Last Updated : Thursday, 9 July 2026 (12:17 IST)
સંબંધિત સમાચાર
- "ફાટક ખોલો" "ફાટક ખોલો" ના નારા પોરબંદરના ફાટક બંધ થતા હજારો લોકોને અનેક મુશ્કેલી
- ગુજરાતમાં વરસાદી માહોલ યથાવત: દક્ષિણ ગુજરાતમાં અતિભારે વરસાદની આગાહી વચ્ચે રાજકોટ-સુરત તંત્ર એલર્ટ
- અમિત શાહ એક્શન મોડમાં: વતન ગુજરાતમાં વરસાદની સ્થિતિ અંગે મુખ્યમંત્રી સાથે કરી ટેલિફોનિક ચર્ચા, રાહત કામગીરીની સમીક્ષા
- ગુજરાતમાં 5 સિસ્ટમ સક્રિય થતાં આફત: આખું નવસારી શહેર દરિયામાં ફેરવાયું, દક્ષિણ ગુજરાતમાં ઓરેન્જ એલર્ટ, મુખ્યમંત્રી ભૂપેન્દ્ર પટેલની કેબિનેટ બેઠક
- સૌરાષ્ટ્રમાં આફત વચ્ચે રાજ્ય સરકાર એલર્ટ: મંત્રી જીતુભાઈ વાઘાણીની અધ્યક્ષતામાં વર્ચ્યુઅલ સમીક્ષા બેઠક
ગોસાબારા દરિયાકાંઠેથી રૂ. 30.67 લાખનું ચરસ ઝડપાયું: નવી બંદર પોલીસને મળી મોટી સફળતા
પોરબંદર જિલ્લાના ગોસાબારા દરિયાકાંઠે નવી બંદર પોલીસને ફૂટ પેટ્રોલિંગ દરમિયાન એક મોટી સફળતા મળી છે. પોલીસની ટીમ જ્યારે કિનારાના વિસ્તારમાં સુરક્ષા વ્યવસ્થા અંતર્ગત પેટ્રોલિંગ કરી રહી હતી, ત્યારે લેન્ડિંગ પોઈન્ટ નજીક શંકાસ્પદ હાલતમાં પડેલું એક બાચકું નજરે પડ્યું હતું. આ અજાણ્યા બાચકાને જોઈને પોલીસને શંકા જતાં તેમણે તાત્કાલિક તેની તપાસ હાથ ધરી હતી.
કરોડોની કિંમતનો ચરસનો જથ્થો ઝડપાયો
પોલીસે જ્યારે તે શંકાસ્પદ બાચકાને ખોલીને જોયું, ત્યારે તેમાંથી કુલ 10 પેકેટ મળી આવ્યા હતા. આ પેકેટોની ઝીણવટભરી તપાસ અને વજન કરતાં તેમાં અંદાજે 12.270 કિલોગ્રામ ચરસ હોવાનું સામે આવ્યું હતું. આંતરરાષ્ટ્રીય બજારમાં જપ્ત કરાયેલા આ ચરસની અંદાજિત કિંમત રૂ. 30.67 લાખ જેટલી થવા જાય છે. પોલીસે આ તમામ નશીલા પદાર્થનો મુદ્દામાલ પોતાના કબજે લઈ આગળની કાયદેસરની કાર્યવાહી શરૂ કરી દીધી છે.
દરિયાઈ માર્ગે ડ્રગ્સ ઘુસાડવામાં આવ્યું હોવાની આશંકા
પ્રાથમિક તપાસ અને પુરાવાઓ સપાટી પર આવ્યા બાદ એવી પ્રબળ શક્યતા વ્યક્ત કરવામાં આવી રહી છે કે ચરસનો આ મોટો જથ્થો દરિયાઈ માર્ગેથી અહીં લાવવામાં આવ્યો હતો. જોકે, આ માદક પદાર્થ કયા દેશ કે કયા રાજ્યમાંથી અહીં સુધી પહોંચાડવામાં આવ્યો, તેને કોણે મંગાવ્યો હતો અને આ સમગ્ર ખેલ પાછળ કઈ ગેંગ કે ગેરકાયદે નેટવર્ક કામ કરી રહ્યું છે, તે દિશામાં નવી બંદર પોલીસે સઘન પૂછપરછ અને તપાસનો દોર શરૂ કર્યો છે.
પોલીસ દ્વારા તપાસ તેજ અને દરિયાકાંઠે સુરક્ષા વ્યવસ્થા મજબૂત
સમગ્ર મામલાની ગંભીરતાને જોતાં પોલીસે ગોસાબારા અને તેની આસપાસના તમામ વિસ્તારોમાં પણ તપાસના ચક્રો ગતિમાન કર્યા છે. ઉપલબ્ધ પુરાવા અને ટેક્નિકલ સર્વેલન્સ (મોબાઈલ લોકેશન વગેરે)ના આધારે સમગ્ર ઘટનાની કડીઓ જોડવાના પ્રયાસો કરવામાં આવી રહ્યા છે. ઉચ્ચ પોલીસ અધિકારીઓએ જણાવ્યું છે કે, ભવિષ્યમાં આવી કોઈપણ પ્રકારની દેશવિરોધી કે ગેરકાયદે પ્રવૃત્તિઓ દરિયાકાંઠે ન થાય તે માટે સમગ્ર તટીય વિસ્તારમાં સુરક્ષા અને પેટ્રોલિંગ વધુ કડક કરી દેવામાં આવ્યું છે.
