સંબંધિત સમાચાર
- GSRTCની મોટી ભેટ: એસ.ટી. નિગમે લોન્ચ કરી નવી ઓનલાઈન પાસ સિસ્ટમ
- ગાંધીનગરમાં ભાજપનું મંથન: ઉમેદવારો નક્કી કરવા બેઠકોનો દોર શરૂ
- સ્થાનિક સ્વરાજ્યની ચૂંટણી માટે ભાજપની કડક નીતિ: ગુનાહિત ઇતિહાસ અને લોબિંગ કરનારાઓના પત્તાં કપાશે
- Gujarat Local Govt. Election Date - 26 મી એપ્રિલે મતદાન, 28 મીએ ગણતરી,આચારસંહિતાનો અમલ શરૂ
- ગુજરાતના ૩ વરિષ્ઠ IAS અધિકારીઓની કેન્દ્રમાં નિયુક્તિ, જાણો કોને કઈ મળી જવાબદારી
ગુજરાત સ્થાનિક સ્વરાજની ચૂંટણી: ફોર્મ ચકાસણીના પ્રથમ દિવસે જ 6,885 ઉમેદવારોના ફોર્મ રદ
ગુજરાતમાં સ્થાનિક સ્વરાજની ચૂંટણીને લઈને ફોર્મ ચકાસણીની પ્રક્રિયા તેજ બની છે, જેમાં પ્રથમ દિવસે જ મોટા પાયે ઉમેદવારી ફોર્મ રદ થવાના સમાચાર સામે આવ્યા છે. સમગ્ર રાજ્યમાં વિવિધ સ્તરે કુલ 6,885 જેટલા ફોર્મ ટેકનિકલ ખામી કે અન્ય કારણોસર રદ કરવામાં આવ્યા છે. ખાસ કરીને મહાનગરપાલિકાઓની વાત કરીએ તો 15 કોર્પોરેશનમાં કુલ 575 ફોર્મ અમાન્ય ઠર્યા છે, જેમાં સુરત અને ભાવનગરમાં સૌથી વધુ ફોર્મ રદ થયા હોવાનું નોંધાયું છે.
જિલ્લા પંચાયતમાં ઉમેદવારોની સ્થિતિ
જિલ્લા પંચાયતોની ચૂંટણીમાં પણ ચકાસણી દરમિયાન કુલ 1,233 ફોર્મ રદ કરવામાં આવ્યા છે. રાજ્યની 344 જિલ્લા પંચાયત બેઠકો માટે થયેલી આ પ્રક્રિયામાં દાહોદ અને બનાસકાંઠા જિલ્લામાં સૌથી વધુ ફોર્મ રદ થયા છે. આ ઉપરાંત આણંદ, જૂનાગઢ, વલસાડ અને પંચમહાલ જેવા જિલ્લાઓમાં પણ ફોર્મ અમાન્ય રહેતા અનેક ઉમેદવારો ચૂંટણીની રેસમાંથી બહાર ફેંકાયા છે.
નગરપાલિકાઓમાં ફોર્મ રદ થવાનો આંકડો
નગરપાલિકાઓના કિસ્સામાં પણ ચિત્ર કંઈક આવું જ રહ્યું છે, જ્યાં 84 નગરપાલિકાઓના કુલ 584 ફોર્મ રદ થયા છે. ગાંધીનગરની કલોલ નગરપાલિકામાં સૌથી વધુ 73 અને પાલીતાણામાં 47 ફોર્મ રદ થયા છે. આ સિવાય અંજાર, અમરેલી અને મુન્દ્રા જેવી નગરપાલિકાઓમાં પણ મોટી સંખ્યામાં ફોર્મ અમાન્ય ઠર્યા છે, જેના કારણે હવે બાકી રહેલા ઉમેદવારો વચ્ચે ખરાખરીનો જંગ જામશે.
તાલુકા પંચાયત સ્તરે મોટી સંખ્યામાં ફોર્મ અમાન્ય
તાલુકા પંચાયત સ્તરે સૌથી વધુ ફોર્મ રદ થવાની ઘટનાઓ જોવા મળી છે. રાજ્યની 260 તાલુકા પંચાયતો માટે ભરાયેલા કુલ 20,515 ફોર્મમાંથી 4,453 જેટલા ફોર્મ રદ કરવામાં આવ્યા છે. આટલી મોટી સંખ્યામાં ફોર્મ રદ થયા બાદ હવે માત્ર 16,034 ઉમેદવારોના ફોર્મ જ માન્ય ગણવામાં આવ્યા છે, જે હવે આગામી ચૂંટણી પ્રક્રિયામાં ભાગ લેશે.
ચૂંટણીનું આગામી ચિત્ર
ચૂંટણી પંચ દ્વારા હાથ ધરવામાં આવેલી આ કડક ચકાસણી બાદ હવે ચૂંટણીનું ચિત્ર વધુ સ્પષ્ટ થઈ રહ્યું છે. ફોર્મ રદ થવા પાછળ અધૂરી વિગતો, સોગંદનામામાં ભૂલ અથવા નિયત મર્યાદા કરતા વધુ ફોર્મ જેવા કારણો જવાબદાર હોવાનું મનાય છે. હવે આગામી દિવસોમાં ફોર્મ ખેંચવાની પ્રક્રિયા બાદ દરેક બેઠક પર કેટલા ઉમેદવારો મેદાનમાં છે તેની આખરી યાદી પ્રસિદ્ધ કરવામાં આવશે.
