PM Modi In Navy Dockyard: પ્રધાનમંત્રી નરેન્દ્ર મોદી બુધવારે (15 જાન્યુઆરી, 2025 ) મુંબઈમાં ભારતીય નૌકાદળના ડોકયાર્ડ પહોંચ્યા. અહીં તેમણે ત્રણ નૌકાદળના યુદ્ધ જહાજો - INS સુરત, INS નીલગિરી અને INS વાગશીર - રાષ્ટ્રને સમર્પિત કર્યા. પીએમ મોદીએ કહ્યું, "નૌકાદળનો ભવ્ય ઇતિહાસ છે. આ ત્રણેય યુદ્ધ જહાજો ભારતમાં બનેલા છે, જે દેશની સુરક્ષાને નવી તાકાત આપશે. આ સમગ્ર ક્ષેત્રને આતંકવાદ અને ડ્રગ્સની દાણચોરીથી સુરક્ષિત કરશે."
આત્મનિર્ભર ભારત અભિયાન માટે મોટો દિવસ
પીએમ બોલ્યા, 'નૌકાદળને નવુ સામર્થ્ય મળ્યુ છે. નેવીને મજબૂત કરવા માટે સરકાર પગલા ઉઠાવી રહી છે.
આજે ભારતના દરિયાઈ વારસા, નૌકાદળના ગૌરવશાળી ઇતિહાસ અને આત્મનિર્ભર ભારત અભિયાન માટે એક મોટો દિવસ છે. છત્રપતિ શિવાજી મહારાજે નૌકાદળને નવી તાકાત અને દ્રષ્ટિ આપી. આજે, આ પવિત્ર ભૂમિ પર, આપણે 21મી સદીના નૌકાદળને મજબૂત બનાવવા તરફ એક મોટું પગલું ભરી રહ્યા છીએ. આ પહેલી વાર છે જ્યારે એક ડિસ્ટ્રોયર, એક ફ્રિગેટ અને એક સબમરીન એકસાથે કાર્યરત થઈ રહી છે. એ ગર્વની વાત છે કે ત્રણેય મેડ ઇન ઇન્ડિયા છે."
ભારત વિસ્તારવાદ નથી - પીએમ મોદી
પીએમ મોદીએ કહ્યુ, "આજ ભારત આખા વિશ્વને અને ખાસ કરીને ગ્લોબલ સાઉથમાં એક વિશ્વાસ અને જવાબદાર સાથીના રૂપમાં ઓળખાય રહ્યુ છે. ભારત વિસ્તારવાદ નથી. ભારત વિકાસવાદની ભાવનાથી કામ કરે છે. 15 જાન્યુઆરીનો દિવસ આર્મી ડે ના રૂપમાં પણ ઉજવાય છે.
દેશની રક્ષા માટે પોતાનું જીવન સમર્પિત કરનારા દરેક બહાદુર વ્યક્તિને હું સલામ કરું છું. હું ભારત માતાની રક્ષામાં સામેલ દરેક વીર મહિલાને અભિનંદન આપું છું."
પીએમ મોદીએ કહ્યું, "ભારત હંમેશા ખુલ્લા, સુરક્ષિત, સમાવિષ્ટ અને સમૃદ્ધ ઈન્ડો-પેસિફિક ક્ષેત્રને ટેકો આપે છે, તેથી જ્યારે દરિયાકાંઠાના દેશોના વિકાસની વાત આવી, ત્યારે ભારતે SAGAR નો મંત્ર આપ્યો. SAGAR એટલે કે પ્રદેશમાં દરેક માટે સુરક્ષા. અને વિકાસ. અમારી સરકારનો ત્રીજો કાર્યકાળ ઘણા મોટા નિર્ણયો સાથે શરૂ થયો છે. અમે ઝડપી ગતિએ નવી નીતિઓ બનાવી છે, અમે દેશની જરૂરિયાતોને ધ્યાનમાં રાખીને નવા કાર્યો શરૂ કર્યા છે, દેશના દરેક ખૂણા, દરેક ક્ષેત્રના વિકાસને ધ્યાનમાં રાખીને, અમે આ લક્ષ્ય સાથે આગળ વધી રહ્યા છીએ."
INS સુરતની વિશેષતાઓ
INS સુરત એ પ્રોજેક્ટ 15B ક્લાસ ગાઇડેડ મિસાઇલ ડિસ્ટ્રોયરનું ચોથું અને અંતિમ જહાજ છે, જે વિશ્વના સૌથી મોટા અને સૌથી અત્યાધુનિક ડિસ્ટ્રોયરમાંનું એક છે. તેમાં 75 ટકા સ્વદેશી સામગ્રી છે અને તે અત્યાધુનિક શસ્ત્ર-સેન્સર પેકેજ અને અદ્યતન નેટવર્ક-કેન્દ્રિત ક્ષમતાઓથી સજ્જ છે. તેને એવી રીતે ડિઝાઇન કરવામાં આવ્યું છે કે તે દુશ્મનના રડાર પર દેખાશે નહીં. તેમાં બે વર્ટિકલ સપાટીથી હવામાં પ્રહાર કરનારા લોન્ચર્સ છે. આની મદદથી, એક સમયે 16 બ્રહ્મોસ મિસાઇલો છોડી શકાય છે. તેમાં રોકેટ લોન્ચર અને ટોર્પિડો લોન્ચર પણ છે, જે દુશ્મન સબમરીનનો નાશ કરવામાં સક્ષમ છે.
INS નીલગિરી ની વિશેષતાઓ
INS નીલગિરી એ 17A સ્ટીલ્થ ફ્રિગેટ પ્રોજેક્ટનું પ્રથમ જહાજ છે. તેને ભારતીય નૌકાદળના યુદ્ધ જહાજ ડિઝાઇન બ્યુરો દ્વારા ડિઝાઇન કરવામાં આવ્યું છે અને તેને ઉન્નત ક્ષમતાઓ, લાંબી દરિયાઈ યોગ્યતા અને અદ્યતન સ્ટીલ્થ સુવિધાઓ સાથે નૌકાદળમાં સામેલ કરવામાં આવ્યું છે. આ સ્વદેશી ફ્રિગેટ્સની આગામી પેઢીનું પ્રતિનિધિત્વ કરે છે. તે દુશ્મનના જમીન લક્ષ્યો તેમજ સમુદ્રમાં પાણીની અંદર સબમરીનને નિશાન બનાવી શકે છે. તે હવાઈ સંરક્ષણ બંદૂકો અને 8 લાંબા અંતરની સપાટીથી હવામાં પ્રહાર કરતી મિસાઇલોથી સજ્જ છે. INS નીલગિરી પર બે હેલિકોપ્ટર ઉતરી શકે છે.
INS વાગ્શીરની વિશેષતાઓ
INS વાગશીર એ P75 સ્કોર્પિયન પ્રોજેક્ટની છઠ્ઠી અને છેલ્લી સબમરીન છે. આ સબમરીન ઉત્પાદનમાં ભારતની વધતી જતી તાકાત દર્શાવે છે. તેનું નિર્માણ ફ્રેન્ચ નેવી ગ્રુપના સહયોગથી કરવામાં આવ્યું છે. તે દુશ્મનના રડારથી બચવા, વિસ્તાર પર નજર રાખવા, ઉચ્ચ-ટેકનોલોજીવાળા ધ્વનિ નિયંત્રણનો ઉપયોગ કરવા અને ગુપ્ત માહિતી એકત્રિત કરવામાં સક્ષમ છે. INS વાગશીરની ઊંચાઈ 40 ફૂટ છે. પાણીની અંદર તેની ગતિ 35 કિમી/કલાક છે અને પાણીની સપાટી પર તે કિમી/કલાક છે. આ સબમરીન સપાટી-વિરોધી અને સબમરીન-વિરોધી કામગીરી કરવામાં નિષ્ણાત છે.
