અમદાવાદના નવા મેયર તરીકે હિતેશ બારોટના નામ પર વાગી અંતિમ મહોર: પદાધિકારીઓની પણ સત્તાવાર જાહેરાત

Publish: Tue, 26 May 2026 (13:41 IST) Updated: Tue, 26 May 2026 (13:49 IST)

ahmedabad city new mayor

અમદાવાદ મહાનગરપાલિકા (AMC) ના નવા પદાધિકારીઓની સત્તાવાર જાહેરાત કરવામાં આવી છે. જે અંતર્ગત શહેરના નવા મેયર તરીકે થલતેજ વોર્ડના કોર્પોરેટર હિતેશ બારોટની પસંદગી પર અંતિમ મહોર મારવામાં આવી છે. આ નવી ટીમમાં ડેપ્યુટી મેયર પદે અંજુ શાહને જવાબદારી સોંપાઈ છે, જ્યારે મહાનગરપાલિકાની સૌથી મહત્વની ગણાતી સ્ટેન્ડિંગ કમિટીના ચેરમેન તરીકે કમલેશ પટેલની નિમણૂક કરવામાં આવી છે.

સંગઠનાત્મક પદોની વહેંચણી અને અનામત બેઠકનું સમીકરણ

નવા પદાધિકારીઓની યાદીમાં અન્ય સંગઠનાત્મક પદો પર પણ અનુભવી ચહેરોને સ્થાન આપવામાં આવ્યું છે, જેમાં જશુ ઠાકોરને શાસક પક્ષના નેતા તરીકે અને અતુલ મિશ્રાને દંડક તરીકે પસંદ કરવામાં આવ્યા છે. અમદાવાદ મહાનગરપાલિકાની પ્રથમ અઢી વર્ષની ટર્મ માટે મેયર પદ OBC પુરુષ માટે અનામત હોવાથી, ભાજપ હાઈકમાન્ડ દ્વારા સંગઠન અને સહકારી ક્ષેત્રનો બહોળો અનુભવ ધરાવતા નેતા પર પસંદગીનો કળશ ઢોળવામાં આવ્યો છે.

હિતેશ બારોટની પ્રારંભિક સફર અને RSS સાથે જોડાણ

નવા નિયુક્ત મેયર હિતેશ બારોટનો જન્મ 14 એપ્રિલ 1968ના રોજ થયો હતો અને તેઓ ધોરણ 10 સુધીનો અભ્યાસ ધરાવે છે. થલતેજ ગામના મૂળ વતની એવા હિતેશ બારોટ વર્ષ 1986માં ભારતીય જનતા પાર્ટીમાં જોડાયા હતા. ત્યારબાદ 1987થી 1997 સુધી તેઓ રાષ્ટ્રીય સ્વયંસેવક સંઘ (RSS)માં સક્રિય રીતે કાર્યરત રહ્યા હતા, જ્યાંથી તેમની જાહેર જીવનની મજબૂત શરૂઆત થઈ હતી.

બક્ષીપંચ સમાજની જવાબદારી અને અટલજીની ચૂંટણીમાં ભૂમિકા

વર્ષ 1988માં તેઓ થલતેજ ગ્રામ્ય મંડલના મહામંત્રી તરીકે પસંદ થયા હતા. ત્યારબાદ 1989થી 1997 દરમિયાન તેમણે એચ.એલ. પટેલ સાથે મળીને દસ્ક્રોઇના 18 ગામ બક્ષીપંચની જવાબદારી સમર્થ રીતે સંભાળી હતી. પૂર્વ વડાપ્રધાન અટલ બિહારી વાજપેયી જ્યારે ગાંધીનગરથી લોકસભા ચૂંટણી લડ્યા, ત્યારે પણ તેમણે 18 ગામ બક્ષીપંચના સમાજ ઇન્ચાર્જ તરીકે ખૂબ જ મહત્વપૂર્ણ ભૂમિકા નિભાવી હતી.

અમિત શાહ સાથે સંગઠન અને બૂથ સ્તરની મજબૂત કામગીરી

સંગઠનાત્મક સફરમાં આગળ વધતા તેઓ વર્ષ 1996માં દસ્ક્રોઈ ભાજપ તાલુકા પ્રમુખ પદે રહ્યા હતા અને ત્યારબાદ 1997માં દસ્ક્રોઈ ભાજપ યુવા મોરચાના ઉપાધ્યક્ષ બન્યા હતા. આ સમયગાળા દરમિયાન તેમણે સરખેજ વિધાનસભા ક્ષેત્ર હેઠળ દસ્ક્રોઈના ગામોમાં બક્ષીપંચ સમાજના સંકલન માટે કેન્દ્રીય ગૃહમંત્રી અમિત શાહ સાથે મળીને કો-ઓર્ડિનેશનની કામગીરી કરી હતી અને 2012 સુધી બૂથ સ્તરની કામગીરી સંભાળી હતી.

સરપંચ પદથી લઈને સહકારી બેંકિંગ ક્ષેત્રનો બહોળો અનુભવ

હિતેશ બારોટ સહકારી ક્ષેત્રમાં પણ ખૂબ મોટું નામ ધરાવે છે. તેઓ 2001થી 2005 સુધી બોડકદેવ ગ્રામ પંચાયતના સરપંચ રહ્યા હતા. ત્યારબાદ 2010માં અમદાવાદ APMCના વાઈસ ચેરમેન અને 2014માં તેના ડિરેક્ટર બન્યા હતા. આ સિવાય તેઓ વર્ષ 2012માં ADC બેંકના ડિરેક્ટર તરીકે નિમાયા હતા અને 2013થી 2017 દરમિયાન પંચમહાલ ડિસ્ટ્રિક્ટ બેંકમાં પણ ડિરેક્ટર તરીકે સેવાઓ આપી હતી.

ગાંધીનગર લોકસભા ઇન્ચાર્જથી અમદાવાદના પ્રથમ નાગરિક સુધી

તેમની સક્રિયતાને જોતા વર્ષ 2014માં તેમને ગાંધીનગર લોકસભાના બક્ષીપંચ ઈન્ચાર્જ બનાવવામાં આવ્યા હતા. ત્યારબાદ વર્ષ 2017માં તેઓ ગુજકોમાસોલના ડિરેક્ટર તરીકે ચૂંટાઈ આવ્યા અને 2018માં ગુજરાત સ્ટેટ કો-ઓપરેટિવ બેંકના ડિરેક્ટર તરીકે જવાબદારી સંભાળી હતી. વર્ષ 2021માં તેઓ થલતેજ વોર્ડમાંથી કોર્પોરેટર તરીકે ચૂંટાયા બાદ સ્ટેન્ડિંગ કમિટીના ચેરમેન પણ બન્યા હતા અને હવે તેઓ અમદાવાદના મેયર પદની ગરિમાપૂર્ણ જવાબદારી સંભાળશે.