1. સમાચાર જગત
  2. ગુજરાતી સમાચાર
  3. રાષ્ટ્રીય સમાચાર
  4. IndiGo Flight

માત્ર 1 મિનિટ મોડા પહોંચતા બીમાર બાળક સાથે મુસાફરને ફ્લાઇટમાં ચઢવા ન દીધો, 13 મિનિટ વહેલી ઉડી ગઈ ફ્લાઇટ; IndiGo સામે રોષ

IndiGo Flight
દેશની જાણીતી એરલાઇન કંપની ઇન્ડિગો (IndiGo) ફરી એકવાર પોતાના નિયમો અને સ્ટાફના વર્તનને લઈને વિવાદમાં આવી છે. દિલ્હીથી રાજકોટ જઈ રહેલા એક મુસાફરે એરલાઇન પર ગંભીર આક્ષેપ કર્યા છે. મુસાફરના જણાવ્યા અનુસાર, તેઓ પોતાના બીમાર બાળક સાથે મુસાફરી કરી રહ્યા હતા. જોકે, બોર્ડિંગ ગેટ પર માત્ર એક મિનિટ મોડા પહોંચવાના કારણે એરલાઇનના કર્મચારીઓએ તેમને ફ્લાઇટમાં બેસવા દીધા નહોતા. બીજી તરફ, સવારે 5:30 વાગ્યે ઉપડવાની નિર્ધારિત ફ્લાઇટ 13 મિનિટ વહેલી એટલે કે 5:17 વાગ્યે જ ઉડી ગઈ હોવાનો પણ તેમણે દાવો કર્યો છે.
 
ઇમરજન્સીમાં મોંઘી ટિકિટ ખરીદવી પડી
પીડિત મુસાફરે સોશિયલ મીડિયા પ્લેટફોર્મ ઇન્સ્ટાગ્રામ પર પોતાની સાથે બનેલી ઘટનાની વિગતો શેર કરી છે. તેમણે જણાવ્યું કે અગાઉ સ્પાઇસજેટની ફ્લાઇટ કલાકો સુધી મોડી થયા બાદ રદ થઈ ગઈ હતી. આ દરમિયાન તેમનું બાળક બીમાર હતું અને લાંબી રાહ જોવાને કારણે ખૂબ થાકી ગયું હતું. આવી સ્થિતિમાં મજબૂરીથી તેમણે ઇન્ડિગોની સવારે 5:30 વાગ્યાની ઇમરજન્સી ફ્લાઇટની ટિકિટ ₹16,600માં ખરીદી હતી.
 

ઘણી વિનંતીઓ છતાં સ્ટાફે ફ્લાઇટમાં બેસવા ન દીધા

મુસાફરના જણાવ્યા અનુસાર, તેઓ પરિવાર સાથે સવારે 5:06 વાગ્યે બોર્ડિંગ ગેટ પર પહોંચી ગયા હતા. તેમ છતાં એરલાઇનના કર્મચારીઓએ ગેટ બંધ થઈ ગયો હોવાનું અને એક મિનિટ મોડું થયું હોવાનું કહીને તેમને અંદર પ્રવેશવા દીધો નહોતો.
 
મુસાફરે પોતાના બાળકની બીમારીનું કારણ આપીને સ્ટાફને ઘણી વિનંતીઓ કરી હતી, પરંતુ કર્મચારીઓએ તેમની વાત સાંભળી નહોતી. પરિણામે તેમને બીજી ફ્લાઇટની ટિકિટ ખરીદવી પડી હતી, જેના માટે વધારાના ₹12,000 ખર્ચવા પડ્યા હતા. આ રીતે મુસાફરી માટે તેમને કુલ ₹28,600 ખર્ચવા પડ્યા હોવાનો દાવો કરવામાં આવ્યો છે.
 

એરલાઇનના નિયમો સામે ઉઠાવ્યા સવાલ

મુસાફરે ઇન્ડિગોની કાર્યપ્રણાલી પર સવાલ ઉઠાવતાં પૂછ્યું કે શું સમયની પાબંદીના નિયમો માત્ર સામાન્ય મુસાફરો માટે જ છે? તેમણે દાવો કર્યો કે સવારે 5:30 વાગ્યે ઉપડવાની ફ્લાઇટ 5:17 વાગ્યે જ ટેકઓફ કરી ગઈ હતી.
 
આ ઉપરાંત તેમણે બીજી ફ્લાઇટ 6E 6047નું ઉદાહરણ પણ આપ્યું હતું. આ ફ્લાઇટનો નિર્ધારિત પ્રસ્થાન સમય સવારે 11 વાગ્યાનો હતો, પરંતુ તેની બોર્ડિંગ પ્રક્રિયા 10:53 વાગ્યા સુધી ચાલુ રહી હતી. આ બાબતને લઈને તેમણે એરલાઇનના નિયમોમાં એકસમાનતા હોવી જોઈએ તેવી માંગ કરી છે.
મુસાફરે એરલાઇનના સ્ટાફના વર્તનની તપાસ કરવા, ફ્લાઇટ નિર્ધારિત સમય કરતાં વહેલી કેમ ઉડાન ભરી તેનું કારણ જણાવવા અને વધારાના ખર્ચાયેલા ₹12,000 પરત આપવા માંગ કરી છે.
 

સોશિયલ મીડિયા પર ઇન્ડિગો સામે લોકોનો રોષ

આ ઘટનાની પોસ્ટ સોશિયલ મીડિયા પર વાયરલ થયા બાદ અન્ય ઘણા મુસાફરોએ પણ ઇન્ડિગો સાથેના પોતાના કથિત ખરાબ અનુભવો શેર કર્યા છે. કેટલાક યુઝર્સે આક્ષેપ કર્યો છે કે એરલાઇનના કર્મચારીઓ છેલ્લી ઘડીએ બોર્ડિંગ ગેટ બંધ કરી દે છે, જેના કારણે મુસાફરોને બીજી ફ્લાઇટ માટે મોંઘી ટિકિટ ખરીદવાની ફરજ પડે છે.
બીજી તરફ, કેટલાક લોકોએ પીડિત મુસાફરને નાગરિક ઉડ્ડયન મંત્રાલયના 'એર સેવા' (AirSewa) પોર્ટલ અને કન્ઝ્યુમર ફોરમમાં સત્તાવાર ફરિયાદ નોંધાવવાની સલાહ આપી છે. આ ઘટનાને પગલે એરલાઇનની બોર્ડિંગ પ્રક્રિયા અને મુસાફરો સાથેના વ્યવહાર અંગે ફરી ચર્ચા શરૂ થઈ છે
આગળનો લેખ
Xiaomi 18 Pro Series : Xiaomi ની મોટી જાહેરાત: 17 નવેમ્બરે 7 નવા ઉત્પાદનો લોન્ચ થશે; જાણો શું ખાસ છે.