વડાપ્રધાન નરેન્દ્ર મોદીએ મોબાઈલ એપ BHIM લોન્ચ કરી
વડાપ્રધાન નરેન્દ્ર મોદીએ અહીંના તાલકટોરા સ્ટેડિયમ ખાતે આજે આયોજિત ‘ડિજિધન મેલા’ ખાતે એક મોબાઈલ એપ BHIM લોન્ચ કરી છે જેનાથી ડિજિટલ પેમેન્ટ્સ વધુ આસાન થશે.
વડાપ્રધાન મોદીએ કેશલેસ સોદાઓને પ્રોત્સાહન આપવા માટે આ કાર્યક્રમમાં લકી ડ્રોની પણ જાહેરાત કરી છે. પીએમ મોદીએ કહ્યું કે ક્રિસમસ બાદથી 100 દિવસ સુધીમાં અનેક પરિવારોને લકી ડ્રોની મદદથી પુરસ્કાર આપવામાં આવનાર છે. આ યોજના ગરીબો માટે છે. નવી એપ લોન્ચ કરવા પર તેમણે કહ્યું કે આપણા બંધારણના ઘડવૈયા બાબા સાહેબ આંબેડકરના નામ પર ડિજિટલ પેમેન્ટ એપનું નામ BHIM રાખવામાં આવ્યું છે. એ દિવસો દૂર નથી કે તમામ કારોબાર આ એપ દ્વારા ચાલશે. લકી ડ્રો દ્વારા 100 દિવસમાં કુલ 340 કરોડ રૂપિયાના ઈનામો આપવામાં આવનાર છે. 14મી એપ્રિલે બાબાસાહેબનીજ જયંતી પર મેઘા ડ્રો કાઢવામાં આવશે અને કરોડોના ઈનામોની વહેંચણી થશે.
