ગુજરાતમાં હાલ ચોમાસું ખૂબ જ સક્રિય છે અને ઘણા વિસ્તારોમાં ભારેથી અતિભારે વરસાદ પડી રહ્યો છે. ચોમાસું શરૂ થયા બાદ ગુજરાતમાં વરસાદનો આ ત્રીજો રાઉન્ડ છે, જેમાં ઘણા વિસ્તારોમાં ખૂબ સારો વરસાદ પડ્યો છે.
ગુજરાતમાં હજી પણ આગામી ત્રણ દિવસ સુધી ભારેથી અતિભારે વરસાદની આગાહી કરવામાં આવી છે અને તે બાદ પણ રાજ્યના ઘણા જિલ્લાઓમાં વરસાદ ચાલુ રહે તેવી શક્યતા છે.
ઓડિશા પર બનેલો -પ્રેશર એરિયા આગળ વધીને હવે ગુજરાત નજીક આવી ગયો છે, હાલ આ વરસાદી સિસ્ટમ મધ્ય પ્રદેશ પર છે અને તેની ગુજરાત પર અસર થઈ રહી છે.
ગુજરાતમાં હાલ ગાજવીજ સાથે કેટલાક વિસ્તારોમાં અતિભારે વરસાદ થયો હોવા છતાં રાજ્યના 26 જેટલા જિલ્લાઓમાં 17 જુલાઈ સુધીમાં વરસાદની ઘટ જોવા મળી રહી છે.
હવામાન વિભાગે આપેલી માહિતી પ્રમાણે આગામી ત્રણ દિવસ સુધી રાજ્યમાં સાર્વત્રિક વરસાદની સ્થિતિની આગાહી કરવામાં આવી છે.
જોકે, આગામી ત્રણ દિવસ માટે હવે કચ્છ, સૌરાષ્ટ્ર અને ઉત્તર ગુજરાતના કેટલાક વિસ્તારોમાં વધારે વરસાદની શક્યતા દેખાઈ રહી છે. એટલે કે દક્ષિણ ગુજરાતમાં જે સતત ભારેથી અતિભારે વરસાદ પડી રહ્યો છે ત્યાં થોડું વરસાદનું પ્રમાણ ઘટશે.
હવામાન વિભાગ પ્રમાણે 17 જુલાઈના રોજ દેવભૂમિ દ્વારકા, પોરબંદર, રાજકોટ, જૂનાગઢ અને ગીર-સોમનાથ જિલ્લામાં અતિભારે વરસાદની શક્યતા રહેલી છે. જ્યારે જામનગર, મોરબી, સુરેન્દ્રનગર, બોટાદ, ભાવનગર, કચ્છ, બનાસકાંઠા, સાબરકાંઠા, અરવલ્લી, મહીસાગર, દાહોદ, વલસાડ, સુરત, નવસારી જિલ્લામાં કેટલાક વિસ્તારોમાં ભારે વરસાદ થઈ શકે છે. આ ઉપરાંત ગુજરાતના અન્ય વિસ્તારોમાં પણ મધ્યમથી કોઈ વિસ્તારમાં થોડા વધારે વરસાદની સંભાવના છે.
18 જુલાઈના રોજ સૌરાષ્ટ્રના ચાર જિલ્લાઓમાં વરસાદનું જોર સૌથી વધારે રહે તેવી શક્યતા છે, જેમાં દેવભૂમિ દ્વારકા, જામનગર, પોરબંદર, જૂનાગઢ અને રાજકોટ જિલ્લામાં અતિભારે વરસાદની આગાહી કરવામાં આવી છે. સૌરાષ્ટ્રના આ સિવાયના જિલ્લાઓ અને કચ્છમાં ભારે વરસાદની આગાહી કરવામાં આવી છે. નવસારી અને વલસાડ જિલ્લાના પણ કેટલાક વિસ્તારોમાં વધારે વરસાદ થઈ શકે છે.
