અંબાજી મંદિરમાં ચૈત્રી નવરાત્રિનો પ્રારંભ: દર્શનના સમયમાં ફેરફાર, મંદિર જતા પહેલા જાણી લો ટાઈમિંગ

Publish: Wed, 18 Mar 2026 (18:28 IST) Updated: Wed, 18 Mar 2026 (18:36 IST)

ambaji temple

ગુજરાતના સુપ્રસિદ્ધ યાત્રાધામ અંબાજી ખાતે 19 March, 2026 થી ચૈત્રી નવરાત્રિનો મંગલ પ્રારંભ થઈ રહ્યો છે. આ આઠ દિવસીય ધાર્મિક મહોત્સવને ધ્યાનમાં રાખીને શ્રી આરાસુરી અંબાજી માતા દેવસ્થાન ટ્રસ્ટ દ્વારા શ્રદ્ધાળુઓની સુવિધા માટે દર્શન અને આરતીના સમયપત્રકમાં ફેરફાર જાહેર કરવામાં આવ્યો છે. નવરાત્રિના પ્રથમ દિવસે સવારે 07:30 કલાકે શાસ્ત્રોક્ત વિધિ વિધાન સાથે ઘટ સ્થાપન કરવામાં આવશે, જેની સાથે જ ભક્તિ પર્વની શરૂઆત થશે.

નવરાત્રિ દરમિયાન આરતી અને દર્શનનું નવું સમયપત્રક

ચૈત્ર સુદ એકમથી આઠમ સુધીના દિવસોમાં ભક્તો માટે દર્શનનો સમય ત્રણ તબક્કામાં વહેંચવામાં આવ્યો છે. દરરોજ સવારે 07:00 થી 07:30 સુધી માતાજીની આરતી થશે, ત્યારબાદ સવારે 07:30 થી 11:30 સુધી દર્શન ખુલ્લા રહેશે. બપોરે 12:00 કલાકે માતાજીને રાજભોગ ધરાવ્યા બાદ 12:30 થી 04:30 સુધી ફરી દર્શનનો લાભ મળશે. સાંજે 07:00 થી 07:30 સુધી સાંજની આરતી યોજાશે અને રાત્રે 09:00 વાગ્યા સુધી મંદિર દર્શનાર્થીઓ માટે ખુલ્લું રહેશે.

આઠમ અને પૂનમના દિવસે આરતી વહેલી યોજાશે

નવરાત્રિના ખાસ દિવસોએ ભક્તોના ભારે ધસારાને પહોંચી વળવા ટ્રસ્ટ દ્વારા વિશેષ વ્યવસ્થા કરવામાં આવી છે. ચૈત્ર સુદ આઠમ (26 March) અને ચૈત્ર સુદ પૂનમ (2 April) ના પવિત્ર દિવસે સવારની આરતી નિયત સમય કરતા વહેલી એટલે કે સવારે 06:00 વાગ્યે આયોજિત કરવામાં આવશે. આ ફેરફાર પાછળનો હેતુ વધુમાં વધુ માઈભક્તો આરતીના દર્શનનો લાભ લઈ શકે અને દર્શનની વ્યવસ્થા સુગમ રહે તેવો છે.

નવરાત્રિ બાદ મંદિરનો સમય ફરી યથાવત થશે

ચૈત્રી નવરાત્રિની પૂર્ણાહુતિ બાદ એટલે કે 27 March થી મંદિરનું સમયપત્રક ફરીથી તેના નિયમિત રૂટિન મુજબ અમલી બનશે. મંદિર ટ્રસ્ટ દ્વારા તમામ યાત્રાળુઓને વિનંતી કરવામાં આવી છે કે તેઓ નવા સમયપત્રકની નોંધ લઈને જ પોતાની યાત્રાનું આયોજન કરે. અંબાજી ખાતે નવરાત્રિ દરમિયાન હજારોની સંખ્યામાં ભક્તો ઉમટી પડવાની શક્યતા હોવાથી સુરક્ષા અને સુવિધાના તમામ આયોજન પૂર્ણ કરી લેવામાં આવ્યા છે.