CMO બોમ્બ ધમકી કેસમાં બે આરોપી ઝડપાયા, બિહાર-ઝારખંડથી સાયબર સેલે દબોચ્યા

ગુજરાતના મુખ્યમંત્રી કાર્યાલય (CMO) સહિત રાજ્યના કેટલાક મહત્વના સરકારી સ્થળોને બોમ્બથી ઉડાવી દેવાની ધમકી આપતા ઈ-મેઈલ મામલે સાયબર સેલને મોટી સફળતા મળી છે. ધમકીભર્યા ઈ-મેઈલની ટેક્નિકલ તપાસ બાદ પોલીસે બિહાર અને ઝારખંડમાંથી બે શખ્સોને ઝડપી લીધા છે. બંને આરોપીઓની પૂછપરછ સાથે સમગ્ર મામલે વધુ તપાસ હાથ ધરવામાં આવી રહી છે.

BRICS સમિટને લઈને પણ મળી હતી ધમકી

આ કેસમાં તપાસ દરમિયાન ચોંકાવનારી વિગતો સામે આવી છે. નવી દિલ્હીમાં યોજાનારી BRICS સમિટ દરમિયાન ભારતના સહયોગી મિત્ર દેશોને પણ બોમ્બ વિસ્ફોટની ધમકી આપવામાં આવી હોવાની માહિતી મળી છે. આથી સમગ્ર મામલો સુરક્ષા એજન્સીઓ માટે વધુ ગંભીર બન્યો હતો.

સાયબર સેલે ઈ-મેઈલના ટેક્નિકલ ટ્રેલના આધારે ધમકી મોકલનાર વ્યક્તિઓ સુધી પહોંચવા માટે તપાસ શરૂ કરી હતી. તપાસ દરમિયાન બિહાર અને ઝારખંડમાંથી બે મુખ્ય આરોપીઓને ઝડપી લેવામાં આવ્યા છે. હવે તેમની પૂછપરછના આધારે આ કાવતરામાં અન્ય કોઈ વ્યક્તિ સંડોવાયેલી છે કે કેમ તે અંગે તપાસ કરવામાં આવી રહી છે.

ગાંધીનગર સચિવાલયને મોકલાયો હતો ધમકીભર્યો ઈ-મેઈલ

મળતી માહિતી મુજબ, ગાંધીનગર સચિવાલયના ઓફિશિયલ ઈ-મેઈલ આઈડી પર ધમકીભર્યો સંદેશ મોકલવામાં આવ્યો હતો. ઈ-મેઈલમાં સચિવાલય પરિસર તેમજ નવી દિલ્હીમાં યોજાનારી BRICS સમિટમાં વિસ્ફોટ કરવાની ધમકી આપવામાં આવી હતી.

ધમકીની જાણ થતાં જ સુરક્ષા એજન્સીઓ સતર્ક થઈ ગઈ હતી. સચિવાલય પરિસરમાં બોમ્બ સ્ક્વોડ અને ડોગ સ્ક્વોડની મદદથી સઘન તપાસ હાથ ધરવામાં આવી હતી. સ્થાનિક પોલીસે પણ સમગ્ર પરિસરની ચકાસણી કરી હતી.

તપાસમાં કોઈ શંકાસ્પદ વસ્તુ મળી નહોતી

સુરક્ષા ટીમો દ્વારા સચિવાલયમાં કરવામાં આવેલી તપાસ દરમિયાન કોઈ શંકાસ્પદ વસ્તુ કે વિસ્ફોટક સામગ્રી મળી આવી નહોતી. જેના કારણે પ્રાથમિક તપાસમાં ધમકી ખોટી હોવાનું સામે આવ્યું હતું.

જોકે, ધમકીભર્યા ઈ-મેઈલને ગંભીરતાથી લઈને સાયબર સેલે તેની ટેક્નિકલ તપાસ શરૂ કરી હતી. ઈ-મેઈલના સ્ત્રોત અને તેને મોકલનારા લોકો સુધી પહોંચ્યા બાદ બિહાર અને ઝારખંડમાંથી બે આરોપીઓની ધરપકડ કરવામાં આવી છે. હવે તપાસ એ દિશામાં આગળ વધી રહી છે કે આ ધમકી પાછળનો હેતુ શું હતો અને અન્ય કોઈ વ્યક્તિ કે સંગઠનની તેમાં ભૂમિકા છે કે નહીં.