પાકિસ્તાનમાં હિન્દુ ધાર્મિક સ્થળો પર હુમલા વધ્યા, 100 વર્ષ જૂના શિવ મંદિરની જમીન પર કબજો

પાકિસ્તાનના સિંધ પ્રાંતના ટંડો જામ શહેર નજીક જે જમીન પર 100 વર્ષ જૂનું શિવ મંદિર આવેલું છે તેના પર ગેરકાયદેસર કબજો કરવામાં આવ્યો છે અને તેની આસપાસ બાંધકામ શરૂ કરવામાં આવ્યું છે. હિન્દુ સમુદાયના પ્રતિનિધિએ ગુરુવારે આ માહિતી આપી. પાકિસ્તાનમાં હિન્દુ સમુદાયનું પ્રતિનિધિત્વ કરતી સંસ્થા, દરાવર ઇત્તેહાદ પાકિસ્તાનના વડા શિવા કચ્છીએ જણાવ્યું હતું કે, "આ મંદિર એક સદી કરતાં વધુ જૂનું છે પરંતુ બદમાશોએ તેના પર કબજો કરી લીધો છે અને મંદિરની આસપાસની જમીન પર ગેરકાયદેસર બાંધકામ શરૂ કરી દીધું છે. ઉપરાંત, શિવ મંદિરમાં પ્રવેશ અને રસ્તો અવરોધિત કરવામાં આવ્યો છે."

કછીએ સોશિયલ મીડિયા પર એક વીડિયો જાહેર કરીને ઘટનાની માહિતી આપી. કચ્છીએ કહ્યું કે શિવ મંદિરના સંચાલન અને મંદિરની આસપાસની લગભગ ચાર એકર જમીનની જાળવણી માટે એક સમિતિ જવાબદાર છે. આ સ્થળ કરાચીથી લગભગ ૧૮૫ કિલોમીટર દૂર ટંડો જામ શહેર નજીક મુસા ખાટિયાન ગામમાં છે. તેમણે કહ્યું કે મંદિરના ઐતિહાસિક મહત્વને કારણે, સિંધ હેરિટેજ વિભાગની એક ટીમે ગયા વર્ષે તેનું નવીનીકરણ કર્યું હતું. તેમણે કહ્યું કે મંદિરની નજીક સમુદાયના લોકોના અંતિમ સંસ્કાર માટે સ્મશાનગૃહ પણ છે.