અમદાવાદની ઝાયડસ, DPS, ઉદગમ સ્કૂલ અને ગાંધીનગર કોર્ટને બોમ્બની ધમકી: 'ખાલિસ્તાની' ઈમેઈલથી ખળભળાટ

ahmedabad school bomb threat

અમદાવાદની અગ્રણી શાળાઓ અને ગાંધીનગર સ્થિત ડિસ્ટ્રિક્ટ એન્ડ સેશન્સ કોર્ટને ઇમેઇલ દ્વારા બોમ્બથી ઉડાવી દેવાની ગંભીર ધમકી મળતા સમગ્ર વિસ્તારમાં સન્નાટો વ્યાપી ગયો છે. ઇમેઇલમાં 'ગુજરાત બોલેગા ખાલિસ્તાન ઝિંદાબાદ' જેવા લખાણનો ઉલ્લેખ કરવામાં આવ્યો હતો. અમદાવાદના વેજલપુરની ઝાયડસ સ્કૂલ, બોપલની DPS અને થલતેજની ઉદગમ સ્કૂલને આ ધમકીભર્યા મેઇલ મળ્યા હતા, જેના પગલે તંત્ર અને નાગરિકોમાં ભારે ચિંતાનો માહોલ સર્જાયો હતો.

 શાળાઓ તાત્કાલિક ખાલી કરાવાઈ અને વાલીઓમાં દોડધામ

ધમકી મળતા જ સુરક્ષાના ભાગરૂપે શાળાઓમાં વિદ્યાર્થીઓને તાત્કાલિક રજા આપી દેવામાં આવી હતી. વાલીઓને મેસેજ કરીને બાળકોને ઘરે લઈ જવા માટે સૂચના આપવામાં આવી હતી, જેને પગલે ભયના માહોલ વચ્ચે દોડતા દોડતા શાળાએ પહોંચેલા વાલીઓમાં દોડધામ મચી ગઈ હતી. ઘટનાની જાણ થતા જ બોમ્બ સ્ક્વોડ, ફાયર વિભાગ, પોલીસ અને 108 એમ્બ્યુલન્સની ટીમો સ્થળ પર પહોંચી ગઈ હતી અને શાળા પરિસરને સંપૂર્ણપણે ખાલી કરાવી સુરક્ષિત કરવામાં આવ્યું હતું.

 શિક્ષણ વિભાગ અને DEO નો શાળાઓને મહત્વપૂર્ણ આદેશ

આ ઘટના અંગે અમદાવાદના જિલ્લા શિક્ષણ અધિકારી (DEO) રોહિત ચૌધરીએ જણાવ્યું હતું કે, તમામ શાળાઓને ધમકી અંગેનો ઈમેઈલ આવ્યો છે કે કેમ તે ચકાસી લેવા સૂચના આપવામાં આવી છે. જે પણ શાળાને આવો ઈમેલ મળ્યો હોય તેમણે તુરંત પોલીસને જાણ કરવાની રહેશે. આ સાથે જ તમામ શાળાઓને બાળકોને સુરક્ષિત રીતે બહાર કાઢીને પોલીસ તપાસમાં પૂરો સહકાર આપવા માટે સ્પષ્ટ આદેશ આપવામાં આવ્યા છે.

 ગાંધીનગર કોર્ટ સંકુલમાં અફરાતફરી અને ખાલી કરાવાયેલું પરિસર

ગાંધીનગર સ્થિત ડિસ્ટ્રિક્ટ એન્ડ સેશન્સ કોર્ટને પણ અજાણ્યા અસામાજિક તત્વો દ્વારા બોમ્બથી ઉડાવી દેવાનો ઈમેલ મળતા ભારે ફફડાટ વ્યાપી ગયો હતો. સવારના સમયે મેઇલ મળતાની સાથે જ કોર્ટ સંકુલમાં હાજર ન્યાયાધીશો, વકીલો, અસીલો અને કર્મચારીઓમાં ચિંતાનો માહોલ બની ગયો હતો. સુરક્ષાના પિરામિડને ધ્યાનમાં રાખીને તાત્કાલિક સમગ્ર કોર્ટ પરિસરને ખાલી કરાવવામાં આવ્યું હતું અને તમામ લોકોને સલામત અંતરે બહાર મોકલી દેવાયા હતા.

 ખાલિસ્તાન એંગલ અને પોલીસ તપાસનો પ્રારંભ

એમ ડિવિઝન ACP એ.બી. વાળંદે માહિતી આપતા જણાવ્યું હતું કે, વેજલપુરની ઝાયડસ સ્કૂલમાં સવારે 9.44  વાગ્યે ધમકીભર્યો મેઇલ આવ્યો હતો. ઘટનાની જાણ થતાં જ પોલીસ અને ફાયર બ્રિગેડની ટીમો પહોંચી ગઈ હતી અને બોમ્બ સ્ક્વોડ દ્વારા સઘન ચેકિંગ શરૂ કરવામાં આવ્યું હતું. ધમકીભર્યા મેઇલમાં ખાલિસ્તાનનો ઉલ્લેખ હોવાથી પોલીસ અને સાયબર સેલ દ્વારા આ દિશામાં ઊંડાણપૂર્વક તપાસ હાથ ધરવામાં આવી છે.