ગુજરાતમાં પહેલી 'મેડ ઇન ઇન્ડિયા' સેમિકન્ડક્ટર ચિપ તૈયાર! ઇઝરાયલની મુલાકાત પછી પીએમ મોદી કરી શકે છે લોન્ચ

India First Semiconductor Chip

ભારત ટેકનોલોજીના ક્ષેત્રમાં એક મોટી છલાંગ લગાવવા જઈ રહ્યું છે. વડાપ્રધાન નરેન્દ્ર મોદી તેમની ઇઝરાયલ મુલાકાતથી પરત ફર્યા બાદ ટૂંક સમયમાં ગુજરાતમાં દેશની પ્રથમ સ્વદેશી રીતે ઉત્પાદિત 'મેડ ઇન્ડિયા' સેમિકન્ડક્ટર ચિપનું લોન્ચિંગ કરે તેવી પ્રબળ શક્યતા છે. અમદાવાદ નજીક સાણંદમાં અમેરિકન કંપની માઇક્રોન ટેકનોલોજી(Micron Technology)ના સહયોગથી સ્થાપિત સેમિકન્ડક્ટર એસેમ્બલી અને ટેસ્ટિંગ પ્લાન્ટ હવે ઉત્પાદન માટે સજ્જ છે, જે ભારતને આ ક્ષેત્રમાં આત્મનિર્ભર બનાવવાની દિશામાં સીમાચિહ્નરૂપ સાબિત થશે.

મહાત્મા મંદિરમાં સેમીકનેક્ટ 3.0

ગુજરાત સરકાર 1 માર્ચ, 2026 ના રોજ ગાંધીનગરના મહાત્મા મંદિર ખાતે સેમીકનેક્ટ કોન્ફરન્સ 2026 ની ત્રીજા સંસ્કરણનું   આયોજન કરશે. ગુજરાતના મુખ્યમંત્રી ભૂપેન્દ્ર પટેલ કેન્દ્રીય ઇલેક્ટ્રોનિક્સ અને માહિતી ટેકનોલોજી (આઇટી), રેલ્વે અને માહિતી અને પ્રસારણ મંત્રી અશ્વિની વૈષ્ણવ, ગુજરાતના નાયબ મુખ્યમંત્રી હર્ષ સંઘવી અને વિજ્ઞાન અને ટેકનોલોજી મંત્રી અર્જુન મોઢવાડિયાની હાજરીમાં આ કોન્ફરન્સનું ઉદ્ઘાટન કરશે. આ બે દિવસીય કાર્યક્રમ સાણંદમાં યોજાશે. કોન્ફરન્સની થીમ "ગુજરાત : ઈન્ડિયા ગેટવે ટુ સિલિકોન (ગુજરાત: ભારતનો સિલિકોનનો પ્રવેશદ્વાર"), જે ભારતના સેમિકન્ડક્ટર ઇકોસિસ્ટમ માટે એક મુખ્ય કેન્દ્ર તરીકે સ્થાપિત કરવાની રાજ્યની મહત્વાકાંક્ષાને પ્રતિબિંબિત કરે છે. સૂત્રોના જણાવ્યા અનુસાર, પીએમ મોદી ઇઝરાયલથી પરત ફર્યા બાદ પ્રથમ મેડ ઇન ઇન્ડિયા સેમિકન્ડક્ટર રાષ્ટ્રને સમર્પિત કરશે.

ટૂંક સમયમાં કાર્યક્રમની જાહેરાત થવાની શક્યતા 

એવી અપેક્ષા છે કે વડા પ્રધાન નરેન્દ્ર મોદીના કાર્યક્રમની સત્તાવાર જાહેરાત ટૂંક સમયમાં થઈ શકે છે. શરૂઆતમાં, પીએમ મોદીની ગુજરાત મુલાકાતની તારીખ 23 ફેબ્રુઆરી હતી. બાદમાં, એવું કહેવામાં આવ્યું હતું કે તેઓ 28 ફેબ્રુઆરીએ આવશે. તેમની મુલાકાત દરમિયાન, પીએમ મોદી અમદાવાદ નજીક સાણંદમાં સેમિકન્ડક્ટર ઉત્પાદન સુવિધાનું ઉદ્ઘાટન કરી શકે છે. આ મુલાકાત દરમિયાન, વડા પ્રધાન દેશની પ્રથમ સ્વદેશી રીતે ઉત્પાદિત સેમિકન્ડક્ટર ચિપનું પણ લોન્ચિંગ કરી શકે છે. પીએમ મોદી 27 ફેબ્રુઆરીએ ઇઝરાયલથી પરત ફરશે. આ મુલાકાત ખૂબ જ મહત્વપૂર્ણ માનવામાં આવે છે કારણ કે આગામી દિવસોમાં રાજ્યમાં મ્યુનિસિપલ કોર્પોરેશન, મ્યુનિસિપલ કાઉન્સિલ, જિલ્લા પંચાયત અને તહસીલ પંચાયતની ચૂંટણીઓ પણ યોજાવાની છે.