વિશ્વ પર્યાવરણ દિવસે પીએમ મોદીની ગુજરાત મુલાકાત: દક્ષિણ ગુજરાતને મળશે રૂ.12,421 કરોડની ભેટ

વડાપ્રધાન નરેન્દ્ર મોદી 5 જૂન – વિશ્વ પર્યાવરણ દિવસના રોજ ગુજરાતના સુરતની મુલાકાતે આવી રહ્યા છે. આ ખાસ મુલાકાત દરમિયાન તેઓ દક્ષિણ ગુજરાત ક્ષેત્રના સર્વાંગી વિકાસ માટે રૂ.12,421 કરોડના વિશાળ રાષ્ટ્રીય ધોરીમાર્ગ (નેશનલ હાઈવે) પ્રોજેક્ટ્સ રાષ્ટ્રને સમર્પિત અને શિલાન્યાસ કરશે. આ પ્રોજેક્ટ્સ દક્ષિણ ગુજરાત સહિત સમગ્ર રાજ્યમાં રોડ કનેક્ટિવિટીને અત્યંત મજબૂત બનાવશે અને સ્થાનિક આર્થિક વિકાસને નવી ગતિ આપશે. પીએમ મોદી આ પ્રવાસ દરમિયાન વડોદરા-મુંબઈ એક્સપ્રેસવેના બે પેકેજનું ઉદ્ઘાટન કરવાની સાથે અન્ય ચાર મહત્ત્વપૂર્ણ પ્રોજેક્ટ્સનો શિલાન્યાસ પણ કરશે.

રૂ. 7,689 કરોડના ખર્ચે તૈયાર થયેલા વડોદરા-મુંબઈ એક્સપ્રેસવેના બે પેકેજ દેશને સમર્પિત કરાશે

પોતાના પ્રવાસ દરમિયાન વડાપ્રધાન વડોદરા-મુંબઈ એક્સપ્રેસવેના બે મહત્વના સેક્શન દેશને સમર્પિત કરશે. જેમાં ₹7,689 કરોડના ખર્ચે તૈયાર થયેલા 36 કિલોમીટર લાંબા કિમ-એના સેક્શન (પેકેજ 6) અને 27.50 કિલોમીટર લાંબા ગાંડેવા-એના સેક્શન (પેકેજ 7) નો સમાવેશ થાય છે. આ આધુનિક 8-લેન હાઈવે શરૂ થવાથી પ્રદેશમાં ઝડપી પરિવહન શક્ય બનશે. વાહનચાલકોની સુવિધા અને સલામતી માટે આ બંને પેકેજમાં મુખ્ય પુલ, ફ્લાયઓવર, વાહન અંડરપાસ (VUPs), સ્થાનિક લોકો માટે 70 અંડરપાસ, 2 ઇન્ટરચેન્જ અને 7 સુસજ્જ આરામ વિસ્તારો (રેસ્ટ એરિયા) વિકસાવવામાં આવ્યા છે.

ભારતમાલા પરિયોજના: લોજિસ્ટિક્સ ખર્ચ ઘટશે અને માલસામાનની અવરજવર ઝડપી બનશે

દિલ્હી-મુંબઈ એક્સપ્રેસવેના આ બે પેકેજો કાર્યરત થવાથી દેશના વેપાર જગતને મોટો ફાયદો થશે. ભારતમાલા પરિયોજનાના મુખ્ય ઉદ્દેશ્યોને અનુરૂપ, આ માર્ગોથી માલસામાનની અવરજવર ખૂબ જ ઝડપી બનશે અને સ્થાનિક ઉદ્યોગો માટે લોજિસ્ટિક્સ (પરિવહન) ખર્ચ ઘટાડવામાં મોટી મદદ મળશે. ઔદ્યોગિક હબ ગણાતા દક્ષિણ ગુજરાતમાંથી દેશના અન્ય ભાગોમાં કાચો માલ લાવવા અને તૈયાર માલ મોકલવાનો સમય ઘણો ઘટી જશે, જે આર્થિક રીતે સમગ્ર ક્ષેત્ર માટે ગેમ-ચેન્જર સાબિત થશે.

રૂ.4,732 કરોડના ખર્ચે NH-56 નું અપગ્રેડેશન: આદિવાસી જિલ્લાઓ અને સ્ટેચ્યુ ઓફ યુનિટીનું જોડાણ મજબૂત થશે

આ ઉપરાંત, નેશનલ હાઇવે ઓથોરિટી ઓફ ઇન્ડિયા (NHAI) દ્વારા રૂ. 4,732 કરોડના ખર્ચે ચાર વધારાના પ્રોજેક્ટ્સનો શિલાન્યાસ કરવામાં આવશે. આ અંતર્ગત NH-56 પર ધમસિયાથી બિટાડા/મોવી (પેકેજ 4) અને નસરપુરથી માલોથા (પેકેજ 6) સુધીના રસ્તાઓને ફોર-લેન બનાવવામાં આવશે. 107.67 કિલોમીટરની લંબાઈ ધરાવતા આ ફોર-લેન રોડથી નર્મદા, તાપી, વલસાડ અને છોટા ઉદેપુર જેવા આદિવાસી જિલ્લાઓ તેમજ સ્ટેચ્યુ ઓફ યુનિટી સાથેની કનેક્ટિવિટી અદભુત બનશે. આનાથી મુસાફરીનો સમય 40 મિનિટ ઘટશે અને વાહનોની સરેરાશ ગતિ 75% વધશે, જે સ્થાનિક ફાર્મા, મેડિકલ અને સીફૂડ ક્લસ્ટર સહિત 2 બંદરો અને એરપોર્ટને સીધો ફાયદો પહોંચાડશે.