ગુજરાત સરકારની મોટી જાહેરાત: શ્રેષ્ઠ કામગીરી કરનાર અધિકારીઓ માટે 'અટલ સુશાસન પુરસ્કાર યોજના' અમલમાં

bhupendra patel

ગુજરાત રાજ્યના અધિકારીઓ અને કર્મચારીઓની કામગીરીને બિરદાવવા તેમજ પ્રોત્સાહન આપવા માટે રાજ્ય સરકાર દ્વારા એક મહત્વપૂર્ણ નિર્ણય લેવામાં આવ્યો છે. પૂર્વ વડાપ્રધાન અટલ બિહારી વાજપેયીની 100 મી  જન્મજયંતી વર્ષની ઉજવણીના ભાગરૂપે ‘અટલ સુશાસન પુરસ્કાર યોજના’ અમલમાં મૂકવામાં આવી છે. આ યોજના હેઠળ હવેથી દર વર્ષે રાજ્યના અધિકારીઓને તેમની ઉત્કૃષ્ટ કામગીરી માટે સન્માનિત કરવામાં આવશે.

 યોજના અંગે પરિપત્ર જાહેર અને પસંદગીના માપદંડ

રાજ્ય સરકાર દ્વારા આ એવોર્ડ અંગેનો વિગતવાર પરિપત્ર જાહેર કરી દેવામાં આવ્યો છે. આ પરિપત્રમાં એવોર્ડ માટે પસંદ થનારા અધિકારીઓની પાત્રતા અને એવોર્ડની રકમ સંબંધિત માહિતી આપવામાં આવી છે. ખાસ કરીને વર્ગ-૧ અને વર્ગ-૨ના અધિકારીઓ દ્વારા કરવામાં આવેલી વિશેષ અને અસરકારક કામગીરીને ધ્યાનમાં રાખીને તેમને આ પુરસ્કાર માટે પસંદ કરવામાં આવશે.

 રૂ. 31  હજારના એવોર્ડ માટે નિર્ધારિત અધિકારીઓ

સરકાર દ્વારા જાહેર કરાયેલા પરિપત્ર મુજબ, અમુક ચોક્કસ હોદ્દા પર ફરજ બજાવતા અધિકારીઓને રૂ. 31  હજારની પુરસ્કાર રકમ સાથે એવોર્ડ એનાયત કરાશે. આ શ્રેણીમાં જિલ્લા આરોગ્ય અધિકારી, જિલ્લા શિક્ષણાધિકારી, કાર્યપાલક ઈજનેર તથા પુરવઠા અધિકારીનો સમાવેશ થાય છે. આ અધિકારીઓની કામગીરી અને યોગદાન બદલ તેમને આ પુરસ્કાર મળશે.

 રૂ. 21 હજારના એવોર્ડ માટે નિર્ધારિત અધિકારીઓ

આ યોજનામાં અન્ય મહત્વના હોદ્દાઓ ધરાવતા અધિકારીઓ માટે રૂ. 21  હજારની પુરસ્કાર રકમ નક્કી કરવામાં આવી છે. જેમાં મામલતદાર, તાલુકા વિકાસ અધિકારી (TDO) અને જિલ્લા રમતગમત અધિકારીનો સમાવેશ થાય છે. આ અધિકારીઓને તેમની ક્ષેત્રીય કામગીરી અને જવાબદારીઓને આધારે ‘અટલ સુશાસન પુરસ્કાર’થી સન્માનિત કરાશે.

સરકારી કામગીરીને પ્રોત્સાહન અને યોજનાનો મુખ્ય હેતુ

આ યોજના અમલમાં મૂકવાનો મુખ્ય ઉદ્દેશ્ય સરકારી તંત્રમાં ઉત્કૃષ્ટ કામગીરી કરનારા અધિકારીઓની ઓળખ કરી તેમને યોગ્ય સન્માન આપવાનો છે, જેથી અન્ય અધિકારીઓ અને કર્મચારીઓને પણ વધુ સારી કામગીરી કરવા માટે પ્રોત્સાહન મળી રહે. દર વર્ષે અપાનારા આ એવોર્ડથી વિવિધ વિભાગોમાં કાર્યક્ષમતા અને સુશાસનમાં વધારો થશે.