સૂડાનમાં 7 દિવસની અંદર બીજી ગોલ્ડ માઈન ઢસડી, 11 મજૂરોના મોત, ૩૦ ઘાયલ

ભીષણ ગૃહયુદ્ધની આગમાં સળગી રહેલા સુદાનમાં સોનાની ખાણ ધસી પડવાથી એક અઠવાડિયામાં બીજી વખત મોટી દુર્ઘટના બની છે. સુદાનના ઉત્તર-પૂર્વીય ભાગના લાલ સમુદ્ર રાજ્યમાં ખાણ ટનલ ધસી પડતા ઓછામાં ઓછા 11 ખાણિયોના મોત થયા છે અને 30 લોકો ઘાયલ થયા છે. કાટમાળમાં ફસાયેલા અન્ય લોકોની શોધખોળ ચાલુ છે. આના એક અઠવાડિયા પહેલા, પશ્ચિમ સુદાનમાં ખાણ ધસી પડવાથી 82 લોકો માર્યા ગયા હતા.

આ અકસ્માત શનિવાર રાત્રે શરૂ થયો હતો.

આ અકસ્માત રવિવારે લાલ સમુદ્ર રાજ્યના દૂરના પ્રદેશ ઓનીમાં થયો હતો. સ્થાનિક કાર્યકર અબ્દલહય ખરીફ અબાકરના જણાવ્યા અનુસાર, ખાણ ધરાશાયી થવાની ઘટના શનિવાર રાત્રે શરૂ થઈ હતી. રાજ્યની માલિકીની સુદાનિસ મિનરલ રિસોર્સિસ કંપનીના એક અધિકારીએ જણાવ્યું હતું કે રવિવાર સુધીમાં 11 મૃતદેહો મળી આવ્યા હતા અને 30 લોકોને બચાવી લેવામાં આવ્યા હતા. અધિકારીએ નામ ન આપવાની શરતે જણાવ્યું હતું કારણ કે તેમને મીડિયા સાથે વાત કરવાનો અધિકાર નહોતો. કંપનીએ અકસ્માતમાં જીવ ગુમાવનારાઓ પ્રત્યે સંવેદના વ્યક્ત કરતં  નિવેદન જારી કર્યું હતું, પરંતુ મૃતકો અથવા ઘાયલોની સંખ્યા અંગે વિગતો આપી ન હતી.

એક અઠવાડિયામાં બીજી મોટી ખાણ દુર્ઘટના

એક અઠવાડિયામાં સુદાનમાં આ પ્રકારનો આ બીજો મોટો ખાણ અકસ્માત છે. એક અઠવાડિયા પહેલા, દેશના પશ્ચિમ ભાગમાં બીજી સોનાની ખાણમાં ઘણી ટનલ તૂટી પડતાં ઓછામાં ઓછા 82 લોકો મૃત્યુ પામ્યા હતા. આ વિસ્તાર અર્ધલશ્કરી રેપિડ સપોર્ટ ફોર્સિસ (RSF) ના નિયંત્રણ હેઠળ છે.

સુદાન સોનાનો મુખ્ય ઉત્પાદક દેશ છે અને હજારો નાની અને અનૌપચારિક ખાણોનું ઘર છે. સલામતી ધોરણોનું પાલન ન થવાને કારણે આ ખાણોમાં અકસ્માતો સામાન્ય છે. થોડા મહિના પહેલા, સુદાનમાં સોનાની ખાણના વિવાદમાં અજાણ્યા બંદૂકધારીઓએ 70 થી વધુ લોકોની હત્યા કરી હતી.

સુદાન ગૃહયુદ્ધનો સામનો કરી રહ્યું છે

સુદાન એપ્રિલ 2023 થી સેના અને RSF વચ્ચે ભીષણ યુદ્ધનો સામનો કરી રહ્યું છે. આર્મ્ડ કોન્ફ્લિક્ટ લોકેશન એન્ડ ઇવેન્ટ ડેટા (ACLED) અનુસાર, સંઘર્ષમાં ઓછામાં ઓછા 59,000 લોકો માર્યા ગયા છે. જો કે, સહાય સંસ્થાઓ કહે છે કે આ આંકડો વાસ્તવિક મૃત્યુઆંક કરતા નોંધપાત્ર રીતે ઓછો હોઈ શકે છે.

સંયુક્ત રાષ્ટ્ર માટે કામ કરતા નિષ્ણાતોના મતે, સુદાનમાંથી મોટા પ્રમાણમાં સોનાની દાણચોરી કરવામાં આવી છે અને તેમાંથી મળેલી રકમ RSF પ્રવૃત્તિઓને નાણાં પૂરા પાડવા માટે વપરાય છે. RSF દારફુર અને કોર્ડોફાન પ્રદેશોમાં કેટલાક સોનાના ઉત્પાદક વિસ્તારોને નિયંત્રિત કરે છે.