ગુજરાતમાં ‘આરોગ્ય મૈત્રી પહેલ’ નો પ્રારંભ, દુર્ગમ વિસ્તારોમાં એરડ્રોપ થઈ શકતી ‘BHISHM Cube’ હોસ્પિટલનું વિશિષ્ટ પ્રદર્શન
Launch of the Aarogya Maitri
આપણા દેશમાં આપાતકાલીન કે કુદરતી આપત્તિના કપરા સમયમાં ત્વરિત અને અસરકારક તબીબી સહાય પૂરી પાડવા માટે ટેકનોલોજી આધારિત અદ્યતન પગલાં લેવામાં આવી રહ્યા છે. આ જ દિશામાં એક મહત્વપૂર્ણ કદમરૂપ ગુજરાત વિધાનસભા ખાતે અદ્યતન પોર્ટેબલ મોબાઈલ ઇમરજન્સી મેડિકલ હોસ્પિટલ BHISHM Cube-R300 ના વિશેષ પ્રદર્શનનું ઉદ્ઘાટન કરવામાં આવ્યું છે.
મુખ્યમંત્રી ભૂપેન્દ્ર પટેલના હસ્તે શુભારંભ અને આરોગ્ય મૈત્રી પહેલ
મુખ્યમંત્રી ભૂપેન્દ્ર પટેલના વરદ હસ્તે ગુજરાત વિધાનસભા પરિસરમાં BHISHM Cube-R300 ના વિશિષ્ટ પ્રદર્શનનો પ્રારંભ કરાયો હતો. ભારત સરકારના રાષ્ટ્રીય સુરક્ષા પરિષદ સેક્રેટરીએટ (NSCS) ના માર્ગદર્શન હેઠળ આરોગ્ય મૈત્રી પહેલ અંતર્ગત આ અત્યાધુનિક યુનિટ તૈયાર કરવામાં આવ્યું છે, જે આપત્તિના સમયે તબીબી સેવાઓમાં ક્રાંતિ લાવશે.
ગુજરાત વિધાનસભા પરિસરમાં પોર્ટેબલ મોબાઇલ ઇમરજન્સી હોસ્પિટલ BHISHM Cube-R300 ના ડેમોસ્ટ્રેશનનું આયોજન કરવામાં આવ્યું છે. જેનું આજે, માનનીય વિધાનસભા અધ્યક્ષ શ્રી શંકરભાઈ ચૌધરીની ઉપસ્થિતિમાં ઉદ્ઘાટન કરીને તેની કામગીરી અંગે જાણકારી મેળવી.
— Bhupendra Patel (@Bhupendrapbjp) September 9, 2026
કટોકટી કે કુદરતી આપત્તિના સમયે જ્યાં મોટી… pic.twitter.com/NkTQ0lJCSY
BHISHM Cube-R300
મહાનુભાવોની ઉપસ્થિતિ અને ડોક્યુમેન્ટરી ફિલ્મનું પ્રદર્શન
આ ભવ્ય પ્રસંગે વિધાનસભા અધ્યક્ષ શંકરભાઇ ચૌધરી, નાયબ મુખ્યમંત્રી હર્ષ સંઘવી અને આરોગ્ય મંત્રી પ્રફુલ પાનશેરીયા સહિત મંત્રીમંડળના સભ્યો તેમજ ધારાસભ્યો વિશેષ ઉપસ્થિત રહ્યા હતા. તમામ મહાનુભાવોએ આ બે દિવસીય પ્રદર્શન અંતર્ગત ભીષ્મ ક્યુબ ની કાર્યપ્રણાલી દર્શાવતી વિશેષ ડોક્યુમેન્ટરી ફિલ્મ પણ નિહારી હતી.
12 મિનિટમાં તૈનાતી અને 300 દર્દીઓની સારવાર ક્ષમતા
આરોગ્ય મંત્રી પ્રફુલ પાનશેરીયાએ જણાવ્યું હતું કે આ પોર્ટેબલ હોસ્પિટલને માત્ર 12 મિનિટ કરતાં પણ ઓછા સમયમાં ગમે તે સ્થળે કાર્યરત કરી શકાય છે. આ સિંગલ યુનિટ દ્વારા એકસાથે આશરે 300 જેટલા ઘાયલોને ઇમરજન્સી સારવાર આપી શકાય છે. આખી સિસ્ટમ 72 મોડ્યુલર મિની-ક્યુબ્સમાં વિભાજિત છે, જેમાં પ્રત્યેક ક્યુબનું વજન 20 કિલોગ્રામથી ઓછું હોવાથી તેની હેરફેર ખૂબ સરળ રહે છે.
સંપૂર્ણ અદ્યતન તબીબી સુવિધાઓ અને પરિવહન ક્ષમતા
આ હોસ્પિટલમાં વેન્ટિલેટર, મલ્ટી-પેરામીટર મોનિટર, મિની-લેબ, સર્જિકલ સાધનો અને ઓક્સિજન સપ્લાય સહિતની આશરે 400 જેટલી તબીબી સામગ્રી ઉપલબ્ધ છે. જમીન, હવાઈ કે દરિયાઈ માર્ગે ગમે ત્યાં મોકલી શકાતી આ સિસ્ટમ પોતાની વીજ ઉત્પાદન ક્ષમતા ધરાવે છે અને દુર્ગમ વિસ્તારોમાં તેને વિમાન કે હેલિકોપ્ટર મારફતે એરડ્રોપ પણ કરી શકાય છે.
ગુજરાત માટે મહત્વ અને વૈશ્વિક સ્તરે માનવતાવાદી સહાય
આપત્તિના જોખમો અને વિશાળ દરિયાકાંઠો ધરાવતા ગુજરાત માટે આ હોસ્પિટલની તૈનાતી રાજ્યની રાહત-બચાવ ક્ષમતાને અનેકગણી વધારી દેશે. અગાઉ ભારત સરકાર દ્વારા આ ક્યુબ્સ યુક્રેન, માલદીવ્સ, જમૈકા અને શ્રીલંકા જેવા દેશોમાં માનવતાવાદી સહાય તરીકે મોકલવામાં આવ્યા છે. આ ઉદ્ઘાટન સમારોહમાં આરોગ્ય વિભાગના અધિકારીઓ, GSDMA, SDRF ના પ્રતિનિધિઓ અને મોટી સંખ્યામાં વિદ્યાર્થીઓ ઉપસ્થિત રહ્યા હતા.
આપણા રાજ્યમાં આપાતકાલીન આરોગ્ય સેવાઓને વધુ મજબૂત અને ઝડપી બનાવતી આ અદ્યતન પોર્ટેબલ હોસ્પિટલની પહેલ ખરેખર પ્રશંસનીય છે. તબીબી ક્ષેત્રે ટેકનોલોજીનો આ સમન્વય કપરા સમયમાં અનેક નાગરિકોનો અમૂલ્ય જીવ બચાવવામાં સહાયરૂપ બનશે.

