DMK કે AIADMK એ જો સરકાર બનાવવાની કોશિશ કરી તો TVK નાં બધા 108 ધારાસભ્યો આપશે રાજીનામું

તમિલનાડુ વિધાનસભા ચૂંટણીમાં સૌથી વધુ બેઠકો જીતનાર વિજયની પાર્ટી TVK સરકાર બનાવવા માટે પૂરજોશમાં પ્રયાસ કરી રહી છે. TVK એ સ્પષ્ટ ચેતવણી આપી છે કે જો DMK અને AIADMK સાથે મળીને સરકાર બનાવવાનો પ્રયાસ કરશે, તો તેના તમામ 107 ધારાસભ્યો સામૂહિક રીતે રાજીનામું આપી દેશે. વિજયને શંકા છે કે રાજ્યમાં સૌથી મોટા પક્ષને બાજુ પર રાખવા માટે DMK અને AIADMK વચ્ચે ગઠબંધન માટે બે મહત્વપૂર્ણ બેઠકો થઈ છે, જેના પગલે આ આકરું વલણ અપનાવવામાં આવ્યું છે.

રાજ્યપાલનો બહુમતી સાબિત કરવાનો આગ્રહ

TVK એ તેની પ્રથમ ચૂંટણીમાં જ 108 બેઠકો પર વિજય મેળવ્યો છે (જેમાં બે બેઠકો વિજયે પોતે જીતી હોવાથી ધારાસભ્યોની સંખ્યા 107 છે). સૌથી મોટા પક્ષ હોવાને નાતે વિજયે સરકાર બનાવવાનો દાવો રજૂ કર્યો હતો, પરંતુ રાજ્યપાલ આર.વી. આર્લેકરે તેમને સરકાર બનાવવાની મંજૂરી આપવાનો ઇનકાર કર્યો છે. રાજ્યપાલે સ્પષ્ટ કર્યું છે કે વિજય પાસે જરૂરી બહુમતીનો આંકડો નથી અને તેમણે સરકાર બનાવવા માટે 118 ધારાસભ્યોના સમર્થન પત્રો રજૂ કરવા પડશે.

સંખ્યાબળ અને રાજભવનનું વલણ

રાજભવન દ્વારા બહાર પાડવામાં આવેલી અખબારી યાદી મુજબ, તમિલનાડુ વિધાનસભામાં સરકાર બનાવવા માટે જરૂરી જાદુઈ આંકડો હજુ સુધી કોઈ પક્ષ દ્વારા સ્પષ્ટ રીતે રજૂ કરવામાં આવ્યો નથી. વિજય અને રાજ્યપાલ વચ્ચે બે દિવસમાં આ બીજી બેઠક હતી, જેમાં રાજ્યપાલે બહુમતીના પુરાવા વગર સરકાર રચવાનું આમંત્રણ આપવાનો આગ્રહ ઠુકરાવી દીધો હતો. આ ખેંચતાણને કારણે રાજ્યમાં રાજકીય અસ્થિરતાનો માહોલ જોવા મળી રહ્યો છે.

કમલ હાસનનો વિજયને ટેકો

આ રાજકીય સંકટ વચ્ચે 'મક્કલ નીધી મયમ'ના નેતા અને અભિનેતા કમલ હાસને વિજયને ટેકો જાહેર કર્યો છે. તેમણે જણાવ્યું હતું કે ચૂંટણીમાં જનતાએ જે જનાદેશ આપ્યો છે તેનું સન્માન થવું જોઈએ. હાસને દલીલ કરી હતી કે લોકશાહીની પરંપરા મુજબ, સૌથી મોટા પક્ષ તરીકે ઉભરી આવેલા TVK ના વડા વિજયને જ સૌપ્રથમ સરકાર બનાવવા માટે આમંત્રિત કરવા જોઈએ.