કોવિશીલ્ડ : ઑક્સફર્ડ-એસ્ટ્રાઝેનેકાની રસીને કેટલાક દેશોમાં સસ્પેન્ડ કેમ કરાઈ?
ડેન્માર્કમાં કોરોના સામે રક્ષણ આપતી ઑક્સફર્ડ-એસ્ટ્રાઝેનેકા વૅક્સિન મુકાવવાને કારણે ત્રણ લોકોને આડઅસર થતાં ત્યાંની સરકારે આ રસીના મૉડલ AZD1222ને સસ્પેન્ડ કર્યું છે. આ નિર્ણય બાદ ઑસ્ટ્રિયા, એસ્ટોનિયા, આઇસલૅન્ડ અને થાઇલૅન્ડે પણ વૅક્સિન સામે કામચલાઉ રોક લાદી દીધી હતી.
નોંધનીય છે કે ભારતમાં આ વૅક્સિન કોવિશિલ્ડના નામ હેઠળ ફ્રન્ટલાઇન વર્કરો સહિત સામાન્ય લોકોને મોટા પ્રમાણમાં આપવામાં આવી રહી છે.
ટાઇમ્સ ઑફ ઇન્ડિયાના એક અહેવાલ અનુસાર આંતરરાષ્ટ્રીય પ્રતિબંધોને કારણે ભારતમાં પણ મેડિકલ બૉર્ડ્સ દ્વારા આ રસીનું રિવ્યૂ કરવાનો હુકમ કર્યો છે જ્યારે રસીકરણ બાદ થતી આડઅસરોના મુલ્યાંકન માટે પણ પ્રયાસો શરૂ કરી દેવાયા હોવાનું જાણવા મળી રહ્યું છે.
જોકે અત્યાર સુધી આ રસી મુકાવવાને કારણે કોઈ સાઇડ ઇફેક્ટ થઈ હોય તેવા જૂજ સંજોગો સામે આવ્યા છે તેથી ભારતમાં સત્તામંડળો દ્વારા હજુ આ રસીના સસ્પેન્શન અંગે કોઈ ચર્ચા થઈ કરાઈ રહી નથી.
નોંધનીય છે કે પુણેસ્થિત સિરમ ઇન્સ્ટિટ્યૂટ દ્વારા ભારતમાં આ રસી બનાવવાનું કામ કરવામાં આવી રહ્યું છે.
