બજેટ પહેલાં શેરબજારમાં ઉછાળો, સેન્સેક્સમાં તેજી સાથે 700 પોઇન્ટનો ઉછાળો
ભારતીય શેરબજારે બજેટને આવકાર્યુ છે. મંગળવારે સવારે સેન્સેક્સ 582.85 પોઈન્ટ વધીને 58,597.02 પોઈન્ટ પર ખુલ્યો હતો. બીજી તરફ નિફ્ટી 156.20 પોઈન્ટના વધારા સાથે 17,496.0 પોઈન્ટ પર ખુલ્યો હતો. ટ્રેડિંગ સેશન દરમિયાન, સેન્સેક્સ થોડા સમય માટે 700 પોઈન્ટથી વધુ ઉછળ્યો હતો અને 58,750.98 પર ટ્રેડ કરી રહ્યો હતો. એ જ રીતે નિફ્ટી 17,522 પર જોવા મળ્યો હતો.
તમને જણાવી દઈએ કે સરકાર દ્વારા સોમવારે સંસદમાં આર્થિક સર્વે રજૂ કરવામાં આવ્યો હતો. જે બાદ શેરબજારને તેજી મળી અને તે છેલ્લા કેટલાક સત્રોથી ચાલી રહેલા ઘટાડામાંથી બહાર આવ્યું. અગાઉ સોમવારે ખરીદીને કારણે સેન્સેક્સ અને નિફ્ટી બંને ઊંચા સ્તરે બંધ થયા હતા.
સોમવારે સેન્સેક્સ 813 પોઈન્ટ ઉછળીને 58,014.17 પર બંધ રહ્યો હતો. બીજી તરફ નિફ્ટી 237 પોઈન્ટના વધારા સાથે 17,339 પર પહોંચી ગયો હતો. છેલ્લા ઘણા સત્રોથી વેચવાલીનો માર સહન કરી રહેલા શેરબજારને બજેટથી રાહત મળવાની આશા છે.
છેલ્લા 10 વર્ષમાં પહેલીવાર એવું બન્યું છે કે બજેટ પહેલા શેરબજારમાં તેજી જોવા મળી હોય. જો અગાઉના આંકડાઓ પર નજર કરીએ તો સામાન્ય બજેટ પહેલા વિદેશી રોકાણકારોની વેચવાલીથી બજારમાં ઘટાડો જોવા મળ્યો હતો. પરંતુ આ વખતે બજારમાં તેજીઓએ પુનરાગમન કર્યું છે.
