ગુજરાત પર મેઘરાજા મહેરબાન: દક્ષિણ ગુજરાત અને સૌરાષ્ટ્રમાં અતિભારે વરસાદની આશંકા, જાણો તમારા શહેરની સ્થિતિ
gujarat rain
રાજ્યમાં છેલ્લા બે-ત્રણ દિવસથી ચોમાસું બરાબર જામ્યું છે. સૌરાષ્ટ્ર, દક્ષિણ અને મધ્ય ગુજરાતમાં હળવોથી ભારે વરસાદ પડી રહ્યો છે. હવામાન વિભાગે આગામી સાત દિવસ માટે મહત્વની આગાહી કરી છે, જેમાં 2 જુલાઈના રોજ સુરત, નવસારી, વલસાડ અને ડાંગમાં અતિભારે વરસાદની આશંકાથી રેડ એલર્ટ જાહેર કરાયું છે. આ ઉપરાંત અમરેલી, ભાવનગર, ભરૂચ, નર્મદા અને તાપીમાં ભારેથી અતિભારે વરસાદ, જ્યારે ગીર સોમનાથ, રાજકોટ, જૂનાગઢ, બોટાદ, વડોદરા અને છોટા ઉદેપુરમાં ભારે વરસાદની શક્યતાને પગલે ઓરેન્જ અને યલો એલર્ટ આપવામાં આવ્યું છે. 3 થી 7 જુલાઈ દરમિયાન વરસાદનું જોર હજુ વધશે અને આ તમામ જિલ્લાઓમાં અતિભારે વરસાદનો સિલસિલો ચાલુ રહી શકે છે.
સામાન્ય વરસાદની આગાહી અને મુખ્ય શહેરોનું હવામાન
અમદાવાદ, ગાંધીનગર, સુરેન્દ્રનગર, મહેસાણા, પાટણ, બનાસકાંઠા, કચ્છ, મોરબી, જામનગર, દેવભૂમિ દ્વારકા અને સાબરકાંઠા સહિતના ઉત્તર ગુજરાત અને ઉત્તર સૌરાષ્ટ્રના જિલ્લાઓમાં હળવોથી મધ્યમ વરસાદ થવાની શક્યતા છે. શહેરોના તાપમાનની વાત કરીએ તો:
• અમદાવાદ: ભારે પવન સાથે છૂટાછવાયા વરસાદની શક્યતા (મહત્તમ તાપમાન 39°C, લઘુત્તમ 29°C).
• રાજકોટ: છૂટાછવાયા સ્થળોએ ભારે વરસાદની સંભાવના (મહત્તમ તાપમાન 34°C, લઘુત્તમ 27°C).
• સુરત: અતિથી અતિભારે વરસાદની આગાહી (મહત્તમ તાપમાન 30°C, લઘુત્તમ 25°C).
• વડોદરા: ભારે વરસાદની સંભાવના (મહત્તમ તાપમાન 34°C, લઘુત્તમ 29°C).
દેશ અને રાજ્યમાં ચોમાસાની પ્રગતિની સ્થિતિ
દક્ષિણ-પશ્ચિમ ચોમાસું હાલ ઉત્તર અરબી સમુદ્ર, ગુજરાત, દમણ-દીવ, મધ્યપ્રદેશ અને ઉત્તર પ્રદેશના મોટાભાગના વિસ્તારોમાં આગળ વધી ગયું છે. આ ઉપરાંત ઉત્તરાખંડ, હિમાચલ પ્રદેશ, લદ્દાખ, જમ્મુ-કાશ્મીર, હરિયાણા અને પંજાબમાં પણ ચોમાસું સક્રિય થયું છે. ગુજરાતમાં અત્યારે ચોમાસાની રેખા પોરબંદર અને વલ્લભ વિદ્યાનગર પરથી પસાર થઈ રહી છે. આગામી બે દિવસમાં ચોમાસું સમગ્ર ગુજરાત, દિલ્હી, પંજાબ અને રાજસ્થાનના બાકીના વિસ્તારોને પણ આવરી લે તેવી મજબૂત શક્યતાઓ છે.
દરિયાકાંઠાના વિસ્તારો માટે તોફાન અને માછીમારો માટે કડક ચેતવણી
ગુજરાતના દરિયાકાંઠાના વિસ્તારો જેમ કે અમરેલી, ભાવનગર, દ્વારકા, ગીર સોમનાથ, જૂનાગઢ, કચ્છ, પોરબંદર અને વલસાડમાં ઊંચા અને તોફાની મોજાં ઉછળવાની શક્યતા હોવાથી 'હાઇવેવ અને સ્વેલ સર્જ વોચ' જાહેર કરાઈ છે. જખૌ, માંડવી, મુન્દ્રા, ઓખા, વેરાવળ, દીવ, પીપાવાવ અને અલંગ સહિતના તમામ બંદરો પર ૫ જુલાઈ સુધી 40 થી 60 કિમી પ્રતિ કલાકની ઝડપે તોફાની પવન ફૂંકાઈ શકે છે. આ ખરાબ હવામાનને ધ્યાનમાં રાખીને માછીમારોને આગામી ૫ જુલાઈ સુધી દરિયો ન ખેડવાની કડક ચેતવણી આપવામાં આવી છે અને પ્રવાસીઓને દરિયાકાંઠે બિનજરૂરી અવરજવર ટાળવા સૂચના અપાઈ છે.
