દેવી અન્નપૂર્ણાનો ગરબો
(રાગ - મા પાવાગઢથી ઉતર્યાં.)
માં અંબા તે રમવા નિસર્યાં, દેવી અન્નપૂર્ણા !
મા શો લીધો શણગાર રે. દેવી.
મા પાવાની પટરાણી રે દેવી.
મા દાંતે લેવરાવ્યું દાણ રે. દેવી.
મા નીલવટ ટીલડી શોભતી, દેવી.
મા દામણી રત્ન જડાવ રે, દેવી.
માને કાને કનક ફૂલ શોભતાં, દેવી.
મા ઝાલ્યોનો ઝબકાર રે. દેવી
મા કોટે પાટિયાં હેમનાં, દેવી.
મા કંઠીયોમાં રત્ન જડાવ રે. દેવી.
મા બાંહે બાજુબંધ બેરખાં, દેવી.
માને દશે આંગળીએ વેઢ રે. દેવી.
મા લીલા તે ગજનું કાપડું, દેવી.
મા છાયલ રાતી કોર રે. દેવી.
મા ફૂલફગરનો ઘાઘરો, દેવી.
મા ઓઢણું કસુંબલ ઘાટ રે. દેવી.
મા પગે તે કડલાં શોભતાં, દેવી.
મા કાંબીઓ રત્ન જડાવરે. દેવી.
મા ગાયે ને જે જે સાંભળે, દેવી.
તેની અંબામા પૂરે આશ રે. દેવી
ભટ વલ્લભ મા તાહરો, દેવી.
હેતે ગાયો માનો રાસ રે. દેવી.
|
સૂચના
મિત્રને મોકલો
આ પેજ પ્રિન્ટ કરો 