IND vs PAK: ભારતીય ટીમની જીતમાં બન્યો આ સૌથી મોટો ટર્નિંગ પોઈન્ટ, ફક્ત 9 બોલ અને પાકિસ્તાને કર્યું સરન્ડર

india vs pakistan image_X

સૂર્યકુમાર યાદવના નેતૃત્વ હેઠળની ભારતીય ટીમે T20 વર્લ્ડ કપ 2026 માં પાકિસ્તાન પર 61 રનથી ઐતિહાસિક વિજય મેળવીને સુપર 8 માં સ્થાન મેળવ્યું. ભારત અને પાકિસ્તાન વચ્ચેની મેચ કોલંબોના આર. પ્રેમદાસા સ્ટેડિયમ ખાતે રમાઈ હતી, જ્યાં ધીમી પિચ ઘણા સમયથી ચર્ચાનો વિષય બની રહી હતી, અને મેચ પણ એવી જ સાબિત થઈ. ટોસ હારીને પ્રથમ બેટિંગ કરવાનો નિર્ણય લીધા બાદ, ટીમ ઈન્ડિયાએ 20 ઓવરમાં 7 વિકેટ ગુમાવીને 175 રન બનાવ્યા હતા. આ લક્ષ્યનો પીછો કરતા, પાકિસ્તાની ટીમ 18 ઓવરમાં 114 રનમાં ઓલઆઉટ થઈ ગઈ હતી. અમે તમને આ મેચનો ટર્નિંગ પોઈન્ટ જણાવવા જઈ રહ્યા છીએ, જ્યાંથી ટીમ ઈન્ડિયાનો વિજય સંપૂર્ણપણે નિશ્ચિત થઈ ગયો હતો.

પાકિસ્તાને ફક્ત નવ બોલમાં કર્યું સરન્ડર 

આ મેચમાં ટીમ ઈન્ડિયાનો દાવ સમાપ્ત થયા પછી, બધાને અપેક્ષા હતી કે પાકિસ્તાની ટીમ સારી રીતે  લક્ષ્યનો પીછો કરશે. જોકે, ટીમ ઈન્ડિયાના બોલરોએ ફક્ત નવ બોલમાં મેચની પટકથા નક્કી કરી લીધી હતી. ઇનિંગની પહેલી ઓવર ફેંકવા આવેલા હાર્દિક પંડ્યાની ચોથી બોલે પાકિસ્તાની ટીમને પહેલો ફટકો આપ્યો, જેમાં સાહિબઝાદા ફરહાનને આઉટ કર્યો, જે ખાતું ખોલ્યા વિના જ  આઉટ થઈ ગયા. ત્યારબાદ જસપ્રીત બુમરાહે બીજી ઓવર ફેંકી, બીજા બોલે સેમ અયુબની વિકેટ લીધી અને પછી ઓવરના છેલ્લા બોલે સલમાન અલી આગાની વિકેટ લીધી. આમ, ફક્ત નવ બોલમાં, પાકિસ્તાને ત્રણ મહત્વપૂર્ણ વિકેટ ગુમાવી દીધી, જ્યાર્બાદ  તેઓ મેચ જીતવાની આશાથી ખૂબ દૂર થઈ ગયા અને બાકીના બેટ્સમેન પર તેનું દબાણ સ્પષ્ટ જોવા મળ્યું. 

 T20 વર્લ્ડ કપમાં પાકિસ્તાનને મળી બીજી સૌથી મોટી હાર 

આ હાર પાકિસ્તાન માટે અનેક રીતે ઐતિહાસિક અને શરમજનક સાબિત થઈ છે
1. ભારત સામે સૌથી મોટી હાર: રન માર્જિન (61 રન) ની દ્રષ્ટિએ T20 આંતરરાષ્ટ્રીય ક્રિકેટમાં ભારત સામે પાકિસ્તાનની આ સૌથી મોટી હાર છે.

2. વર્લ્ડ કપની બીજી સૌથી મોટી હાર: T20 વર્લ્ડ કપના ઈતિહાસમાં પાકિસ્તાનની આ બીજી સૌથી મોટી હાર છે (પ્રથમ 2014માં વેસ્ટ ઈન્ડિઝ સામે 84 રનની હાર હતી).

3. ત્રીજો સૌથી ઓછો સ્કોર: 114 રન પર ઓલઆઉટ થવું એ પાકિસ્તાન માટે T20 વર્લ્ડ કપના ઈતિહાસનો ત્રીજો સૌથી ઓછો સ્કોર બની ગયો છે.