ધનતેરસ પર ભગવાન કુબેર અને માતા લક્ષ્મીને ધરાવો આ 4 ખાસ મીઠાઈઓનો નૈવેદ્ય, જાણો સરળ રેસિપી

ધનતેરસ પર ભગવાન કુબેર અને માતા લક્ષ્મીને ધરાવો આ 4 ખાસ મીઠાઈઓનો નૈવેદ્ય, જાણો સરળ રેસિપી

ધનતેરસના પવિત્ર તહેવાર પર ભગવાન કુબેર અને માતા લક્ષ્મીની પૂજા કરવામાં આવે છે. આ દિવસે ધન-સમૃદ્ધિ અને સુખ-શાંતિની કામના સાથે ભગવાનને વિવિધ મીઠાઈઓનો નૈવેદ્ય ધરાવવામાં આવે છે. જો તમે પણ આ ધનતેરસે ઘરે જ કંઈક ખાસ અને સ્વાદિષ્ટ મીઠાઈ બનાવવા ઇચ્છતા હોવ તો અહીં 4 પરંપરાગત મીઠાઈઓની સરળ રેસિપી આપવામાં આવી છે. આ મીઠાઈઓ પૂજાના નૈવેદ્ય માટે પણ બનાવી શકો છો.

1. ગુલાબજાંબુ

સામગ્રી:

માવો – 100 ગ્રામ

મેંદો અથવા રવો – 1 ટેબલસ્પૂન

બેકિંગ સોડા – 1/4 ટીસ્પૂન

ખાંડ – 2 કપ

પાણી – 2 કપ

દૂધ – 2 ટેબલસ્પૂન

એલચી પાવડર – સ્વાદ અનુસાર

તળવા માટે ઘી

બનાવવાની રીત:

સૌપ્રથમ એક વાસણમાં માવો લઈ તેને સારી રીતે મસળી લો. હવે તેમાં મેંદો અથવા રવો અને બેકિંગ સોડા ઉમેરીને બરાબર મિક્સ કરો. જરૂર મુજબ થોડું દૂધ ઉમેરીને નરમ અને મુલાયમ લોટ બાંધી લો.

આ લોટમાંથી નાના-નાના ગોળા બનાવી લો. ધ્યાન રાખો કે ગોળામાં તિરાડ ન રહે. એક કડાઈમાં ઘી ગરમ કરો અને ધીમી આંચ પર ગુલાબજાંબુને ગોલ્ડન બ્રાઉન થાય ત્યાં સુધી તળી લો.

હવે ચાસણી બનાવવા માટે એક વાસણમાં પાણી અને ખાંડ ઉમેરીને ગરમ કરો. ખાંડ ઓગળી જાય ત્યારે તેમાં એલચી પાવડર ઉમેરો. તૈયાર ચાસણી થોડી ગરમ હોય ત્યારે તેમાં તળેલા ગુલાબજાંબુ નાખો. થોડો સમય ચાસણીમાં રહેવા દો. તૈયાર છે સ્વાદિષ્ટ ગુલાબજાંબુ.

2. બેસનના લાડુ

સામગ્રી:

બેસન – 2 કપ

ઘી – 1 કપ

પીસેલી ખાંડ – 1 કપ

એલચી પાવડર – 1/2 ચમચી

કાજુ અને બદામ – સમારેલા

કિસમિસ – જરૂર મુજબ

બનાવવાની રીત:

સૌપ્રથમ એક જાડા તળિયાવાળી કડાઈમાં ઘી ગરમ કરો. તેમાં બેસન ઉમેરીને ધીમી આંચ પર સતત હલાવતા રહો. બેસનનો રંગ હળવો બદામી થાય અને તેમાંથી સરસ સુગંધ આવવા લાગે ત્યાં સુધી શેકો.

ત્યારબાદ ગેસ બંધ કરીને બેસનને થોડું ઠંડું થવા દો. હવે તેમાં પીસેલી ખાંડ, એલચી પાવડર, સમારેલા કાજુ, બદામ અને કિસમિસ ઉમેરીને બરાબર મિક્સ કરો.

મિશ્રણ હૂંફાળું થાય એટલે હાથમાં લઈને નાના-નાના ગોળ લાડુ વાળી લો. જો મિશ્રણ વધારે સૂકું લાગે તો તેમાં થોડું ગરમ ઘી ઉમેરી શકો છો. તૈયાર છે સ્વાદિષ્ટ બેસનના લાડુ.

3. બેસનની બરફી

સામગ્રી:

બેસન – 2 કપ

ઘી – 1 વાટકી

ખાંડ – 1 કપ

પાણી – 1/2 કપ

એલચી પાવડર – 1/2 ટીસ્પૂન

પિસ્તા અને બદામ – સજાવવા માટે

બનાવવાની રીત:

સૌપ્રથમ એક કડાઈમાં ઘી ગરમ કરો. તેમાં બેસન ઉમેરીને ધીમી આંચ પર સતત હલાવતા શેકો. બેસનમાંથી ઘી છૂટવા લાગે અને સરસ સુગંધ આવવા લાગે એટલે સમજવું કે બેસન બરાબર શેકાઈ ગયું છે. હવે તેને એક બાજુ ઠંડું થવા મૂકો.

બીજી કડાઈમાં ખાંડ અને પાણી ઉમેરીને ચાસણી તૈયાર કરો. હવે શેકેલા બેસનમાં ધીમે-ધીમે ચાસણી ઉમેરો અને સતત હલાવતા રહો, જેથી ગાંઠો ન પડે. તેમાં એલચી પાવડર ઉમેરીને ધીમી આંચ પર મિશ્રણ ઘટ્ટ થાય ત્યાં સુધી પકાવો.

એક થાળીમાં ઘી લગાવી તૈયાર મિશ્રણ પાથરી દો. ઉપરથી સમારેલા પિસ્તા અને બદામ ભભરાવો. મિશ્રણ ઠંડું થાય એટલે મનપસંદ આકારમાં બરફીના ટુકડા કાપી લો. ઇચ્છા હોય તો ઉપર ચાંદીનો વરખ પણ લગાવી શકો છો. તૈયાર છે સ્વાદિષ્ટ બેસનની બરફી.

4. રવાના શીરો

સામગ્રી:

રવો – 1 કપ

ઘી – 1/2 કપ

ખાંડ – 3/4 કપ

દૂધ – 1 કપ

કેસર – દૂધમાં પલાળેલું

એલચી પાવડર – સ્વાદ અનુસાર

કાજુ, બદામ અને પિસ્તા – સમારેલા

કિસમિસ – જરૂર મુજબ

બનાવવાની રીત:

સૌપ્રથમ એક કડાઈમાં ઘી ગરમ કરો. તેમાં રવો ઉમેરીને ધીમી આંચ પર સોનેરી રંગનો થાય અને સરસ સુગંધ આવે ત્યાં સુધી શેકો.

બીજી તરફ એક વાસણમાં દૂધ અને થોડું પાણી મિક્સ કરીને ગરમ કરો. રવો બરાબર શેકાઈ જાય એટલે તેમાં ધીમે-ધીમે ગરમ દૂધનું મિશ્રણ ઉમેરો અને સતત હલાવતા રહો, જેથી ગાંઠો ન પડે.

રવો બરાબર ચડી જાય એટલે તેમાં ખાંડ અને દૂધમાં પલાળેલું કેસર ઉમેરો. ખાંડ ઓગળી જાય ત્યાં સુધી હલાવો. હવે ઘીમાં શેકેલા કાજુ, બદામ, પિસ્તા અને કિસમિસ ઉમેરો. છેલ્લે એલચી પાવડર નાખીને બરાબર મિક્સ કરો.

થોડો સમય શેક્યા બાદ સ્વાદિષ્ટ અને સુગંધિત રવાનો શીરો તૈયાર થઈ જશે. તેને સ્વચ્છ વાસણમાં કાઢીને ભગવાન કુબેર અને માતા લક્ષ્મીને નૈવેદ્ય તરીકે ધરાવી શકો છો.