશમાં પણ હાઈ એલર્ટ

Sun, 14 Sep 2008 11:47:17 +0530

દિલ્હીમાં થયેલા સીરીયલ બ્લાસ્ટના પગલે અન્ય રાજ્યોએ તાત્કાલિક હાઈ એલર્ટ જાહેર કરી દીધો હતો. જેમાં ગુરતાત બાદ મુંબઈ, બિહાર અને મધ્યપદેશની સરકારે તાત્કાલિક ધોરણે રાજ્યમાં હાઈ એલર્ટ જાહેર કરી દીધો હતો.

બિહારના ડીઆઈજી અનિલ કુમાર સિન્હાએ જણાવ્યુ કે દિલ્હી બ્લાસ્ટના પગલે રાજ્ય પોલિસ મુખ્યાલયથી બધા જ જિલ્લાઓમાં એલર્ટ જાહેર કરી, પ્રમુખ સંસ્થાનોમાં ચોક્સાઈ વધારી દેવાના આદેશ આપી દેવામાં આવ્યા હતાં.તેમણે જણાવ્યુ કે સંવેદનશીલ વિસ્તારોમા, ધાર્મિક સ્થળો અને પ્રતિષ્ઠિત સંસ્થાનોમાં પોલિસ વ્યવસ્થા ગોઠવી દેવામાં આવી છે.

દિલ્હીમાં થયેલા બ્લાસ્ટના પગલે મધ્ય પ્રદેશની આર્થિક રાજધાની ઈન્દોરમાં પણ હાઈ એલર્ટ જાહેર કરી દેવયો હતો. આંતકવાદી સંગઠન ઈંડિયન મુઝાહીદ્દીનના મળેલા મેલથી પોલિસ જાગી ગઈ છે. એક સમયે ઈન્દોર અને તેની આસપાસના પ્રદેશોમાં આ સંગઠનની પ્રવૃત્તિઓ થતી હતી.સાથે સાથે દેશમાં થતી આંતકી ઘટનાના તાર આ શહેર સાથે જોડાયેલા રહ્યા છે.

પોલિસ સૂત્રોએ જણાવ્યુ કે શહેર બસ સ્ટેંડ, રેલવે સ્ટેશન અને હવાઈ મથકો પર એન્ટી બોમ્બ સ્કવોર્ડ દ્વારા સઘન તપાસ ચાલુ કરાઈ દેવાઈ છે.
ઉલ્લેખનીય છે કે દિલ્હીમાં થયેલા બ્લાસ્ટની જવાબદારી મીડિયા સંસ્થાનોને મેલ કરી આંતકવાદી સંગઠન ઈંડિયન મુઝાહુદ્દીને લીધી હતી.

જોકો ગુજરાત પોલિસે અમદાવાદમાં થયેલા બ્લાસ્ટ પગલે કરેલા ખુલાસામાં કહ્યુ હતુ કે ઈંડિયન મુઝાહુદ્દિન બીજુ કઈ નહી પણ પ્રતિબંધીત સંગઠન સ્ટૂડેંટસ ઈસ્લામિક મૂવમેંટ ઓફ ઈંડિયા 'સીમી'નું જ એક રૂપ છે. આ સંગઠન જયપુર અને અમદાવાદ બ્લાસ્ટમાં થયેલા મેલથી તે ચર્ચામાં આવ્યુ હતું.

રીગલ સિનેમા સામેથી ત્રણ જીવતા બોમ્બ મળ્યા

Sun, 14 Sep 2008 11:46:15 +0530

કોનોટ પેલેસમાં ઉપરાઉપરી ત્રણ બ્લાસ્ટ થયાં હતાં. ત્યારબાદ આ જ વિસ્તારમાં આવેલા વર્ષો જુના રીગલ સિનેમાની સામેથી ત્રણ જીવતાં બોમ્બ મળી આવ્યાં હતાં.તો ઈન્ડીયા ગેટ પાસેથી મળેલા બોમ્બ પણ પોલીસ નિષ્ક્રિય કરી દીધો છે.

શનિવારે સાંજે કોનોટ પેલેસ વિસ્તારમાં ત્રણ બોમ્બ બ્લાસ્ટ થયાં હતાં. જેમાં કેટલાય મૃત્યુ પામ્યા હતા, તો કેટલાંક ઘાયલ થયાં હતાં. આ બ્લાસ્ટ બાદ પોલીસે સમગ્ર વિસ્તારને કોર્ડન કરી નાંખ્યો હતો. અને, એનએસજીનાં જવાનો એ ઘટનાસ્થળે શોધખોળ શરૂ કરી હતી. જેમાં રીગલ સિનેમાની સામે બે જીવતાં બોમ્બ મળી આવ્યાં હતાં.

આ સિનેમાની સામે આવેલા ખુલ્લા વિસ્તારમાં બે બોમ્બ મળી આવ્યાં હતાં. જેને નિષ્ક્રિય કરવાની પ્રક્રિયા શરૂ કરી દેવામાં આવ્યા છે. આ બોમ્બને નિષ્ક્રિય કરવાથી મોટી જાનહાનિ ટાળવાનું શક્ય બન્યું છે. આ જ રીતે ઈન્ડીયા ગેટ વિસ્તારમાંથી પણ એક જીવંત બોમ્બ મળ્યો હતો. જેને પોલીસે નિષ્કિય કરી નાંખ્યો હતો.

ફરી એક વાર શનિવારે લોહીની હોળી

Sun, 14 Sep 2008 11:45:40 +0530

અમદાવાદ બાદ આજે દિલ્હીવાસીઓ માટે શનિવાર ગોઝારો બન્યો છે. ગત 26મી જુલાઇના શનિવારે અમદાવાદ ધણધણી ઉઠ્યું હતું. એના ઠીક દોઢ મહિના બાદ આજે 13મી તારીખનો શનિવારે દિલ્હીવાસીઓની ઉંઘ હરામ કરી દીધી છે.

અમદાવાદમાં થયેલા બ્લાસ્ટ અને આજના દિલ્હીમાં થયેલા બ્લાસ્ટમાં ઘણી સામ્યતા જોવા મળી રહી છે. અમદાવાદમાં પણ શનિવારનો દિવસ પસંદ કરાયો હતો. એજ રીતે અહીં પણ શનિવાર પસંદ કરાયો છે. સાથોસાથ ભીડવાળા વિસ્તાર તથા બજાર વિસ્તારને પસંદ કરવામાં આવ્યા છે. ચોંકવનારી વિગત તો એક છે કે, આ બંને બ્લાસ્ટ સાંજના સમયે કરવામાં આવ્યા છે કે જે સમયે મોટાભાગના લોકો નોકરી ધંધાના સ્થળે નીકળી પોતાના ઘરે જતા હોય કે અન્ય લોકો ખરીદી કરવા આવ્યા હોય.

દિલ્હીમાં થયેલા બ્લાસ્ટની વિગત
પહેલો ધમાકો કાર્નોલ પેલેસના ગોપાળદાસ બિલ્ડીંગમાં 6-10 કલાકે
બીજો ધમાકો કરૌલ બાગમાં 6-20 કલાકે ધમાકો થયો
ત્રીજો ધમાકો ગ્રેટર કૈલાસ-1માં 6-40માં થયો

અમદાવાદમાં પણ શનિવારે આજ રીતે સાંજે એક પછી એક 17 ધમાકા થયા હતા.
6-30 મણીનગર ચાર રસ્તા પાસે
6-30 રાયપુર ચકલામાં બે ધમાકા
6-30 બાપુનગર ડાયમંડ માર્કેટ
6-35 સારંગપુર ચકલા
6-35 મણીનગર બસ સ્ટેન્ડ
6-35 જવાહર ચોક
6-35 ઇસનપુર ગોવિંદવાડી
6-45 સારંગપુર સર્કલ
6-42 બાપુનગર ડાયમંડ માર્કેટ
6-45 નરોડા ગેલેક્સી સિનેમા
7-52 મણીનગર એલ.જી હોસ્પિટલ
7-52 સરખેજ જુહાપુરા રોડ
7-54 સિવિલ હોસ્પિટલ ટ્રોમા સેન્ટર
9-30 ગોતા-વડસર રોડ

મૃતકોનાં પરિજનોને આઠ લાખનું વળતર

Sun, 14 Sep 2008 11:44:29 +0530

દિલ્હીમાં શનિવારે મૃત્યુ પામેલા નાગરિકોનાં પરિજનોને કેન્દ્ર અને દિલ્લી સરકાર આઠ લાખની આર્થિક મદદ કરશે.

વિસ્ફોટમાં માર્યા ગયેલાને દિલ્લી સરકાર ત્રણ લાખ, જ્યારે કેન્દ્ર સરકાર પાંચ લાખ રૂપિયા આપશે, તેવી જાહેરાત ગૃહમંત્રી શિવરાજ પાટીલ અને મુખ્યમંત્રી શીલા દીક્ષિતે કરી હતી.

જ્યારે ઘાયલ થયેલાઓને રૂ.50 હજારની મદદ કરવામાં આવશે. બ્લાસ્ટ બાદ શીલા દીક્ષિત, શિવરાજ પાટીલ અને સોનિયા ગાંધી ઘાયલોની ખબર અંતર પુછવા હોસ્પીટલની મુલાકાત લીધી હતી.