'ચાર ચાર બંગડી વાળી ગાડી' ગીત ગાનાર કિંજલ દવેને કોર્ટની નોટિસ

'ચાર ચાર બંગડી વાળી ગાડી લઈ દઉ' ગીતની ગાયિકા કિંજલ દવેને આ ગીત મામલે ફરીથી કોર્ટની નોટિસ મળી છે. નવરાત્રીને આડે હવે ગણતરીના દિવસો બાકી રહ્યા છે ત્યારે ગીતના કોપીરાઇટ મામલે કિંજલને આ નોટિસ મળી છે. ઓસ્ટ્રેલિયાના ગુજરાતી સિંગર કાર્તિક પટેલે ફરી કોર્ટમાં ગીતના કોપીરાઇટ મામલે દાવો કર્યો છે. આ મામલે સિટી સિવિલ કોર્ટમાં દાવો કરવામાં આવ્યો છે. હવે આગામી દિવસોમાં કિંજલ દવેએ આ મામલે ફરીવાર કોર્ટમાં ખુલાસો કરવો પડશે. આ મામલે અગાઉ કોમર્શિયલ કોર્ટમાં કેસ થયો હતો. આ સમયે કોર્ટે યોગ્ય કોર્ટમાં કેસ દાખલ કરવાનું ફરમાન કર્યું હતું. ઓસ્ટ્રેલિયાના યુવકની દલીલ બાદ કોમર્શિયલ કોર્ટે કિંજલ દવેને આ ગીત ગાવા પર પ્રતિબંધ લગાવી દીધો હતો. કોર્ટના આદેશ બાદ કિંજલ દવેએ જાહેર કાર્યક્રમોમાં આ ગીત ગાવાનું બંધ કરી દીધું હતું, એટલું જ નહીં યુ-ટ્યુબ પરથી આ ગીતની સામગ્રી હટાવી લેવામાં આવી હતી. કિંજલ દવેએ દાવો કર્યો હતો કે આ ગીત તેના તરફથી નહીં પરંતુ સ્ટુડિયોની યુ-ટ્યુબ ચેનલ પરથી અપલોડ કરવામાં આવ્યું છે. જોકે, આ મામલે વર્ષની શરૂઆતમાં એટલે કે જાન્યુઆરીમાં ગુજરાત હાઇકોર્ટે કિંજલ દવેની અરજી બાદ રાહત આપતા કોમર્શિયલ કોર્ટના ગીત ગાવા પરના પ્રતિબંધને હટાવી લીધો હતો.ઓસ્ટ્રેલિયામાં કાઠિયાવાડી કિંગ તરીકે જાણીતા ગુજરાતી યુવકે આ ગીત પર કોમર્શિયલ કોર્ટમાં કોપીરાઈટનો દાવો કર્યો હતો. તેણે કહ્યું છે કે આ ગીત તેણે લખ્યું છે અને ગાયું પણ છે. જેની કિંજલ દવેએ નકલ કરી છે. અરજદારની કંપનીએ કોપીરાઇટ ધારા હેઠળ રજૂઆત કરી છે કે આ ગીત તેણે બનાવી તેનો વીડિયો યુટયૂબ પર વર્ષ 2016માં અપલોડ કર્યો હતો. તેના એક મહિના પછી ગીતમાં થોડા ફેરફારો કરી કિંજલ દવે એ આ ગીત ગાયું હતું.