મહાશિવરાત્રિ 08

આજે મહાપર્વ મહાશિવરાત્રિની ભવ્ય ઉજવણી

Thu, 06 Mar 2008 12:05:03 +0530

W.D

ભોળાનાથ મહાદેવની આરાધના માટેના મહાપર્વ મહાશિવરાત્રિની આજે ભવ્ય ઉજવણી શરૂ થઇ ગઇ છે. તેમાં અમદાવાદ ખાતે તો મહાદેવની સૌથી મોટી શિવલીંગ બનાવીને તેને ફૂલોથી સજીને દૂધની ગંગા વહેડાવવામાં આવી રહી છે. જ્યારે ગુજરાતના જિલ્લાઓમાં આવેલાં સુપ્રસિદ્ધ શિવાલયોને આ પવિત્ર પર્વની ઉજવણી માટે સજજ કરી દેવાયા છે. ખાસ કરીને અમદાવાદ, જુનાગઢ, સોમનાથ, દ્વારકા વગેરે.. ખાતે આવેલાં પ્રાચીન શિવાલયો ખાતે મહાશિવરાત્રિ પર્વે શ્રદ્ધાળુઓનો જબરદસ્ત ધસારો રહેતો હોઈ શિવભકતો ભોળાનાથનાં દર્શન નિર્વિઘે કરી શકે તે હેતુથી વિશેષ વ્યવસ્થા ગોઠવવામાં આવી છે.

સોમનાથ ટ્રસ્ટના પીઆરઓ તેમજ વ્યવસ્થાપકના જણાવ્યા અનુસાર શિવરાત્રિ નિમીત્તે સોમનાથ મંદિરમાં વહેલી સવારે પાંચ વાગ્યાથી પૂજા અર્ચન શરૂ થઈ છે. સવારે નવ વાગ્યાથી હોમાત્મક લઘુરૂદ્ર યજ્ઞ પણ થશે. સાંજે સોમનાથ દાદાની બેન્ડવાજા સાથે નગરયાત્રા નિકળશે. સાંજે 7-30 કલાકથી મદિરમાં રાત્રીપૂજન શરૂ થશે જે રાત્રીના 2-30 કલાક સુધી ચાલશે. શિવરાત્રીના બીજા દિવસે તા.7મીએ અમાસ હોવાથી વહેલી સવારે 3 વાગ્યાથી મંદિર દર્શનાર્થે ખુલી જશે.

Mr. Akshesh Savaliya

W.D

6 માર્ચને ગુરુવારે મહાશિવરાત્રિ પર્વની ગુજરાતના જિલ્લાઓમાં આવેલાં સુપ્રસિદ્ધ શિવાલયોમાં શ્રદ્ધાપૂર્વક ઉજવણી કરાશે. આ પર્વ પૂર્વે ગુજરાતના વિવિધ શહેરમાં આવેલાં કાશીવિશ્વનાથ મહાદેવ, કામનાથ મહાદેવ, રામનાથ મહાદેવ, મોટનાથ મહાદેવ સહિત નવનાથ મંદિરો ઉપરાંત ગુજરાતના વિવિધ વિસ્તારમાં આવેલા શિવમંદિરોમાં શિવરાત્રિ પર્વની ઉજવણી માટેની તડામાર તૈયારીઓ કરી દેવામાં આવી છે. શિવ મંદિરોને રંગરોગાન દ્વારા નવો ઓપ અપાયો છે. એટલું જ નહીં રંગબેરંગી તોરણો અને ઝળાંહળાં થતી રોશનીથી શણગારવામાં આવ્યા છે. સાથે સાથે મંદિરના ટ્રસ્ટીઓ દ્વારા શિવરાત્રિ પર્વે શિવ ભકતો ધક્કામુક્કી વગર શિવલિંગ ઉપર અભિષેક અને બિલિપત્ર પૂજામાં ભાગ લઇ શકે તે માટેનું આયોજન કરાયું છે. આ ઉપરાંત દર્શન માટે સાંજના સમય પછી થતા ધસારાને ખાળવા માટે મંદિરોમાં લોખંડની રેલિંગ લગાડી દેવામાં આવી છે.

મહાશિવરાત્રિ પર્વ પ્રસંગે રાજ્યનાં શિવમંદિરોમાં દિવસ દરમિયાન રુદ્રી, લઘુરુદ્ર, મહારુદ્ર પૂજા તેમજ સાંજના સમયે ઘીના કમળના દર્શન, મહાઆરતી અને રાત્રિના સમયે પણ અભિષેક પૂજા ઉપરાંત કેટલાક મંદિરોમાં ભજનસંઘ્યા અને ડાયરાના કાર્યક્રમો યોજવામાં આવ્યા છે.

કામનાથ મહાદેવ મંદિર ખાતે સવારે 4વાગ્યાથી બપોરે 12 વાગ્યા સુધી ભકતો સ્વહસ્તે પૂજા કરી શકે તે માટેની વ્યવસ્થા ગોઠવાઈ છે. બપોરે 12 વાગ્યા પછી ભગવાન સોમનાથદાદા તેમજ પાર્વતી માતાના શણગારનાં દર્શન કરી શકાશે તેમ મંદિરના મહંત ભગવાનગિરિએ જણાવ્યું હતું.

જ્યારે વડોદરા જિલ્લાના નર્મદા નદીને કાંઠે આવેલા કરનાળી સ્થિત શ્રી કુબેરભંડારેશ્વર મહાદેવ ખાતે શિવરાત્રિના દિવસે વહેલી સવારથી મોડી રાત્રિ સુધી ભકતોનું ઘોડાપૂર ઉમટી પડતું હોઈ મંદિરના ટ્રસ્ટીઓ દ્વારા દર્શનાર્થીઓ માટે દર્શન તેમજ પૂજન માટેની વ્યવસ્થા કરાઈ છે.

અહીં ચાર પ્રહરની પૂજા તેમજ દિવસ દરમિયાન લઘુરુદ્રના કાર્યક્રમો યોજવામાં આવ્યા છે. કુબેરેશ્વરમાં શિવરાત્રિ નિમીત્તે કુબેર ભંડારી મંદિરમાં વહેલી સવારે પાંચ વાગ્યાથી પૂજા અર્ચન શરૂ થઈ જશે, જયારે દક્ષિણના સોમનાથ તરીકે ખ્યાતિ પામેલા ભરૂચ જિલ્લાના જંબુસર તાલુકાના કંબોઈ ગામે દરિયામાં મહી-સાગર સંગમ તીર્થ ક્ષેત્ર સ્થિત શ્રી સ્તંભેશ્વર મહાદેવ સ્થળે શિવરાત્રિ પ્રસંગે વિશેષ આયોજન કરાયું છે. સ્તંભેશ્વર મહાદેવને દરિયા દેવ દ્વારા દિવસમાં બે વખત કુદરતી રીતે જલાભિષેક થતો હોઈ આ દ્રશ્ય જોવા હજારોની સંખ્યામાં લોકો ઉમટી પડે છે.

સોમનાથમાં મહાશિવરાત્રિની ભવ્ય ઉજવણી

Thu, 06 Mar 2008 11:19:36 +0530

Mr. Akshesh Savaliya

W.D

ભારતના બાર જયોતિર્લિંગો પૈકીના પ્રથમ એવા દેવાધિદેવ સોમનાથ મહાદેવના મંદિરમાં આજે ગુરુવારે મહાશિવરાત્રિના પાવનકારી પર્વની ભાવભેર ભવ્ય ઉજવણી કરવામાં આવી રહી છે. વેરાવળમાં ગઇકાલથી જ યાત્રાળુઓનો પ્રવાહ શરૂ થઈ ગયો હતો.

ધર્મનગરી વેરાવળ-પાટણ શિવમય બની ગયું છે. બીજી તરફ આજે થનારા ભાવિકોના ધસારાને પહોંચી વળવા સોમનાથ ટ્રસ્ટ દ્વારા પર્યાપ્ત વ્યવસ્થા કરવામાં આવી છે. સુરક્ષા વ્યવસ્થા પણ જડબેસલાક કરાઈ છે. મહાશિવરાત્રિ પર્વ નિમિત્તે થનાર પૂજા-અર્ચના તથા અન્ય ધાર્મિક કાર્યક્રમોનું ટીવી પરથી જીવંત પ્રસારણ કરવામાં આવશે.

ભોળેનાથ ભગવાન શંકર જયાં સાક્ષાત બિરાજમાન છે એવા સોમનાથમાં મહાશિવરાત્રિ પર્વની ઉજવણીનો થનગનાટ ચરમસીમાએ પહોંચ્યો છે. મંદિરના ભવ્ય મુખ્ય પ્રવેશદ્વારને રોશનીથી શણગારવામાં આવ્યું છે. આજે નવમંદિરના તમામ શિલ્પ સ્તંભોને ઈગ્લિશ જલબેરા પુષ્પો વડે શણગારવામાં આવશે. આ ફૂલો સુરજમુખી તથા કમળના આકારના નવરંગના હોવાથી મંદિરના સૌંદર્યમાં મુગ્ધતાના રંગો ભરી દેશે.

મહાશિવરાત્રિ નિમિત્તે સોમનાથ મંદિરમાં ભાવિકો માટે પૂરતી વ્યવસ્થા કરવામાં આવી છે. ખાસ હાઈમાસ્ક વીજ ટાવર ઊભો કરીને તોરણ ઉપહાર ગ્રહ પાસે અજવાળાં પાથરવામાં આવ્યા છે. શિવજીના આ પાવનકારી પર્વના દિવસે શિવજીની રવાડી, પાલખીયાત્રા નીકળશે. સુપ્રસિઘ્ધ કથાકાર પૂ. મોરારિબાપુ પણ આ પ્રસંગે સોમનાથ મંદિરે પૂજન-અર્ચના કરશે એમ જાણવા મળ્યું છે.

Mr. Akshesh Savaliya

W.D

સોમનાથ ટ્રસ્ટના જનરલ મેનેજર કમલેશભાઈ રાવલના જણાવ્યા મુજબ પૂજન-અર્ચના તથા અન્ય કાર્યક્રમોનું ગુજરાતી ટી.વી. દ્વારા જીવંત પ્રસારણ કરવામાં આવશે. જેને કારણે દેશ-વિદેશમાં લાખો લોકો ઘર બેઠાં સોમનાથ દાદાના દર્શનનો લાભ લઈ શકશે.

અંત્રે ઉલ્લેખનીય છે કે, ગત વર્ષે પ્રથમ વખત આ કાર્યક્રમોનું જીવંત પ્રસારણ કરવામાં આવ્યું હતું અને એ પ્રયોગને ભવ્ય સફળતા મળી હતી. દરમિયાનમાં ગઇકાલ સાંજથી જ સોમનાથ - વેરાવળમાં યાત્રિકોનો પ્રવાહ શરૂ થઈ ગયો હતો. આજે લાખો લોકો ઉમટી પડશે અને સોમનાથ તિર્થ બમ બમ ભોલે અને હર હર મહાદેવ તથા જય સોમનાથના પવિત્ર નાદથી ગુંજી ઊઠશે.

આજના દિવસે સોમનાથ મંદિરમાં -
મહામૃત્યુંજય મંત્રના જાપ માટે ખાસ કુટિરો, જાપ માટે રૂદ્રાક્ષની માળાઓ અપાશે, 11 લાખ મંત્ર લખી જમા કરાવવા એ.ટી.એમ. જેવી વ્યવસ્થા, પાંચ હજાર કિલો ફરાળી પ્રસાદ, મંદિરની અંદર ખાસ તૈયાર કરાયેલ શિવદર્શન ગેલેરી શ્રદ્ધાળુઓને જોવા મળશે.

ભવનાથ મેળો હર હર મહાદેવથી ગાજ્યો

Wed, 05 Mar 2008 18:46:15 +0530

જૂનાગઢ(એજંસી) હર...હર...મહાદેવઃ જુનાગઢના ભવનાથ મંદિ‌રે મહાશિવરાત્રી મેળામાં આજના દિવસે શ્રદ્ધાળુઓની ભીડ જામી છે. દ્ગિંબર સાધુઓનાં ધુણા ધખધખી રહ્યા છે. અંગે ભભૂતી લગાડી નાગા સાધુઓ ચલમનાં કશ ખેંચી રહ્યા છે. મહા શિવરાત્રીએ દ્ગિંબર સાધુની રવેડીયાત્રા યોજવા તડામાર તૈયારીઓ થઈ રહી છે. દ્ગિંબર સાધ્‍વીજીઓ પણ રવેડીયાત્રામાં દર વર્ષે જોડાઈ છે.

ભાવિકોની પાંખી હાજરી વચ્‍ચે મહાશિવરાત્રીનો મેળો આજે પાંચમાં દિવસમાં પ્રવેશ્‍યો છે. આજથી ભાવિકોનો ભવનાથ તળેટી તરફ ભારે પ્રવાહ વહેતો શરૂ થઇ ગયો છે. મેળાનાં અંતિમ દિવસે જ શ્રદ્ધાળુ લોકો નાગાસાધુઓના રવેડી સરઘસના દર્શન કરવા ભારે ઘસારો કરશે તેવી સંભાવના છે. મહાશિવરાત્રીનાં દિવસે પૂ.ભારતી આશ્રમ ખાતે નવનિર્મિત ભોજનાલયનું ઉદ્‌ઘાટન મુખ્‍યમંત્રી નરેન્‍દ્ર મોદીના હસ્‍તે થનાર છે.

મુખ્‍યમંત્રીના સીધા ભવનાથનાં આગમન માટે મંગલનાથ બાપુની જગ્‍યાનાં પાછળનાં મેદાનમાં હેલીપેડ બનાવવાની કામગીરી પણ યુદ્ધનાં ધોરણે ચાલી રહી છે. જિલ્લા વહીવટી તંત્ર દ્વારા મેળા દરમ્‍યાન સાંસ્‍કૃતિક કાર્યક્રમોનું આયોજન કરવામાં આવ્‍યું છે.

ગત તા.3ના નાણામંત્રી વજુભાઈ વાળાએ સાંસ્‍કૃતિક કાર્યક્રમને ખુલ્લો મુકયો હતો. નૃત્‍ય ભારતી સંસ્‍થા અમદાવાદ‌-દ્વારા અદ્ભૂત શિવ શકિત નૃત્‍ય નાટીકા પ્રસ્‍તુત કરાયુ હતું જે નિહાળી અસંખ્‍ય લોકો મંત્રમુગ્‍ધ બન્‍યા હતાં. શિવરાત્રીનો મેળો જૂનાગઢની બજાર વેપાર ધંધામાં અનેરી રોનક લાવી દે છે. અંદાજે પાંચ થી આઠ લાખ લોકો શિવરાત્રીનો મેળો માણવા આવે છે. રીક્ષા ચાલક, ખાનગી ટ્રાવેલ્‍સો, એસટી, રેલ્‍વે હોટલ-રેસ્‍ટોરા, શાકભમાજી, કરીયાણાના વેપારી વિગેરેનાં આ પાંચ દિવસીય મેળામાં ખીલી ઉઠે છે. અંદાજે રૂ. 50 કરોડથી વધુનું ટર્ન ઓવર થાય છે.
નાણામંત્રી વજુભાઈ વાળાએ વહીવટી તંત્ર દ્વારા તૈયાર કરાયેલ જૂનાગઢ જિલ્લાની પાંચ વર્ષની વિકાસ ગાથાને આવરી લેતી "વિકાસ વાટીકા'' પુસ્‍તીકાનું પણ વિમોચન કર્યુ હતું. યાત્રિકોનો પ્રવાહ વધ્‍યો છે અને ભજન-ભોજનથી ઉતારામાં ધમધમાટ

આજે બેલાખ ભાવિકોએ મેળાની રંગત માણી હતી. જયારે ચાર દિવસો દરમ્યાન આશરે સાડાચાર લાખ શ્રઘ્ધાળુઓ મેળામાં આવ્યા હોવાનો અંદાજ છે.

મહાશિવરાત્રિના મેળામાં છેલ્લા ત્રણ દિવસથી ભાવિકોની હાજરી પાંખી રહી હતી. પ્રથમ દિવસે 50 હજાર ભાવિકો બીજા દિવસે એક લાખ, ત્રીજા દિવસે એક લાખ તેમજ ગઇકાલે ચોથા દિવસે બે લાખ ભાવિકો મેળામાં આવ્યા હોવાનો અંદાજ છે.

મેળામાં અન્નાક્ષેત્રો, ઉતારા અને ભજન મંડળીઓ છેલ્લા ચાર દિવસથી કાર્યરત છે. આજે મેળામાં ભવનાગર, જામનગર, અમરેલી તેમજ રાજકોટના ભાવિકો પણ ઉમટી પડયા હતા.

ભાવિકોને વિનામૂલ્યે નિદાન, સારવાર અને દવા

ભવનાથ વિસ્તારમાં શિવરાત્રિના મેળામાં ઠેર ઠેર થી આવતા ભાવિકો ને લેઉવા પટેલ સમાજ ખાતે રાજકોટના બાબુેભાઈ લક્ષ્મણભાઈ ખુંટ દ્વારા દવાખાનું ખોલવામાં આવ્યું છે. જેમાં નિદાન, સારવાર થી માંડી દવાઓ વિનામૂલ્યે આપવામાં આવે છે.

શિવ સ્તુતિ

Tue, 04 Mar 2008 15:35:55 +0530

W.D

શંભુ શરણે પડી, માંગુ ઘડી રે ઘડી,
કષ્ટ કાપો, દયા કરી દર્શન શિવ આપો.
તમે ભક્તોના દુ:ખ હરનારા,
શુભ સૌનું સદા કરનારા;
હુ તોમંદ મતિ, તારી અકળ ગતિ,
કષ્ટો કાપો, દયા કરી દર્શન શિવ આપો. શંભુ..
આપો ભક્તિમાં ભાવ અનેરો,
શિવ ભક્તિમાં ધર્મ ઘણેરો;
પ્ર્ભુ તમે પૂજો દેવી પાર્વતી પૂજો,
કષ્ટો કાપો દયા કરી દર્શન શિવ આપો.શંભુ..
અંગે ભસ્મ સ્મશાનની ચોળી,
સંગે રાખો સદા ભૂત ટોળી;
ભાલે તિલક કર્યું, કંઠે વિષને ધર્યું,
અમૃત આપો, દયા કરી દર્શન શિવ આપો. શંભુ..
નેતિ નેતિ જ્યાં વેદ કહે છે,
મારુ ચિતડુ ત્યાં જાવા ચહે છે,
સારા જગમાં છે તુ, વસુ તારામાં હુ,
શક્તિ આપો, દયા કરી દર્શન શિવ આપો. શંભુ..
હુ તો એકલ પંથી પ્રવાસી,
છતાં આત્મા કેમ ઉદાસી;
થાક્યો મથી રે મથી, કારણ મળતુ નથી,
સમજણ આપો, દયા કરી દર્શન શિવ આપો. આપો..
આપો દ્રષ્ટીમાં તેજ અનોખું,
સારી સૃષ્ટીમાં શિવરૂપ દેખું;
મારા મનમાં વસો, આવી હૈયે હસો,
શાંતિ સ્થાપો,દયા કરી દર્શન શિવ આપો. શંભુ..
ભોળૉઆ શંકર ભવ દુ:ખ કાપો,
નિત્ય સેવાનું શુભ ધન મને આપો,
ટાળો માન-મદ, ગાળો સર્વ સદા,
ભક્તિ આપો, દયા કરી દર્શન શિવ આપો. શંભુ..
અંગે શોભે છે રુદ્રની માળા,
કંઠે લટકે છે ભોરિંગ કાળા,
તમે ઉમિયા પતિ, અમને આપો મતિ;
કષ્ટ કાપો, દયા કરી દર્શન શિવ આપો. શંભુ..

પ્રદોષ નૃત્ય

Tue, 04 Mar 2008 15:31:30 +0530

W.D

એક સમયની વાત છે ભગવાન શિવના તાંડવ નૃત્યમાં સમ્મેલિત થવા માટે બધા જ દેવગણ કૈલાસ પરવત પર હાજર થયા.

જગતજનની માતા ગૌરી ત્યાં દિવ્ય રત્નસિહાસન પર બેસીને પોતાની અધ્યક્ષતામાં તાંડવનું આયોજન કરાવવા માટે ઉપસ્થિત હતાં.

દેવર્ષી નારદ પણ તે નૃત્ય કાર્યક્રમમાં સમ્મેલિત થવા માટે ત્રણેય લોકનું પરિભ્રમણ કરીને ત્યાં પહોચ્યાં હતાં. થોડીવારમાં ભગવાન શિવે ભાવ-વિભોર થઈને તાંડવ નૃત્ય શરૂ કર્યું.

બધા જ દેવી અને દેવતાઓ તે નૃત્યમાં સહયોગી થઈને જુદા જુદા પ્રકારના વાજિંત્રો વગાડવા લાગ્યાં. વીણા વાદિની મા સરસ્વતી વીણા વાદન કરવા લાગ્યાં, વિષ્ણુ ભગવાન મૃદંગ વગાડવા લાગ્યાં, બ્રહ્માજી હાથેથી તાલ આપવા લાગ્યાં અને લક્ષ્મીજી ગાવા લાગ્યાં.

બીજા દેવો ગંધર્વ, કિન્નર, યક્ષ, ઉરગ, પન્નગ, સિધ્ધ, અપ્સરાઓ, વિદ્યાધર વગેરે ખુબ જ ભાવ વિભોર થઈને ભગવાન શિવની ચારે તરફ થઈને તેઓની સ્તુતિમાં તલ્લીન થઈ ગયાં.

ભગવાન શિવે તે પ્રદોષકાળમાં તે બધી જ દિવ્ય વિભૂતિઓની સામે ખુબ જ અદભુત, લોક-વિસ્મયકારી તાંડવ નૃત્યનું પ્રદર્શન કર્યું. તેઓના અંગ-સંચાલન-કૌશલ, મુદ્રા-લાઘવ, પગ, હાથ, કમર, ગરદનની સામે સુનુશ્ચિત વિલોલ-હિલ્લોલના પ્રભાવથી બધાના મન અને નેત્રો એકદમ ચંચળ થઈ ગયાં.

બધાએ નટરાજ ભગવાન શિવજીના આ નૃત્યનાં વખાણ કર્યાં. ભગવતી મહાકાળી તો તેમના પર ખુબ જ પ્રસન્ન થઈ ગયાં. તેઓએ શિવજીને કહ્યું કે ભગવાન આજના તમારા આ નૃત્યથી મને ઘણો આનંદ થયો છે તેથી હુ ઇચ્છુ છુ કે તમે મારી જોડેથી કઈક વરદાન માંગો.

તેમની વાતો સાંભળીને લોકહિતકારી આશુતોષ ભગવાન શિવે નારદજીની પ્રેરણાથી કહ્યું- હે દેવી ! આ તાંડવ નૃત્યના જે આનંદથી તમે અને દેવગણો તેમજ દિવ્ય લોકના પ્રાણીઓ જેનાથી આનંદીત થઈ રહ્યાં છે તેના આનંદથી પૃથ્વીના પ્રાણીઓ વંચીત રહી જાય છે.

આપણા ભક્તોને પણ આ સુખ પ્રાપ્ત નથી થતું. તેથી તમે એવું કરે કે પૃથ્વીના પ્રાણીઓને પણ આના દર્શન પ્રાપ્ત થાય. પરંતુ હવે હુ તાંડવથી મુક્ત થઈને ફકત રાસ જ કરવા માંગું છુ.

ભગવાન શિવની વાત સાંભળીને તાત્કાલીક ભગવતી મહાકાળીએ બધા જ દેવતાઓને જુદા જુદા રૂપોમાં પૃથ્વી પર અવતાર લેવાનું કહી દીધું. ભગવાન પોતે પણ શ્યામસુંદર શ્રી કૃષ્ણનો અવતાર લઈને વૃદાવનમાં પધાર્યા. ભગવાન શ્રી શિવજીએ વ્રજમાં શ્રી રાધાના રૂપે અવતાર ગ્રહણ કર્યો હતો. અહીંયા આ બંન્નેએ મળીને દેવદુર્લભ,અલૌકિક રાસ-નૃત્યનુ આયોજન કર્યું હતું.

ભગવાન શિવની નટરાજની ઉપાધી અહી શ્રી કૃષ્ણને પ્રાપ્ત થઈ. પૃથ્વીના બધા જ પ્રાણીઓ આ રાસને જોઇને આનંદ-વિભોર થઈ ગયાં. અને ભગવાન શિવની ઇચ્છા પૂર્ણ થઈ ગઈ.

શિવજીની આરતી

Tue, 04 Mar 2008 15:25:23 +0530

W.D

જય શિવ ઓંકારા, ભજ જય શિવઓંકારા
બ્રહ્મા વિષ્ણુ સદાશિવ (2) અર્ધાગી ધારા.
ॐ હર હર હર મહાદેવ
અકાનન ચતુરાનન, પંચાનન રાજે, શિવ પંચાનન...
હંસાનન ગરૂડાસન (2) વૃષવાહન સાજે, જય શિવ
દો ભુજ ચાર ચતુર્ભુજ, દસ ભુજ અતિ સોહે, શિવ દસ ભુજ...
તીનો રૂપ નિરખતાં (2) ત્રિભુવન જન મોહે, જય શિવ
અક્ષમાલા વનમાલા રુણ્ડમાલા ધારી, શિવ રુણ્ડમાલા...
ચંદન મૃગમદ સોહે (2) ભાલે શુભ કારી, ॐ જય શિવ
શ્વેતાંબર પીતામ્બર, વાધામ્બર અંગે, શિવ વાઘામ્બર...
સનકાદિક બ્રહ્માદિક (2) ભુતાદિક સંગે, ॐ જય શિવ
લક્ષ્મીવર ગાયત્રી, પાર્વતી સંગે, શિવ પાર્વતી..
અર્ધાંગી અરુ ત્રિભંગી (2) સિર સોહત ગંગે, ॐ જય શિવ
કરકે મધ્ય કમંડલ, ચક્ર ત્રિશૂલ ધર્તા, શિવ ચક્ર..
જગકર્તા, જગભર્તા (2) જગકા સંહર્તા, ॐ જય શિવ
બ્રહ્મા વિષ્ણુ સદાશિવ જાનત અવિવેકા, શિવ જાનત..
પ્રણવ અક્ષર મધ્યે (2) યે તીનો એકા, ॐ જય શિવ
ત્રિગુણ શીવજી કી આરતી, જો કોઇ ગાવે, શિવ જો કોઇ....
કહત શિવાનન્દ સ્વામી ! (2) મનવાંછિત ફલ પાવેં, ॐ જય શિવ

શિવને પ્રિય શ્રાવણ માસ

Tue, 04 Mar 2008 15:20:01 +0530

W.D

ભગવાન શિવના ભારતમાં બાર જ્યોતિર્લીગ છે. શિવપુરાણમાં આ બધા જ જ્યોતિર્લીંગનો ઉલ્લેખ છે. આ બાર જ્યોતિર્લીંગના દર્શન કરવાથી બધા જ તીર્થોનું ફળ પ્રાપ્ત થાય છે.

પદ્મ પુરાણના પાતાળ ખંડના આઠમા અધ્યાયમાં જ્યોતિર્લીગો વિશે કહેવામાં આવ્યું છે કે જે મનુષ્ય આ દ્વાદશ જ્યોતિર્લિગના દર્શન કરે છે તેની બધીજ મનોકામનાઓ પૂર્ણ થઈ જાય છે. સ્વર્ગ અને વૈભવ જેમની કૃપાથી પ્રાપ્ત થાય છે.

શિવના ત્રિશુળની એક ટોચ પર આખા કાશી વિશ્વનાથની નગરીનો ભાર છે. પુરાણોમાં એવું વર્ણન છે કે ગમે તેવો પ્રલય આવે છતાં પણ કાશીને કોઇ પણ પ્રકારનું નુકશાન નથી થતું.

ભારતમાં શિવને લગતાં ઘણા બધા ઉત્સવો ઉજવવામાં આવે છે. જેમાં શ્રાવણ માસ પણ તેનું વિશેષ મહત્વ રાખે છે. આખા શ્રાવણ માસ દરમિયાન ચાર સોમવાર, એક પ્રદોષ તેમજ એક શિવરાત્રી આ બધા યોગ એકસાથે શ્રાવણ મહિનામાં ભેગા થાય છે તેથી તે વધારે ફળ આપનાર છે. આ મહિનાના દરેક સોમવારે શિવમૂઠ ચડાવવામાં આવે છે. જે આ પ્રકારે છે-

પહેલા સોમવારે કાચા ચોખા એક મુઠ્ઠી, બીજા સોમવારે સફેદ તલ એક મુઠ્ઠી, ત્રીજા સોમવારે આખા મગ, ચોથા સોમવારે જવ એક મુઠ્ઠી.

મહિલાઓ શ્રાવણ માસમાં વિશેષ પૂજા અર્ચના તેમજ વ્રત પોતાના પતિની લાંબી ઉંમર માટે કરે છે. અને તેમાંય વળી બધા જ વ્રતોમાંથી સોળ સોમવારનું વ્રત ખુબ જ શ્રેષ્ઠ છે. આ વ્રતને વૈશાખ, શ્રાવણ, કારતક, અને માગશર મહિનાના કોઇ પણ સોમવારથી ચાલુ કરી શકાય છે. આ વ્રતની સમાપ્તી સત્તરમા સોમવારે સોળ દંપત્તીને ભોજન તેમજ કોઇ બીજું દાન આપીને થાય છે.

W.D

શિવની પૂજામાં બીલીપત્રનું ખુબ જ મહત્વ છે. શિવ દ્વારા વિષપાન કરવાથી શિવના મસ્તક પર પાણીની ધારથી જળાભિષેક ભક્તો દ્વારા કરવામાં આવે છે. શિવે ગંગાને પોતાના મસ્તક પર ધારણ કર્યાં છે.

શિવનો અગીયારમો અવતાર હનુમાનના રૂપમાં થયો હતો. આખા શ્રાવણમાસ દરમિયાન શિવભક્તો દ્વારા શિવપુરાણ, શિવલીલામૃત, શિવ કવચ, શિવ ચાલીસા, શિવ પંચાક્ષર મંત્ર, શિવ પંચાક્ષર સ્ત્રોત, મહામૃત્યંજય મંત્રનો પાઠ તેમજ જપ કરવામાં આવે છે. શ્રાવણ માસમાં આ કરવાથી વધું ફળ મળે છે.

કાશી વિશ્વનાથ

Tue, 04 Mar 2008 15:12:12 +0530

W.D

વારાણસી ભારતનું એક પ્રાચીન નગર છે. અહીંયાનું વિશ્વનાથ મંદિર પણ બાર જ્યોતિર્લીંગોમાંનું એક છે. આ મંદિર પાછળના એક હજાર વર્ષોથી અહીંયા આવેલું છે. કાશી વિશ્વનાથનું હિન્દુ ધર્મમાં એક વિશિષ્ટ મહત્વ છે. એક વખત આ મંદિરના દર્શન કરવાથી અને પવિત્ર ગંગા નદીમાં નહાવાથી મોક્ષની પ્રાપ્તિ થાય છે. દરેક માણસ જીવનમાં એક વખત અહીંયા દર્શન કરવા માટે આવવા માંગે છે. આ મંદિરનનાં દર્શન માટે શંકરાચાર્ય, રામકૃષ્ણ પરમહંસ, સ્વામી વિવેકાનંદ, સ્વામી દયાનંદ, તુલસીદાસ વગેરેનું આગમન થયેલું છે.

ગંગા કિનારે સાંકડી વિશ્વનાથ ગલીમાં આવેલુ વિશ્વનાથ મંદિર કેટલાય મંદિરો અને પીઠોથી ઘેરાયેલુ છે. અહીં એક કુવો પણ છે, જેને 'જ્ઞાનવાપી'ની સંજ્ઞા આપવામાં આવે છે, જે મંદિરના ઉત્તરમાં આવેલ છે. વિશ્વનાથ મંદિરની અંદર એક મંડપ અને ગર્ભગૃહ આવેલુ છે. ગર્ભગૃહની અંદર ચાંદીથી મઢેલા ભગવાન વિશ્વનાથનુ 60 સેંટીમીટર ઉંચુ શિવલિંગ આવેલુ છે. આ શિવલિંગ કાળા પત્થરનું બનેલુ છે. જો કે મંદિરનો અંદરનો ચોક એટલો વ્યાપક નથી પણ વાતવરણ બધી રીતે શિવમય છે.

બૈદ્યનાથ

Tue, 04 Mar 2008 14:07:41 +0530

આ જ્યોતિર્લીંગ ઝારખંડના દેવધર નામના સ્થાને આવેલ છે. ઘણા લોકો આને બૈદ્યનાથ પણ કહે છે. દેવઘર એટલે દેવતાઓનુ ઘર. બૈદ્યનાથ જ્યોતિર્લીંગ અહીં આવેલું છે તે કારણે આને દેવઘર નામ મળેલ છે. આ જ્યોતિર્લીંગ એક સિધ્ધપીઠ છે. કહેવામાં આવે છે કે અહીંયા આવનાર દરેક વ્યક્તિની મનોકામનાઓ પરિપૂર્ણ થાય છે. આ લિંગને કામના લિંગ પણ કહેવામાં આવે છે.

ધૃષ્ણેશ્વર

Tue, 04 Mar 2008 13:53:56 +0530

મહારાષ્ટ્રમાં ઔરંગાબાદની નજીક દૌલતાબાદથી 11 કિલોમીટર દૂર ધૃષ્ણેશ્વર મહાદેવનું મંદિર આવેલું છે. આ મંદિર પણ બાર જ્યોતિર્લીંગમાંનું એક છે. ઘણા લોકો આને ધૃશ્મેશ્વરના નામથી પણ ઓળખે છે. બૌધ્ધ સાધુઓ દ્વારા નિર્માણ કરાયેલ ઇલોરાની પ્રસિધ્ધ ગુફાઓ પણ આ મંદિરની પાસે જ આવેલી છે. આ મંદિરનું નિર્માણ દેવી અહલ્યાબાઇ હોલકરે કરાવ્યું હતું. શહેરથી દૂર આવેલ આ મંદિર સાદગીથી પરિપૂર્ણ છે.

રામેશ્વર જ્યોતિર્લીંગ

Tue, 04 Mar 2008 13:44:27 +0530

તમિલનાડુમાં આ જ્યોતિર્લીંગ સમુદ્રના કિનારે આવેલું છે. અહીયાં શ્રીરામે ભગવાન શંકરની પુજા કરી હતી. રાવણ સાથે યુધ્ધમાં કોઇ પાપ ન થાય તે કારણે ભગવાન રામે મંદિરમાં શિવજીની આરાધના કરી હતી. રામેશ્વર હિન્દુ ધર્મના મહત્વના તીર્થ સ્થળોમાંનું એક છે.

એવું કહેવાય છે કેજયારે રામચંદ્રજી લંકા ઉપર ચડાઈ કરવા જઈ રહ્યા હતા ત્યારે આ જગ્યા ઉપર તેમણે સમુદ્રકિનારાની રેતીથી શિવલિંગ બનાવીને તેનું પૂજન કર્યું હતું. આ જગ્યાએ રોકાઈને ભગવાન રામ પાણી પીતા હતા કે, આકાશવાણી થઈ કે મારી પૂજા કર્યા વિના પાણી પીવો છો?’ આ સાંભળીને ભગવાન શ્રીરામે રેતીથી શિવલિંગ બનાવીને પૂજા કરી, ભગવાન શિવ પાસે રાવણ ઉપર વિજય મેળવવાનું વરદાન માગ્યું હતું. તેમણે પ્રસન્ન થઈને શ્રીરામને વરદાન આપ્યું હતું. ભગવાન શિવે લોકોના કલ્યાણ માટે જયોતિર્લિંગના રૂપમાં ત્યાં નિવાસ કરવાની બધાની પ્રાર્થનાનો સ્વીકાર કર્યો હતો ત્યારથી અહીં તે જયોતિર્લિંગ સ્થપાયેલું છે.

જયારે ભગવાન શ્રીરામ રાવણનો વધ કરીને પાછા ફરતા હતા ત્યારે તેમણે તેમનો પહેલો પડાવ સમુદ્રની આ પાર ગંધમાદન પર્વત ઉપર નાખ્યો હતો. ત્યાં ઘણાબધા •ષિમુનિઓ તેમનાં દર્શન માટે તેમની પાસે આવ્યા. તે બધાનો સત્કાર કરતાં ભગવાન રામે તેમને કહ્યું કે, ‘પુલસ્ત્ય વંશના રાવણનો વધ કરવાને કારણે મારી ઉપર બ્રહ્મહત્યાનું પાપ લાગ્યું છે. આપ સર્વે મને તેમાંથી મુકિતનો ઉપાય બતાવો.’

ત્ર્યંબકેશ્વર

Tue, 04 Mar 2008 13:36:26 +0530

W.D

નાસિક (મહારાષ્ટ્ર) માં આવેલ ત્ર્યંબકેશ્વર જ્યોતિર્લીંગમાં બ્રહ્મા, વિષ્ણુ અને મહેશ ત્રણેયનો સમાવેશ છે આ જ આ જ્યોતિર્લીંગની મહાન વિશેષતા છે. અન્ય બધા જ જ્યોતિર્લીંગોમાં ફક્ત ભગવાન શિવ જ બિરાજમાન છે. ગોદાવરી નદી કિનારે આવેલું આ ત્ર્યંબકેશ્વર મંદિર કાળા પત્થરોથી બનેલું છે. મંદિરનું સ્થાપત્ય અદભુત છે. આ મંદિરમાં કાલસર્પ શાંતિ, ત્રિપિંડી વિધિ અને નારાયણ નાગબલીની પૂજા થાય છે. જેને ભક્તો અલગ અલગ માનતાઓ પુરી કરવા માટે કરાવે છે.

શિવરાત્રિ અને શ્રાવણ સોમવારના દિવસે અહિંયા ઘણાં બધાં શ્રદ્ધાળુઓ કતારો બનાવીને ઊભા હોય છે, ભક્તો વહેલી સવારે નાહ્યાં પછી તેમના આરાધ્ય દેવના દર્શન કરવા માટે આવે છે. અહિંયાની એક ખાસ વાત એ છે કે કાળ સર્પ યોગ અને નારાયણ નાગ બલી નામની ખાસ પૂજા-અર્ચના પણ થાય છે. જેના કારણે અહીં આખા વર્ષ દરમિયાન ઘણાં શ્રદ્ધાળુઓ અહિંયા આવતાં હોય છે

કેદારનાથ

Tue, 04 Mar 2008 13:15:59 +0530

કેદારનાથ ઉત્તરાખંડમાં હિમાચલ પર્વતના ખોળામાં કેદારનાથ મંદિરનો બાર જ્યોતિર્લીંગમાં સમાવવાની સાથે ચાર ધામમાં પણ તેનો સમાવેશ થાય છે. અહીંયા પ્રતિકૂળ જળવાયુંને કારણે આ મંદિર એપ્રિલથી નવેમ્બર સુધી જ દર્શન માટે ખુલ્લુ મુકવામાં આવે છે. પત્થરોથી બનેલ આ સુંદર મંદિર વિશે એવું કહેવામાં આવે છે કે આનું નિર્માણ વગેરે શંકરાચાર્યએ કરાવ્યું હતું.

સતયુગમાં ઉપમન્યુએ કેદારનાથની આરાધના કરી હતી. પાંડવોએ દ્વાપરયુગમાં કેદારનાથમાં રહીને ભગવાન શંકરની તપશ્ચર્યા કરી હતી. આ હિમાલયના ઉત્તરાખંડનાં મુખ્ય ચાર ધામ મનાય છે : બદરીનાથ, કેદારનાથ, ગંગોત્રી અને જમનોત્રી. એમાંય બદરીનાથ અને કેદારનાથનાં બે તીર્થધામ તો બહુ જ પ્રસિદ્ધ ને મહત્વનાં મનાય છે. યાત્રી એમના દર્શનની ઈચ્છા અવશ્ય રાખે છે. જીવનમાં વધારે નહિ તો એકવાર તો એ પવિત્ર તીર્થસ્થાનની મુલાકાત લેવાની ભાવના પ્રત્યેક ભારતવાસીના દિલમાં હોય છે જ.

ઓમકારેશ્વર

Tue, 04 Mar 2008 13:04:58 +0530

W.D

મધ્યપ્રદેશમાં આવેલું આ ઓમકારેશ્વર જ્યોતિર્લીંગ નર્મદા નદીના કિનારે આવેલું છે. આ સ્થાન પર ભગવાન શિવના બે મંદિરો છે- ઓમકારેશ્વર અને મમલેશ્વર. કહેવામાં આવે છે કે દેવતાઓની પ્રાર્થનાથી આ મંદિર બે ભાગમાં છુટુ પડી ગયું હતું.

ઓમકારેશ્વરની ખાસીયત એ છે કે અહીંયાનો પર્વત ॐ ના આકારમાં દેખાય છે. આ સાથે નર્મદા નદી પણ ॐ ના આકારે વહેતી દેખાય છે. ઓમકારેશ્વરની સાથે પણ ઘણી બધી દંતકથાઓ જોડાયેલી છે. કહેવામાં આવે છે કે શંકરાચાર્યના ગુરુ ઓમકારેશ્વરની એક ગુફામાં રહેતા હતાં. પૌરાણિક કથાઓ અનુસાર ઓમકારેશ્વરમાં વિધ્યાચલે પણ તપસ્યા કરી હતી.

- શિવ પુરાણના અનુસાર
ઓમકાર બાબા અને મમલેશ્વરજીને ઓમકારેશ્વરના સ્વામી માનવામાં આવે છે. દર સોમવારે આ બંને પોતાની પ્રજાના દુખ:સુખને જાણવા માટે નગર ભ્રમણ કરવા નિકળે છે. આ સમયે ઓમકારા ભગવાનને ગાજતાં-વાજતાં સાથે હોડીમાં બેસાડી મમલેશ્વર મંદિરવાળા ઘાટ પર લઇ જવામાં આવે છે. અને પછી અહીંથી બંને ભગવાનોની સવારી નગર ભ્રમણ માટે નિકળે છે.

ભીમશંકર

Tue, 04 Mar 2008 12:48:43 +0530

W.D

મહારાષ્ટ્રમાં પુનાની નજીક ભીમશંકર જ્યોતિર્લીંગ ભમવતી નદીના કિનારે આવેલ છે. આ જ્યોતિર્લીંગ વિશે પ્રચલિત કથા આ પ્રમાણે છે. સહ્યાદ્રી અને તેના આજુ બાજુનાં લોકોને ત્રિપુરાસુર નામનો રાક્ષસ તેની આસુરી શક્તિઓથી લોકોને હેરાન કરતો હતો. આ રાક્ષસથી મુક્તિ અપાવવા માટે ભગવાન શંકર અહીં ભીમકાય સ્વરૂપે પ્રગટ થયાં અને ત્રિપુરાસુરને યુધ્ધમાં હરાવ્યાં બાદ ભક્તોના આગ્રહને કારણે તેઓ ત્યાં જ્યોતિર્લીંગ સ્વરૂપે પ્રગટ થઇ ગયાં. એવી માન્યાતા છે કે યુધ્ધ સમયે ભગવાન શંકરના શરીરમાંથી જે પરસેવો નીકળ્યો હતો તેનાથી ભીમવતી નદીનો જન્મ થયો હતો.

મલ્લિકાર્જુન

Tue, 04 Mar 2008 12:44:04 +0530

આંધ્રપ્રદેશના કુનુર જીલ્લામાં કૃષ્ણા નદીના કિનારે મલ્લિકાર્જુન મંદિરમાં શ્રીસેલમ જ્યોતિર્લીંગ આવેલું છે. સ્કંદ પુરાણમાં એક આખો અધ્યાય શ્રીસેલાકમંદ આ જ્યોતિર્લીંગની મહિમાનું વર્ણન કરે છે. મલ્લિકાર્જુન મંદિર વિશે એક પ્રાચીન કથા છે જેના અનુસાર શિવગણ નંદીએ અહીયાં તપસ્યા કરી હતી. તેઓની તપસ્યાથી પ્રસન્ન થઈને ભગવાન શિવ અને પાર્વતીએ તેમને મલ્લિકાર્જુન અને બ્રહ્મારંભના રૂપમાં દર્શન આપ્યા હતાં. આ જ્યોતિર્લીંગનું વર્ણન મહાભારતમાં પણ છે. પાંડવોએ પાંચપાંડવ લિંગની સ્થાપના અહીયાં કરી હતી. ભગવાન રામે પણ આ મંદિરનાં દર્શન કર્યા હતાં. ભક્ત પ્રહલાદના પિતા હિરણ્યકશ્યપ પણ અહીંયા પૂજા અર્ચના કરતાં હતાં.

મહાકાલેશ્વર

Tue, 04 Mar 2008 12:41:19 +0530

W.D

ઉજ્જૈન (મધ્યપ્રદેશ) માં આવેલુ આ જ્યોતિર્લીંગ એકમાત્ર દક્ષિણામુખ જ્યોતિર્લીંગ છે. એટલા માટે આ જ્યોતિર્લીંગનું પૌરાણીક અને તાંત્રીક મહત્વ સૌથી વધુ છે. આ જ્યોતિર્લીંગ પણ સ્વંયંભૂ છે. મહાકાલ જ્યોતિર્લીંગના સાચા મનથી દર્શન કરનારને કદાપી મૃત્યું કે બીમારીનો ભય રહેતો નથી. હકીકતમાં મહાકાલ જ્યોતિર્લીંગને દેવતાની સાથે સાથે ઉજ્જૈનના રાજાના સ્વરૂપે પણ પૂજાય છે. આને ઉદ્વવની કથામાં અવંતિકાના રાજાના રૂપમાં પણ પ્રતિષ્ઠિત કરાયા છે.

અવંતિકાના રાજા વૃષભસેન ભગવાન શિવના અનન્ય ભક્ત હતાં. તેઓ પોતાનો સંપૂર્ણ સમય શિવ ભક્તિમાં પસાર કરતાં હતાં. એક વખત પડોશના રાજાએ અવંતિકા પર હુમલો કરી દીધો. વૃષભસેનની સેનાએ તે હુમલાને નિષ્ફળ કરી દીધો. ત્યારે આક્રમણકારી રાજાએ એક રાક્ષસ દુશનની મદદ લીધી જેને અદ્રશ્ય થવાનું વરદાન મળેલું હતું. દુશને અવંતિકા પર ખુબ જ આતંક મચાવ્યો. આ સમયે અવંતિકાના લોકોએ ભગવાન શિવને યાદ કર્યા ત્યારે ભગવાન શિવ ત્યાં સાક્ષાત પ્રગટ થયાં અને તેઓએ અવંતિકાની પ્રજાની રક્ષા કરી. ત્યાર બાદ રાજા વૃષભસેને ભગવાન શિવને અવંતિકામાં રહેવાની અને અવંતિકાના પ્રમુખ બનવાની વિનંતી કરી. રાજાની પ્રાર્થના સાંભળી ભગવાન શીવ ત્યાં જ્યોતિર્લીંગ સ્વરૂપે પ્રગટ થયાં. ભગવાન શિવને આજે પણ ઉજ્જૈનના શાસક માનવામાં આવે છે.

દૂષણ નામના દૈત્યના અત્યાચારથી જ્યારે ઉજ્જૈનના રહેવાસીઓ ત્રાસી થઈ ગયા, ત્યારે તેમણે પોતાની રક્ષા કરવા માટે શિવની આરાધના કરી. આરાધનાથી પ્રસન્ન થઈને ભગવાન શિવ જ્યોતિના રુપમાં પ્રગટ થયા. દૈત્યનો સંહાર કર્યો અને ભક્તોના આગ્રહથી લિંગના સ્‍વરૂપમાં ઉજ્જૈયિનીમાં પ્રતિષ્ઠિત થઈ ગયા. - શિવપુરાણમાં વર્ણવામાં આવેલી કથા અનુસાર.

નાગેશ્વર

Tue, 04 Mar 2008 12:31:41 +0530

W.D

દ્વારકામાં આવેલું આ જ્યોતિર્લીંગની ઋગ્વેદની કથા પણ ખુબ જ રોચક છે. શિવપુરાણમાં પણ આ જ્યોતિર્લીંગની કથાનું વર્ણન છે. દાસ્કા નામના એક રાક્ષસે નિરપરાધ એક શિવભક્ત સુપ્રીયાને કારાવાસમાં કેદ કરી દીધો હતો.

નિર્દોષ સુપ્રીયાએ પોતાની રક્ષા માટે ॐ નમ: શિવાય મંત્રનો જાપ કર્યો હતો. તેને જેલના બીજા કેદીઓને પણ આ મંત્રનો જાપ કરવાનું શિખવાડી દીધુ હતું. તે બધાની ભક્તિભાવનો પરિપૂર્ણ અવાજ સાંભળીને ભગવાન શિવ અહીંયા પ્રગટ થયાં હતાં અને તેઓએ દાસ્કા રાક્ષસનો અંત કર્યો હતો. ત્યાર બાદ તેઓએ જ્યોતિર્લીંગ સ્વરૂપે ત્યાં જ નિવાસ કર્યો હતો.

બાર જ્યોતિર્લિંગ

Tue, 04 Mar 2008 12:25:16 +0530

જ્યોતિર્લીંગ એટલે કે જ્યોતિનું બિંદુ. ભગવાન શંકર આ પૃથ્વી પર 12 સ્થળો પર સ્વયંભૂ પ્રગટ થયાં છે. આ બાર સ્થળોને જ્યોતિર્લીંગની સંજ્ઞા આપવામાં આવી છે.

આ બાર જ્યોતિર્લીંગના નામ છે- સોમનાથ, નાગેશ્વર, મહાકાલ, મલ્લિકાર્જુન, ભીમશંકર, ઓમકારેશ્વર, કેદારનાથ, વિશ્વનાથ, ત્ર્યંબકેશ્વર, ધૃષ્ણેશ્વર, રામેશ્વર, બૈદ્યનાથ.

સોમનાથ:-

W.D

સૌરાષ્ટ્ર (ગુજરાત) માં આવેલું આ સૌથી જૂનું અને મહત્વપૂર્ણ જ્યોતિર્લીંગ છે. આ જ્યોતિર્લીંગનું વર્ણન ઋગ્વેદમાં પણ છે. સોમનાથ મંદિર વિશે એવું કહેવામાં આવે છે કે સૌથી પહેલા આ મંદિરનું નિર્માણ ચંદ્રદેવે સોનાથી કરાવ્યું હતું ત્યાર બાદ રાવણે ચાંદીથી કરાવ્યું હતું. રાવણ બાદ ભગવાન શ્રીકૃષ્ણએ ચંદનની લાકડીઓથી કરાવ્યું હતું અને ત્યાર બાદ ભીમદેવે પત્થરથી આનું નિર્માણ કરાવ્યું હતું.

સોમનાથ મંદિર પર છ વખત આક્રમણકારીઓએ હુમલો કર્યો હતો. દરેક વખતે આ મંદિરનું પુનઃ નિર્માણ કરવામાં આવ્યું હતું. મંદિરના વર્તમાન ભવન અને પરિસરનું નિર્માણ શ્રી સોમનાથ ટ્રસ્ટે કરાવ્યું છે. આને સન 1995માં રાષ્ટ્રને સમર્પિત કરાયું હતું. સોમનાથનું મંદિર એ વાતની સાક્ષી પુરે છે કે સર્જનકર્તાની શક્તિ હંમેશા વિનાશકર્તાથી વધું હોય છે.

મહામૃત્યંજય જપ

Tue, 04 Mar 2008 12:10:31 +0530

ત્ર્યંબકમ યજામહે સુગન્ધિ પુષ્ટિવર્ધનમ
ઉર્વારૂકમિવ બન્ધનાન્મૃત્યોર્મુક્ષીય મામૃતાત.

W.D

મહામૃત્યુંજય મંત્ર જપવાથી અકાળ મૃત્યુનો ભય ટળી જાય છે અને આરોગ્યતાની પ્રાપ્તિ થાય છે. સ્નાન કરતી વખતે શરીર પર પાણી નાંખતા સમયે આ મંત્રનો જપ કરવાથી સ્વાસ્થ્યને લાભ થાય છે. દૂધને જોતા જોતા આ મંત્રનો જાપ કર્યા બાદ તે દુધને પીવાથી યૌવનની સુરક્ષામાં સહાયતા થાય છે. સાથે સાથે આ મંત્રનો જાપ કરવાથી ઘણી અડચણો પણ દૂર થાય છે. નીચે લખેલી પરિસ્થિતિની અંદર પણ આ મંત્રનો જાપ કરવામાં આવે છે.

1) કોઈ મોટા રોગથી પીડિત હોવા પર

2) જમીન-મિલ્કતના ભાગલાની સંભાવના હોય તો

3) રાજ્ય કે મિલ્કતના જવાનો ભય હોય

4) ધન-હાનિનો ભય હોય

5) નાડીદોષ અને ષડષ્ટ વગેરે આવતાં હોય

6) મન ધાર્મિક કાર્યોથી વિમુક્ત થઈ ગયું હોય

7) રાષ્ટ્રનું વિભાજન થઈ ગયું હોય

8) મનુષ્યની અંદર પરસ્પર ઝઘડા થઈ રહ્યાં હોય

જૂનાગઢમાં મહાશિવરાત્રીનાં મેળાનો પ્રારંભ

Mon, 03 Mar 2008 17:48:49 +0530

W.D

જૂનાગઢ(એજંસી) જૂનાગઢની ભવનાથ તળેટીમાં ગઇકાલે રવિવારે સવારે હર...હર... મહાદેવનાં નાદ્‌-સાથે મહાશિવરાત્રીનાં મેળાનો પ્રારંભ થયો. જયારે મહાશિવરાત્રીની આગવી ઓળખ સમાન દ્ગિંબર સાધુઓનો અખાડો શરૂ થઇ ગયો છે. શિવરાત્રીના મેળામાં જાણે જીવ અને શિવનો સંગમ થયો હોય તેવું વાતાવરણ જોવા મળે છે. ગિરનારની ગિરીમાળાઓ શિવનાનાદ્‌થી ગુંજી ઉઠી છે. લાખોની સંખ્‍યામાં દેશભરમાંથી શ્રધ્‍ધાળુઓ અને સાધુ-સંતો પૂણ્‍યનું ભાથુ બાંધવા ઉમટી પડયા છે.

જૂનાગઢમાં ભવનાથ તળેટી ખાતે ચાલી રહેલા મહાશિવરાત્રીનાં મેળામાં ગઇકાલ સવારથી બહારગામથી આવતા ભાવિકોની ધીમી શરૂઆત થયા બાદ સાંજે શહેરીજનો મેળામાં ઉમટી પડતા આજના દિવસે આશરે એકાદ લાખ ભાવિકોની હાજરી નોંધાઇ હતી.

મેળા ખાતેથી પ્રાપ્ત વિગતો મુજબ ગઇકાલે રવિવારે આખા દિવસ દરમ્યાન આશરે એકાદ લાખ ભાવિકો મેળામાં આવ્યા હતા. ગત વર્ષે પ્રથમ ૩ દિવસો સુધી મહાશિવરાત્રીનાં મેળામાં માંડ પાંચેક હજાર ભાવિકોની હાજરી જણાતી હતી. તેમાં આ વર્ષે એકંદરે વધારો થયો છે. જ્યારે ઉતારાઓનાં ડીમોલેશનને પગલે ભવનાથ મેઇન રોડ પહોળો બન્યો હોઇ ત્યાં પહેલા જેટલી ભીડ નથી જણાતી.

ગઇકાલે મેળામાં જિલ્લા વહીવટીતંત્ર આયોજક સાંસ્કૃતિક કાર્યક્રમનું રાજયનાં નાણામંત્રી વજુ ભાઇ વાળાએ ઉદ્ઘાટન કર્યુ હતું. દરમ્યાન ભવનાથ તળેટી ખાતે અન્નાક્ષેત્રોનાં રસોડા ધમધમવા લાગ્યા છે. તો વળી રમકડાનાં સ્ટોલ વાળાઓ, ચકડોળ, જુદી-જુદી રાઇડોમાં ગઇકાલે અને આજે સાંજે શહેરીજનોએ ભારે ઘસારો કર્યો હતો.

મેળા માટે મઘ્યપ્રદેશના ઇન્દોરથી રૂદ્રાક્ષ વેચવા આવેલી લક્ષ્મી નામની યુવતિએ કહ્યું હતું અમને અહીં પાંચ દિવસમાં એકાદ માસના ખર્ચા પાણી નિકળી જાય. અને પોલીસ હટાવે એ અમારા માટે કાંઇ નવું નથી. અમેતો બીજે જઇને વેચીશું. કારણ કે, અહીં માલ ન વેચીએ તો બીજે કયાં જવું એ મોટો પ્રશ્ન છે.

આમ, ભવનાથ ખાતે મેળાનું વાતાવરણ ધીમે ધીમે જામી રહ્યું છે. મહાશિવરાત્રીના મેળામાં આ વખતે સુરક્ષાનાં ચુસ્ત બંદોબસ્ત ઉપરાંત જિલ્લા ભરની કાયદો વ્યવસ્થા ઉપર દેખરેખ રાખવાની હોઇ અમરેલીના એસ.પી. સંદિપસીંઘને જૂનાગઢના એસ.પી. શૈલેષ કટારાના માર્ગદર્શન હેઠળ ખાસ ફરજ પર મુકાયા હોવાનું આઇ.જી. મોહનકુમાર ઝા એ જણાવ્યું હતું.

ભવનાથનો મેળો

Sat, 01 Mar 2008 12:39:25 +0530

N.D

જુનાગઢ ગીરનાર તળેટીમાં આવેલ ભવનાથમાં આજથી શિવરાત્રીનો મેળો શરૂ થઈ ગયો છે. આ મેળામાં ભારતના જુદા જુદા સ્થળોથી હજારો સાધુ સંતો આવીને ધુણી ધખાવીને બેસી જાય છે. આ મેળાનુ મુખ્ય આકર્ષણ છે નાગા બાવાઓનુ સરધસ જેમાં તેઓ હેરતભર્યા દાવ રજુ કરે છે. ગયા વર્ષે તો એક સાધુએ પોતાની ઈન્દ્રી વડે પોલીસની જીપને ખેંચી હતી. ભોલેનાથ ના પ્રતિવાદ સમાન મહાશિવરાત્રીનો આ મેળો આજથી વાજતે-ગાજતે શરૂ થશે.

આ મેળામાં સૌ પ્રથમ મંદિરમાં પૂજન અર્ચન કર્યા પછી મંદીરમાં ધ્વજનુ રોહણ કરીને મેળાનો શુભારંભ કરવામાં આવે છે. આ મંદિરમાં પૂજાવિધિ મંદિરના મહંત રમેશગીરીબાપુના હાથે મંત્રોચ્ચાર સાથે થાય છે. એવુ જાણવા મળ્યુ છે કે આ મેળામાં ભારત સાધુ સમાજના પ્રમુખ પૂ. ગોપાલાનંદજી અને અંબાજી મહંત પુ તનસુખગીરીબાપુ, મહામંડલેશ્વર પુ. ભારતીબાપુ, શ્રી શેરનાથબાપુ જેવા સાધુ સંતો ઉપસ્થિત રહેશે.

આ મેળો 6 દિવસ સુધી ચાલે છે. આ મેળામાં ભારત સિવાય વિદેશોમાંથી પણ સાધુ સંતોની પધરામણી થાય છે. આ મેળામાં મહાનગરપાલિકા દ્વારા સ્ટોલ ઉભા કરવામાં આવે છે જેમાં નાના-મોટા વેપારીઓ પોતાના રોજી રોટીની શરૂઆત પહેલા દિવસથી જ કરી દે છે. આ મેળામાં છ દિવસ સુધી ભજન અને ભોજન સાથે મહાશિવરાત્રીનો મેળો રંગ લાવશે. આ મેળા માટે પોલીસનો પૂરતો બંધોબસ્ત પણ કરવામાં આવે છે.

આ મેળાનો મહિમા અનોખો છે. દર વર્ષે આઠથી દસ લાખ લોકો મેળાને માણવા દૂર દૂરથી આવે છે. વધુ ભીડ તો જ્યારે નાગા બાવાઓનુ સરઘસ મહા વદ ચૌદશને દિવસે નીકળે છે ત્યારે થાય છે.

વ્રતની પૂજન વિધિ

Thu, 28 Feb 2008 16:49:27 +0530

શિવરાત્રીનુ વ્રત ફાગણ કૃષ્ણ ત્રયોદષીના રોજ થાય છે. કેટલાક લોકો ચતુર્થીના દિવસે આ વ્રત કરે છે.

N.D

એવી માન્યતા છે કે સૃષ્ટિની શરૂઆતમાં આ જ દિવસે અડધી રાતે ભગવાન શંકરનુ બ્રહ્મામાંથી રુદ્ર રૂપમાં અવતરણ થયુ હતુ. પ્રલયની વેળાએ આજ દિવસે પ્રદોષના સમયે ભગવાન શિવ તાંડવ કરતા બ્રહ્માંડને ત્રીજા નેત્રની જ્વાળાથી પૂરી કરી દે છે, તેથી આને મહાશિવરાત્રી અથવા કાલરાત્રિ કહેવાય છે.

ત્રણે લોકની અપ્સરા અને શીલવંતી ગૌરીને પોતાની અર્ધાગિની બનાવનારા શિવ પ્રેતો અને પિશાચોથે ઘેરાયેલા રહે છે, તેમનુ રૂપ થોડુ વિચિત્ર છે. શરીર પર સ્મશાનની ભસ્મ, ગળામાં સાપોનો હાર, કંઠમાં વિષ, જટાઓમાં જગતતારિણી પાવન ગંગા અને માથામાં પ્રલયકારી જ્વાળા છે. બળદને વાહનના રૂપમાં સ્વીકાર કરનારા શિવ અમંગલ રૂપ હોવા છતાં ભક્તોનુ મંગલ કરે છે અને ભક્તોને સંપત્તિ આપે છે.

કાળોના કાળ અને દેવોના દેવ મહાદેવના આ વ્રતનુ વિશેષ મહત્વ ચે. આ વ્રતને બ્રાહ્મણ, ક્ષત્રિય, વૈશ્વ, શૂદ્ર, નર નારી, બાળક-વૃધ્ધ દરેક કરી શકે છે.

કેવી રીતે કરશો વ્રતની પૂજા ?

1) આ દિવસે સવારે સ્નાન-ધ્યાનથી પરવારીને અનશન વ્રત રાખવુ જોઈએ.

2) પત્ર-પુષ્પ અને સુંદર વસ્ત્રોથી મંડપ તૈયાર કરીને કલશની સ્થાપના કરવાની સાથે સાથે શંકર અને નંદીની મૂર્તિ રાખવી જોઈએ

3) જો મૂર્તિ ન મળી શકે તો માટીની શિંવલિંગ બનાવી લેવી જોઈએ.

W.D

4) કળશને પાણીથી ભરી રોલી, મૌલી, ચોખા, પાન, સોપારી, લવિંગ, ઈલાયચી, ચંદન, દૂધ, દહીં, ઘી, મધ, કમલગટ્ટો, ધતૂરો, બિલિપત્ર વગેરેનો પ્રસાદ શિવજીને અર્પિત કરીને પૂજા કરવી જોઈએ. પૂજન વિધિ વિસ્તૃત અલગ આપી છે. જેને પૂજા કરતા પહેલા જરૂર વાંચી લો.

5) રાતે જાગરણ કરીને શિવની સ્તુતિનો પાઠ કરવો. આ અવસર પર શિવ પુરાણનો પાઠ મંગળદાયક છે. શિવ આરાધનાના શ્લોકનુ પઠન કરવુ પણ મંગળકારી છે.

6) આ જાગરણમાં શિવજીની ચાર આરતીનુ વિધાન જરૂરી છે.

7) શિવરાત્રિની કથા કહો કે સાંભળો.

8) બીજા દિવસે સવારે જવ, તલ,ખીર તથા બીલીપત્રોનુ હવન કરીને બ્રાહ્મણોને ભોજન કરાવીને વ્રતના પારણા કરવા જોઈએ. આ વિધાન અને સ્વચ્છ ધારણાથી જે આ વ્રત કરે છે, ભગવાન શિવ પ્રસન્ન થઈને તેને અપાર સુખ, સંપત્તિ પ્રદાન કરે છે.

સોમનાથના પ્રાચિન શિવમંદિરના દર્શન

Wed, 27 Feb 2008 18:59:04 +0530

સોમનાથ ભારતવર્ષનું પ્રમુખ યાત્રાધામ હતું. સોમનાથના પ્રાચીન શીવમંદીરનાં દર્શને રોજ હજારો યાત્રાળુઓ આવતાં. મંદીરની આવક લાખોમાં ગણાતી. કહે છે કે મંદીરમાં 200 મણની સોનાની સાંકળ હતી.. તેને બાંધેલા સોનાના ઘંટોથી પ્રચંડ ઘંટારવ થતો. મંદીરનું હીરા-માણેક-રત્નજડીત ગર્ભગૃહ ઝળાંહળાં રહેતું. ભગવાન શીવની મુર્તી રત્નોના પ્રકાશથી રાત્રીના અંધકારમાં ઝગમગી ઉઠતી.

ઈ.સ. ઓક્ટોબર, 1025નો ઓક્ટોબરમાં મહમુદ ગઝની ગુર્જરદેશ પર આક્રમણ કરવા જંગી લશ્કરી તાકાત સાથે નીકળ્યો. તેના લશ્કરમાં 40,000 જેટલા ઘોડેસ્વારો હતા. રણની મુસાફરી હોવાથી પાણીનું વહન કરતાં 25,000થી વધારે ઉંટ સાથે હતાં. મહમુદ મુલતાન થઈ આબુ-પાલણપુરના રસ્તે અણહીલપુર પાટણ પહોંચ્યો. પાટણનરેશ ભીમદેવ પહેલો તેનો સામનો કરી શકે તેમ ન હતો. તે ભાગી છુટ્યો. પાટણના સૈન્યને હરાવી મહમુદ પ્રભાસપાટણ સોમનાથ તરફ વળ્યો.

મહમુદ ગઝની ઈ.સ. 1026ના જાન્યુઆરીના પ્રથમ સપ્તાહમાં પ્રભાસપાટણ સોમનાથ પહોંચ્યો. શહેરને ફરતો કીલ્લો હતો. ગઝનીના લશ્કરે તેના પર હુમલો કર્યો. બહાદુર યોદ્ધાઓએ શહેરની રક્ષા કરવા મરણીયા પ્રયત્નો કર્યા. ત્રણ દીવસમાં પચાસ હજાર વીર લડવૈયાઓએ ભગવાન સોમનાથની રક્ષા કરતાં પ્રાણ પાથર્યા.

પ્રભાસનું પતન થયું. મહમુદ ગઝનીના લશ્કરે શહેર લુંટ્યું. તેણે સોમનાથ મંદીરને તોડી તેનો નાશ કર્યો; તેની અમુલ્ય સંપત્તી લુંટી લીધી. વીસ લાખ દીનાર જેટલી જંગી લુંટ સાથે મહમુદ રણના રસ્તે નાઠો. કેટલાક ભારતીય રાજાઓએ તેનો પીછો કરી તેના માટે ભારે મુશ્કેલીઓ ઉભી કરી, પરંતુ તે ગઝની પહોંચી ગયો. તે પછી તેણે ક્યારે ય ભારતવર્ષ પર આક્રમણ ન કર્યું. ઈ.સ. 1030માં મહમુદ ગઝનીનું મૃત્યુ થયું.

ભીમદેવ પહેલાએ થોડો વખત રાજ્ય બહાર રહી, ફરી પાટણને સંભાળ્યું. કહે છે કે ભીમદેવ તથા માલવનરેશ ભોજે સાથે મળીને સોમનાથના મંદીરનો જીર્ણોદ્ધાર કરાવ્યો. સોમનાથના ભવ્ય પાષાણ મંદીરનું પુન:નીર્માણ થયું. તેના સમયમાં મોઢેરામાં સુર્યમંદીર બંધાયું. આબુના દંડનાયક વીમલ મંત્રીએ આબુ પર ભગવાન આદીનાથનું આરસનું દેરાસર બંધાવ્યું.

ભીમદેવ પહેલાએ આશરે 42 વર્ષ રાજ્ય કર્યું. (ઈ.સ. 1022 - 1064). ભીમદેવના સ્વર્ગવાસ પછી તેનો પુત્ર કર્ણદેવ ગાદી પર આવ્યો. (ઈ.સ. 1064 - ઈ.સ. 1074). કર્ણદેવે દક્ષીણમાં લાટપ્રદેશ પર વીજય મેળવી પાટણની સત્તાને કોંકણના સીમાડા સુધી પહોંચાડી.

કર્ણદેવે ગોવાપ્રદેશની કદંબકન્યા મીનળદેવી સાથે લગ્ન કર્યાં. તે સમયમાં ઉત્તરે સારસ્વત મંડલ તથા દક્ષીણે ખેટક મંડલની વચ્ચે - એટલે હાલના અમદાવાદની આસપાસના પ્રદેશમાં - ગાઢાં જંગલો હતાં જ્યાં ભીલ સમુદાયો વસતા. આશાપલ્લી (હાલ અસલાલી) નામે ઓળખાતા આ દુર્ગમ પ્રદેશમાં ભીલ રાજા આશા ભીલનું રાજ્ય હતું. કર્ણદેવે તેને હરાવી આશાપલ્લીની પાસે કર્ણાવતી શહેર વસાવ્યું. (ચાર-પાંચ સદી પછી અહીં અહમદશાહ બાદશાહે અમદાવાદ શહેર વસાવ્યું).

આ ઉપરાંત કર્ણદેવે અન્ય નગર, તળાવ અને મંદીરો પણ બંધાવ્યાં. કર્ણદેવ સાહીત્યપ્રેમી રાજા હતો. કર્ણદેવના જીવનના ઉત્તરાર્ધમાં જ્યારે રાજ્ય પર તેની સત્તા ઢીલી પડતી ગઈ, ત્યારે તેની રાણી મીનળદેવીએ પાટણને સંભાળવાની જવાબદારી ઉપાડી હતી. કર્ણદેવ અને મીનળદેવીનો પુત્ર અને પાટણનો યુવરાજ જયસીંહ ત્યારે હજુ કીશોર અવસ્થામાં હતો. બાદમાં તેણે બધી જવાબદારી સંભાળી હતી.