ગુજરાતના જે શહેરમાં પીએમ મોદીને મળ્યો સૌથી વધુ પ્રેમ, ત્યાથી વિપક્ષને Gen Z મુદ્દે આપશે જવબ

PM Modi Gujarat Visit

વિદેશ પ્રવાસ પરથી પાછા ફર્યા બાદ વડાપ્રધાન નરેન્દ્ર મોદી ગુજરાતની મુલાકાતે આવી રહ્યા છે. 2014ની લોકસભા ચૂંટણીમાં તેમના મતવિસ્તાર રહી ચૂકેલા વડોદરાથી પીએમ મોદી વિપક્ષને Gen Z ના મુદ્દા પર યોગ્ય જવાબ આપશે. દિલ્હીમાં ભાજપના રાષ્ટ્રીય અધ્યક્ષ નીતિન નવીનની અધ્યક્ષતામાં મળેલી બેઠક બાદ આ કાર્યક્રમની તૈયારીઓ શરૂ થઈ ગઈ હતી. NEET પેપર લીક અને ત્યારબાદ CJPના નેતૃત્વ હેઠળના Gen Z ના વિરોધ પ્રદર્શનો બાદ, આ કાર્યક્રમમાં પીએમ મોદી વ્યક્તિગત રીતે યુનિવર્સિટીની મુલાકાત લઈને યુવાનો સાથે વાતચીત કરશે.

MS યુનિવર્સિટી પેવેલિયન ખાતે યોજાશે ખાસ કાર્યક્રમ

પીએમ મોદીના કાર્યક્રમ માટે મહારાજા સયાજીરાવ (MS) યુનિવર્સિટી પેવેલિયનને આખરી ઓપ આપવામાં આવ્યો છે. ગુજરાતના નાયબ મુખ્યમંત્રી હર્ષ સંઘવી અને ભાજપ યુવા મોરચાના પ્રમુખ હેમાંગ જોશીએ સંયુક્ત રીતે કાર્યક્રમનું નિરીક્ષણ કર્યું હતું. આ કાર્યક્રમમાં 6,000 થી વધુ યુવાનો અને વિદ્યાર્થીઓ ભાગ લેશે તેવી અપેક્ષા છે. આ કાર્યક્રમ 8 સપ્ટેમ્બરના રોજ યોજાશે. 'ઓપરેશન સિંદૂર' પછી પણ પીએમ મોદીએ વડોદરામાં જ તેમનો પહેલો રોડ શો યોજ્યો હતો.

વડોદરા અને પીએમ મોદીનો ખાસ અને અતૂટ સંબંધ

સંસદીય કારકિર્દીમાં પીએમ મોદીને સૌથી વધુ પ્રેમ અને ટેકો વડોદરામાંથી જ મળ્યો છે. 2014 ની ચૂંટણીમાં તેમને 8,45,464 મત મળ્યા હતા, જે કુલ મતના 72.75% છે. 2024 ની ચૂંટણીમાં વડોદરા બેઠક પર ભાજપના નવા ઉમેદવાર હેમાંગ જોશીને કુલ 8,73,189 મત મળ્યા, જે કુલ મતના 72.04% છે. પીએમ મોદીએ 2014 માં વડાપ્રધાન તરીકે શપથ લેતા પહેલા તેમની છેલ્લી વિજય રેલી પણ વડોદરામાં યોજી હતી. તેઓ RSS પ્રચારક અને ભાજપ સંગઠક તરીકે અહીં લાંબો સમય વિતાવી ચૂક્યા છે.

પીએમ મોદીની આ મુલાકાતનું ખાસ રાજકીય મહત્વ

પીએમ મોદી તેમના જન્મદિવસના માત્ર 10 દિવસ પહેલા વડોદરાની મુલાકાતે આવી રહ્યા છે. પીએમ નરેન્દ્ર મોદીનો જન્મદિવસ 17 સપ્ટેમ્બરે છે, જેમાં તેઓ 76 વર્ષના થશે. આ ઉપરાંત, પીએમ મોદી 7 ઓક્ટોબરે બંધારણીય કાર્યકાળમાં 25 વર્ષ પૂર્ણ કરશે. આ ખાસ અવસર અને આગામી રાજકીય ઘટનાક્રમો પહેલાં યુવાનો વચ્ચે જઈને સંવાદ કરવો એ ભાજપ માટે ખૂબ મહત્વપૂર્ણ ગણાય છે.

ચુસ્ત સુરક્ષા વચ્ચે કાર્યક્રમનું લાઈવ પ્રસારણ થશે

પીએમ નરેન્દ્ર મોદીના આ કાર્યક્રમ માટે મંડપ તૈયાર થયા બાદ વડોદરા શહેર પોલીસે સુરક્ષા વધારી દીધી છે. પીએમ મોદી આ કાર્યક્રમમાં મર્યાદિત સંખ્યામાં વિદ્યાર્થીઓને સંબોધન કરશે, પરંતુ આ કાર્યક્રમ દેશભરમાં ગમે ત્યાં લાઈવ જોવા માટે ઉપલબ્ધ રહેશે જેથી તમામ યુવાનો સુધી તેમનો સંદેશ પહોંચી શકે.