ભારતમાં T20 વર્લ્ડ કપ મેચ નહિ રમે BAN', બાંગ્લાદેશનાં કાર્યકારી રમતગમત મંત્રીએ આપ્યું વાહિયાત નિવેદન
જ્યારથી કોલકાતા નાઈટ રાઈડર્સે મુસ્તફિઝુર રહેમાનને તેમની ટીમમાંથી મુક્ત કર્યો છે, ત્યારથી બાંગ્લાદેશ ક્રિકેટ બોર્ડ અને તેનું મેનેજમેન્ટ વિવિધ નિવેદનો જારી કરી રહ્યું છે.
આસિફ નજરુલે કહી આ વાત
બાંગ્લાદેશના કાર્યકારી રમતગમત મંત્રી, આસિફ નજરુલે ફેસબુક પર પોસ્ટ કરી હતી કે બાંગ્લાદેશની ટીમ વર્લ્ડ કપ માટે ભારત જશે નહીં. બાંગ્લાદેશ ક્રિકેટ બોર્ડે આજે આ નિર્ણય લીધો છે. "ભારતીય ક્રિકેટ બોર્ડની હિંસક સાંપ્રદાયિક નીતિને ધ્યાનમાં રાખીને અમે આ નિર્ણયનું સ્વાગત કરીએ છીએ," તેમણે કહ્યું. અગાઉ, એક ફેસબુક પોસ્ટમાં, તેમણે KKR દ્વારા મુસ્તફિઝુર રહેમાનની મુક્તિની નિંદા કરી હતી.
આ જ પોસ્ટમાં, આસિફ નજરુલે લખ્યું, "રમત મંત્રાલયના જવાબદાર સલાહકાર તરીકે, મેં બાંગ્લાદેશ ક્રિકેટ બોર્ડને કહ્યું હતું કે જ્યારે એક બાંગ્લાદેશી ક્રિકેટર કરારબદ્ધ હોવા છતાં ભારતમાં રમી શકતો નથી, ત્યારે સમગ્ર બાંગ્લાદેશ ક્રિકેટ ટીમ વર્લ્ડ કપમાં જવામાં સુરક્ષિત અનુભવી શકતી નથી. મેં બોર્ડને કહ્યું છે કે તેઓ ICC ને બાંગ્લાદેશ ક્રિકેટ ટીમની મેચ શ્રીલંકામાં ખસેડવા વિનંતી કરે."
બાંગ્લાદેશી ક્રિકેટર મુસ્તફિઝુર KKR માંથી બહાર
આ પહેલાં, 3 જાન્યુઆરીના રોજ કોલકાતા નાઈટ રાઈડર્સ (KKR)એ મુસ્તફિઝુરને ટીમમાંથી બહાર કરી દીધો હતો. બાંગ્લાદેશમાં લઘુમતી હિંદુઓ પર થઈ રહેલી હિંસા વચ્ચે તેમને ટીમમાંથી હટાવવાની માગ ઉઠી રહી હતી. ત્યારબાદ BCCIએ શાહરૂખ ખાનની IPL ટીમ KKRને મુસ્તફિઝુર રહેમાનને હટાવવાનો નિર્દેશ આપ્યો હતો, જેના પછી આ નિર્ણય લેવામાં આવ્યો.
BCCI સચિવ દેવજીત સૈકિયાએ શનિવારે કહ્યું હતું કે, તાજેતરના દિવસોમાં જે ઘટનાક્રમ સામે આવ્યા છે, તેને જોતા બોર્ડે KKRને મુસ્તફિઝુરને રિલીઝ કરવાનો નિર્દેશ આપ્યો છે. જો ફ્રેન્ચાઇઝી કોઈ રિપ્લેસમેન્ટ ખેલાડીની માગ કરે છે, તો તેને તેની મંજૂરી આપવામાં આવશે.
બાંગ્લાદેશમાં છેલ્લા 15 દિવસમાં 4 હિંદુઓની હત્યા કરવામાં આવી છે. IPL 2026ની શરૂઆત 26 માર્ચથી થશે. જ્યારે લીગની ફાઇનલ મેચ 31 મેના રોજ રમાશે.
