તમારા સિનીયર કે બોસનાં સ્વભાવને કેવી રીતે ઓળખશો ? આવો જાણીએ

ઑફિસમાં કામ કરતા લોકો બૉસને તો સારી રીતે ઓળખતા જ હોય છે. જો કે પરણેલા પુરુષોને પણ ઘરમાં બૉસ કોણ છે એ જણાવવાની જરૂર નથી હોતી. અહીં આપણે ઑફિસના બૉસ વિશે જ વાત કરીશું અને એમને ઓળખવાની કેટલીક સહેલી ટીપ્સ હું તમને આજે આપીશ. આમાની કેટલીક ટીપ્સ તમે તમારા ઘરના બૉસ પર અજમાવી જોજો કદાચ કામ આવી જાય.

મોટાભાગના કર્મચારીઓ ઑફિસમાં બૉસથી ડરતા હોય છે અને બૉસ જ્યારે એમને બોલાવે ત્યારે ઘણાને તો ઠંડા પસીના છૂટવા માંડે છે. જો કે દરેક ઑફિસમાં અમુક ખાસ લોકો એવા હોય છે કે જેમને બૉસનો બિલકુલ ડર નથી લાગતો અને બૉસના વરદ હસ્ત હંમેશ એમના માથે મુકાયેલ જોવા મળે છે.

તમારા બૉસ તમારે માટે કેવી લાગણી ધરાવે છે એ જાણવા માટે નિષ્ણાતોએ નીચેના ઉપાયો સુચવ્યા છે. એમાંથી તમને કયો ઉપાય લાગુ પડે છે એ જોઈને એ પ્રમાણે વર્તવાથી તમે તમારા બૉસને ખુશ રાખી શકશો.

આ લેખ વાંચ્યા બાદ તમારા બૉસની બૉડિલેંગ્વેજ જોઈને તમે નક્કી કરી શકશો કે બૉસ તમારા વિશે કેવા વિચાર ધરાવે છે.

જો એ તમારા વિશે સકારાત્મક ભાવ રાખતો હશે તો એ તમારી સાથે નમ્રતાથી વાત કરશે, એની કેબિનમાં જાઓ ત્યારે તમને બેસવાનું કહેશે. તમારી સાથે નજર મેળવીને વાત કરશે. એનો અવાજ શાંત અને ચહેરા પર મિત્રભાવવાળું હાસ્ય જોવા મળશે.

હવે જો એ નકારાત્મક વિચાર ધરાવતો હશે તો તમારી સાથે નજર મેળવ્યા વગર વાત કરશે. એ તમને બેસવાનું નહીં કહે, અનેક કર્મચારીઓ સાથે હોય ત્યારે તમે જાણે ત્યાં છો જ નહીં એ રીતે વર્તશે. એ ચારે તરફ નજર ફેરવતો રહેશે, ફોન પર કે કામમાં વ્યસ્ત હોવાનો દેખાવ કરશે પણ તમારી સામે નહીં જુએ. તેઓ પોતાની પાંપણ વારંવાર બંધઉઘાડ કરશે, ભમ્મર એ રીતે સંકોચશે જાણે તમારા પર એને શંકા હોય અને એ જ્યારે હસસે ત્યારે જબરજસ્તીથી હસતો હોય એવું જણાશે.

સકારાત્મક બૉસના હાથ હંમેશ ખૂલ્લા અને તમને દેખાય એ રીતે સામાન્ય અવસ્થામાં હોય છે. જ્યારે નકારાત્મક બૉસના હાથ ક્યાં તો ખિસ્સામાં, ટેબલની પાછળ અથવા તો અદબ ભીડેલા જોવા મળશે.

જો તમારો બૉસ તમને નાપસંદ કરતો હોય તો એના હાથ શરીરની બંને તરફ એકદમ ચોંટાડેલા હશે. એ પોતાની આંગળીઓથી ટેબલ પર તબલા વગાડતો પણ જોવા મળશે.

આ લેખ વાંચ્યા બાદ હવે તમે તમારા બૉસને વાંચવાનું શરૂ કરો એ અગાઉ એક વાત જણાવી દઉ કે ઉપર જણાવેલ વર્તન એકથી વધુ વખત થાય તો સમજવું કે બૉસ તમારા પર ખુશ છે કે નાખુશ અન્યથા એવું પણ બની શકે કે એ પોતાની બૉસ એટલે કે હોમ મિનિસ્ટર સાથે બાઝીને આવ્યો હોય અને ગુસ્સો તમારા પર કાઢતો હોય. એ પરિસ્થિતીમાં તમારે જ તમારી મદદ કરવી રહી, આ માટે મારી પાસે કોઇ ટીપ્સ નથી.