સંબંધિત સમાચાર
- યુવાશક્તિ વિકસિત ભારતનો સંકલ્પ પૂર્ણ કરશે: પીએમ મોદી
- ભાજપ સરકારે વંદે માતરમ પર લીધો મોટો નિર્ણય, પશ્ચિમ બંગાળના મુખ્યમંત્રી સુવેન્દુ અધિકારીએ 12 દિવસમાં કરેલી 11 જાહેરાત
- ભારતે ઈરાનમાં શાંતિ રાજદૂત તરીકે યુએનમાં પાકિસ્તાનનો પર્દાફાશ કર્યો
- ગુજરાત ટૂરિઝમમાં રોજગારીની સુવર્ણ તક: નિઃશુલ્ક ટૂરિસ્ટ ગાઈડ તાલીમનો પ્રારંભ
- Mumbai Bread Price Hike: પેટ્રોલ, ડીઝલ, દૂધ અને બ્રેડ પછી, વડાપાંવ પણ મોંઘો થયો છે, જેની કિંમતોમાં 5 રૂપિયાનો વધારો થયો છે
અમદાવાદ એરપોર્ટ પર DRIની મોટી કાર્યવાહી: બેંગકોકથી આવેલો મુસાફર 20 કિલો ગાંજા સાથે ઝડપાયો
drugs ahmedabd airport
અમદાવાદ ઇન્ટરનેશનલ એરપોર્ટ પર ફરી એકવાર વિદેશથી થતી નશીલા પદાર્થોની હેરાફેરીનો પર્દાફાશ થયો છે. બેંગકોકથી થાઈ એરવેઝની ફ્લાઈટ દ્વારા અમદાવાદ આવેલા એક મુસાફરની બેગમાંથી 20 કિલો કરતા વધુનો ગાંજો ઝડપાયો છે. તાજેતરમાં જ આ એરપોર્ટ પરથી ₹50 કરોડનું હેરોઈન પકડાયું હતું, ત્યાં ફરી એકવાર કરોડોની આંતરરાષ્ટ્રીય કિંમત ધરાવતો આ જથ્થો પકડાતા એરપોર્ટ પર સુરક્ષા એજન્સીઓ ચોંકી ઉઠી છે.
ગુપ્ત બાતમીના આધારે કસ્ટમ અને DRIની સંયુક્ત કાર્યવાહી
ગત 20મી મેની મધ્યરાત્રિએ ડીઆરઆઈ (DRI)ને ચોક્કસ બાતમી મળી હતી કે બેંગકોકથી આવી રહેલી ફ્લાઈટના એક મુસાફર પાસે માદક પદાર્થનો જથ્થો છે. ડીઆરઆઈએ તાત્કાલિક આ અંગે કસ્ટમ્સ વિભાગને જાણ કરી હતી. ફ્લાઈટના આગમન બાદ શંકાસ્પદ મુસાફરોની ઝીણવટભરી તપાસ શરૂ કરવામાં આવી હતી, જેમાં એક મુસાફરની ટ્રોલી બેગની તલાશી લેતા કસ્ટમ વિભાગને મોટી સફળતા મળી હતી.
ટ્રોલી બેગમાંથી સીલબંધ પેકેટોનું મોટું કલેક્શન મળ્યું
મુસાફરની ટ્રોલી બેગની સઘન તપાસ દરમિયાન તેમાંથી લીલા રંગના સૂકા છોડ જેવા પદાર્થ ભરેલા 19 જેટલા સીલબંધ પેકેટો મળી આવ્યા હતા. એફએસએલ અને સંબંધિત એજન્સીઓ દ્વારા આ પદાર્થની પ્રાથમિક તપાસ કરવામાં આવતા તે ઉચ્ચ ગુણવત્તાનો ગાંજો હોવાનું સ્પષ્ટ થયું હતું. આ તમામ પેકેટોનું કુલ વજન 20.366 કિલોગ્રામ નોંધાયું છે.
યુપીના રહેવાસી આરોપી અંગત શ્રીવાસ્તવની ધરપકડ
કસ્ટમ્સ વિભાગે આ પ્રતિબંધિત માદક પદાર્થનો જથ્થો જપ્ત કરીને ઉત્તર પ્રદેશના સહારનપુરના રહેવાસી આરોપી અંગત શ્રીવાસ્તવની ધરપકડ કરી લીધી છે. નાર્કોટિક ડ્રગ્સ એન્ડ સાયકોટ્રોપિક સબસ્ટન્સ (NDPS) એક્ટ, 1985 ની કડક જોગવાઈઓ હેઠળ આરોપી સામે ગુનો નોંધવામાં આવ્યો છે. કસ્ટમ વિભાગે કાયદેસરની પ્રાથમિક કાર્યવાહી પૂર્ણ કરીને આરોપીને આગળની તપાસ માટે ડીઆરઆઈને સોંપ્યો છે.
અમદાવાદથી દિલ્હી માલ પહોંચાડવાનો હતો પ્લાન
પ્રાથમિક પૂછપરછમાં સામે આવ્યું છે કે આરોપી અંગત શ્રીવાસ્તવ મૂળ દિલ્હીનો નિવાસી છે અને આ તેની પ્રથમ વિદેશી સફર હતી. તે દિલ્હીથી બેંગકોક ગયો હતો, જ્યાં એક અજાણ્યા શખસે તેને આ ગાંજાનો જથ્થો આપ્યો હતો. આરોપી આ માલ લઈને અમદાવાદ એરપોર્ટ ઉતર્યો હતો અને ત્યાંથી ડોમેસ્ટિક રૂટ મારફતે દિલ્હી જવાની ફિરાકમાં હતો. હાલ એજન્સીઓ એ તપાસ કરી રહી છે કે આ જથ્થો ભારતમાં કોને ડિલિવરી કરવાનો હતો.
ભારતમાં વિદેશી ગાંજાના વધી રહેલા નેટવર્કની આશંકા
અમદાવાદ એરપોર્ટ પર વિદેશી ગાંજો પકડાવાની આ સતત વધી રહેલી ઘટનાઓ દેશમાં સક્રિય ડ્રગ્સ નેટવર્ક તરફ ઈશારો કરે છે. સુરક્ષા એજન્સીઓના એક અનુમાન મુજબ, ભારતમાં વિદેશી હાઈ-ક્વોલિટી ગાંજાની માંગ વધી રહી હોવાથી દર સપ્તાહે આવા જથ્થા ઘૂસાડવાના પ્રયાસો થઈ રહ્યા છે. DRI હવે આંતરરાષ્ટ્રીય ડ્રગ સિન્ડિકેટના મૂળ સુધી પહોંચવા માટે પકડાયેલા આરોપીની સઘન પૂછપરછ કરી રહી છે.
