PM Modi Gujarat Visit: ભીલડીમાં રોડ-શો બાદ વડાપ્રધાને ગાયોને ઘાસ ખવડાવ્યું, કેવડિયામાં 'એકતા પ્રકાશ પર્વ'માં આપશે હાજરી

PM Modi Visit BBBRC

વડાપ્રધાન નરેન્દ્ર મોદી ગુજરાતના બે દિવસીય પ્રવાસે પહોંચ્યા છે. આ પ્રવાસ દરમિયાન તેમણે બનાસકાંઠાના ભીલડી ખાતે ભવ્ય રોડ-શો કર્યો હતો, જેમાં મોટી સંખ્યામાં નાગરિકો અને ગ્રામજનો ઉત્સાહભેર જોડાયા હતા. રોડ-શો બાદ વડાપ્રધાન BBBRC સેન્ટર પહોંચ્યા હતા, જ્યાં તેમણે ગાયોને વ્હાલ કરી ઘાસ ખવડાવ્યું હતું તથા વાછરડાઓને પ્રેમાળ ભાવે દૂધ પીવડાવ્યું હતું. આ સાથે તેમણે BBBRC સેન્ટરમાં અધ્યતન ET-IVF લેબનું ઉદ્ઘાટન પણ કર્યું હતું.

પોતાના આ પ્રવાસ દરમિયાન પીએમ મોદી ગાંધીનગર, બનાસકાંઠા અને કેવડિયા (એકતાનગર) ખાતે આયોજિત વિવિધ કાર્યક્રમોમાં હાજરી આપશે. ભીલડી ખાતે આયોજિત રાષ્ટ્રીય 'પીએમ કિસાન ઉત્સવ દિવસ' દરમિયાન તેઓ ખેડૂતોને આર્થિક સહાય પૂરી પાડવાની સાથે બનાસ ડેરીના વિવિધ પ્રોજેક્ટ્સનું લોકાર્પણ અને ખાતમુહૂર્ત કરશે. આ ઉપરાંત તેઓ ભીલડીમાં જનસભાને પણ સંબોધિત કરશે.

પ્રવાસના પ્રથમ દિવસે 30 ઓક્ટોબરે સવારે ડીસા એરપોર્ટ આગમન બાદ BBBRC સેન્ટરની મુલાકાત લઈ તેઓ ગાંધીનગર રાજભવન પહોંચશે, જ્યાં રાજકીય અને સંગઠનના આગેવાનો સાથે બેઠકો યોજાશે. ત્યારબાદ સાંજે કેવડિયા પહોંચી તેઓ ભારત પર્વ પેવેલિયન, રેન ફોરેસ્ટ તથા વમન વૃક્ષ વાટિકાની મુલાકાત લેશે. રાત્રિના સમયે તેઓ કલ્ચર ગ્રાઉન્ડ પર 'આનંદ મઠ' નાટક, એકતા પ્રકાશ પર્વ અને નર્મદા ઘાટ ખાતે વિશ્વપ્રસિદ્ધ નર્મદા આરતીમાં સહભાગી થશે.

બીજા દિવસે 31 ઓક્ટોબરે રાષ્ટ્રીય એકતા દિવસ નિમિત્તે વડાપ્રધાન સ્ટેચ્યુ ઓફ યુનિટી ખાતે સરદાર વલ્લભભાઈ પટેલને પુષ્પાંજલિ અર્પણ કરશે. આ સાથે તેઓ કેવડિયાના નવા વિકાસકામોનું લોકાર્પણ કરશે અને ભવ્ય એકતા દિવસની રાષ્ટ્રીય ઉજવણી તથા પરેડમાં વિશેષ ઉપસ્થિતિ આપશે. તમામ કાર્યક્રમો પૂર્ણ કર્યા બાદ તેઓ વડોદરા એરપોર્ટ પરથી દિલ્હી જવા રવાના થશે.