સ્થાનિક સ્વરાજ્યની ચૂંટણી માટે ભાજપની કડક નીતિ: ગુનાહિત ઇતિહાસ અને લોબિંગ કરનારાઓના પત્તાં કપાશે

Publish: Sat, 4 Apr 2026 (15:05 IST) Updated: Sat, 4 Apr 2026 (15:21 IST)

ભારતીય જનતા પાર્ટીએ આગામી સ્થાનિક સ્વરાજ્યની ચૂંટણીઓ માટે પોતાની રણનીતિ સ્પષ્ટ કરી દીધી છે. પક્ષની શિસ્ત સમિતિએ લીધેલા નિર્ણય મુજબ, આ વખતે ઉમેદવારોની પસંદગીમાં પારદર્શિતા અને નૈતિકતા પર વિશેષ ભાર મૂકવામાં આવશે. ભાજપે સ્પષ્ટ કર્યું છે કે પક્ષની છબીને પ્રાથમિકતા આપીને જ મેદાનમાં ઉતરશે, જેથી જનતામાં સકારાત્મક સંદેશ જાય.

ગુનાહિત ઇતિહાસ ધરાવતાઓને નો એન્ટ્રી

આ નવી નીતિ મુજબ, ગુનાહિત ઇતિહાસ ધરાવતા કોઈપણ વ્યક્તિને પક્ષ તરફથી ટિકિટ આપવામાં આવશે નહીં. પક્ષના જૂના કે સક્રિય કાર્યકર્તા હોવા છતાં, જો કોઈની સામે ગુનાહિત કેસ કે ગંભીર આક્ષેપો હશે, તો તેમને ઉમેદવારીની તક મળશે નહીં. ભાજપ આ પગલા દ્વારા સ્વચ્છ પ્રતિભા ધરાવતા નેતૃત્વને પ્રોત્સાહન આપવા માંગે છે.

લોબિંગ કરનારાઓ સામે લાલ આંખ

ટિકિટ મેળવવા માટે થતા આંતરિક દબાણ અને લોબિંગ સામે પણ પક્ષે લાલ આંખ કરી છે. જે કાર્યકર્તાઓ સત્તા કે પદ માટે લોબિંગ કરશે, તેમને ટિકિટનો મેન્ડેટ આપવામાં આવશે નહીં. પક્ષે સ્પષ્ટ કર્યું છે કે માત્ર લાયકાત અને પક્ષ પ્રત્યેની વફાદારીના આધારે જ ઉમેદવારોની પસંદગી કરવામાં આવશે, જેથી જૂથવાદને કાબૂમાં રાખી શકાય.

શિસ્તભંગ સામે કડક કાર્યવાહીના સંકેત

પક્ષની શિસ્ત જાળવવા માટે શિસ્તભંગ કરનારા અને પક્ષ વિરોધી પ્રવૃત્તિઓમાં સામેલ લોકો સામે કડક કાર્યવાહીના સંકેત આપવામાં આવ્યા છે. આવા કિસ્સાઓમાં કોઈ પણ પ્રકારની ઢીલ મૂક્યા વગર કાર્યકર્તાઓને તાત્કાલિક અસરથી સસ્પેન્ડ કરવામાં આવશે. ભાજપ આ કડક નીતિ દ્વારા આવનારી ચૂંટણીમાં શિસ્તબદ્ધ અને પ્રતિબદ્ધ ઉમેદવારોની ફોજ સાથે મેદાનમાં ઉતરવાની તૈયારી કરી રહ્યું છે.