લેગ સ્પિનર પ્રિયંકા રાયની પાંચ વિકેટો અને અંજુમ ચોપરાના 46 બોલમાં 32 રનની મદદથી ભારતે આજે અહીં મહિલા ટ્વેન્ટી 20 વિશ્વ કપમાં પૂલ બીમાં કટ્ટર હરીફ પાકિસ્તાનને પાંચ વિકેટે હરાવી ટુર્નામેન્ટમાં પોતાનું સ્થાન બનાવી દીધું છે. ભારતીય ટીમે પ્રિયંકા અને ફાસ્ટર રુમેલી ધરની 13 રનમાં ત્રણ વિકેટના શાનદાર પ્રદર્શનના પ્રતાપે પાકિસ્તાનને 19.5 ઓવરમાં માત્ર 76 રનમાં આઉટ કરી દીધું હતું અને 14 બોલ બાકી રહેતાં લક્ષ્યને પાર કરી દીધું હતું. આ લક્ષ્યનો પીછો કરવા ઉતરેલી ભારતીય ટીમની શરૂઆત ઘણી ખરાબ રહી હતી. પહેલી પાંચ ઓવરમાં ત્રણ વિકેટ ગુમાવી દીધી હતી. પરંતુ અંજુમ ચોપરાએ પોતાના અનુભવનો ફાયદો ઉઠાવતાં ટીમને જીત અપાવી હતી.

ન્યૂઝીલેન્ડની પાંચ વિકેટ ખેરવી પાકિસ્તાન માટે જીતની ઇંટ રાખનાર ફાસ્ટ બોલર ઉમર ગુલે કહ્યું કે, આ દિવસ વિશેષ હતો અને સારી શરૂઆતથી જ જીત મેળવી શક્યા છીએ. ગુલની શાનદાર બોલિંગને પગલે પાકિસ્તાને ન્યૂઝીલેન્ડ સામે છ વિકેટથી વિજય મેળવી સેમી ફાઇનલમાં જવા માટેની આશા ટકાવી રાખી છે. મેન ઓફ ધ મેચ બનેલા ગુલે કહ્યું હતું કે, આજનો દિવસ વિશેષ હતો. મને લાગે છે કે, મુખ્ય વાત શરૂઆતની છ ઓવર રહી હતી. જેમાં ખાસ સ્કોર થયો ન હતો.