Happy Birthday Disha Vakani: શાહરૂખ ખાનની ફિલ્મમાં પણ કામ કરી ચુકેલી દિશાએ પરિવાર માટે એક્ટિંગ છોડી
Happy Birthday Disha Vakani તારક મહેતા કા ઉલ્ટા ચશ્માની પ્રિય દયાબેન એટલે કે દિશા વાકાણી આજે તેનો 44મો જન્મદિવસ ઉજવી રહી છે. દિશા વાકાણી મૂળ ગુજરાતની છે. તેમનો જન્મ 17 ઓગસ્ટ 1978ના રોજ અમદાવાદમાં એક ગુજરાતી જૈન પરિવારમાં થયો હતો
તેમણે ગુજરાત કોલેજમાંથી ડ્રામેટિકમાં ગ્રેજ્યુએશન કર્યું છે. દિશા વાકાણીએ ઘણી ફિલ્મો અને ટીવી શોમાં કામ કર્યું છે, પરંતુ તેને કોમેડી ટીવી શો 'તારક મહેતા કા ઉલ્ટા ચશ્મા' દ્વારા વધુ લોકપ્રિયતા મળી છે. આ શોમાં દયા બેનનું પાત્ર ભજવીને તે ઘર-ઘરમાં જાણીતી બની ગયા હતા. દિશાએ 6 વર્ષ પહેલા આ શોને અલવિદા કહી દીધું હોવા છતાં લોકો તેમને આ નામથી જ ઓળખે છે.
શાહરૂખ ખાનની ફિલ્મમાં પણ જોવા મળી
જો કે, 'તારક મહેતા કા ઉલ્ટા ચશ્મા' પહેલા તેણીએ 'શુભ મંગલ જ્યાદા સાવધાન', 'ખિચડી', 'ઇન્સ્ટન્ટ ખીચડી', 'હીરો ભક્તિ હી શક્તિ હૈ' અને 'આહત' જેવા ટીવી શોમાં મહત્વની ભૂમિકાઓ ભજવી છે. આ સિવાય તે વર્ષ 2014માં 'CID'માં પણ જોવા મળી હતી. માત્ર ટીવી શો જ નહીં પરંતુ દિશા વાકાણીએ મોટા પડદા પર પણ પોતાનું નસીબ અજમાવ્યું છે. તે શાહરૂખ ખાનની ફિલ્મ 'દેવદાસ'માં જોવા મળી હતી. આ સિવાય દિશા 'જોધા અકબર', 'મંગલ પાંડે ધ રાઇઝિંગ', 'લવ સ્ટોરી 2050' જેવી ફિલ્મોમાં સપોર્ટિંગ રોલમાં પણ જોવા મળી છે. પરંતુ તેને ફિલ્મોમાં બહુ ઓળખ મળી ન હતી. જે ઓળખ તેમને 'તારક મહેતા કા ઉલ્ટા ચશ્મા'એ આપી હતી. દિશા વાકાણીએ શોમાં દયાબેન તરીકેના તેના અદભૂત અભિનયથી આ રોલને આઇકોનિક બનાવ્યો છે. તેથી જ આ શો છોડ્યાના 6 વર્ષ પછી પણ આ પાત્રમાં તેની જગ્યા કોઈ લઈ શક્યું નથી.
2015માં મુંબઈના સીએ સાથે કર્યા હતા લગ્ન
ઉલ્લેખનીય છે કે વર્ષ 2017 માં, માતા બન્યા પછી, દિશાએ આ શોને અલવિદા કહ્યું હતું. ત્યારથી તેના શોમાં વાપસીની અટકળો ચાલી રહી છે. જોકે, આ વર્ષે જાન્યુઆરીમાં તે એક પુત્રની માતા પણ બની હતી. જે બાદ હવે આ સપનામાં તેના પાછા આવવાની આશા ઓછી છે. બીજી તરફ દિશાના અંગત જીવનની વાત કરીએ તો દિશાએ વર્ષ 2015માં મુંબઈના સીએ મયુર પડિયા સાથે લગ્ન કર્યા હતા. હવે દિશા એક્ટિંગથી દૂર પોતાના પરિવાર સાથે સમય વિતાવી રહી છે.
