ઓનલાઈન વેચાઈ રહ્યું હતું ઝેરી ધતુરા! કર્ણાટકમાં Amazon, Swiggy Instamart અને BigBasketના ફૂડ લાઇસન્સ સસ્પેન્ડ

કર્ણાટક ફૂડ સેફ્ટી એન્ડ ડ્રગ્સ એડમિનિસ્ટ્રેશને ઝેરી ધતુરાના ફળ અને બીજની ઓનલાઈન વેચાણના મામલે મોટી કાર્યવાહી કરી છે. વિભાગે Amazon, Swiggy Instamart અને BigBasketને આપવામાં આવેલા ફૂડ લાઇસન્સ આગામી આદેશ સુધી સસ્પેન્ડ કરવાનો નિર્દેશ આપ્યો છે. તપાસ દરમિયાન ધતુરાના ફળ અને બીજ માનવ ઉપયોગ માટે ઓનલાઈન વેચાતા હોવાની વાત સામે આવ્યા બાદ આ કાર્યવાહી કરવામાં આવી છે.

ઓનલાઈન વેચાઈ રહ્યા હતા ધતુરાના ફળ અને બીજ

તપાસ દરમિયાન અધિકારીઓને જાણવા મળ્યું કે કેટલાક ઓનલાઈન પ્લેટફોર્મ પર ધતુરાના ફળ અને બીજનું વેચાણ કરવામાં આવી રહ્યું હતું. ખાસ વાત એ હતી કે કેટલાક પેકેટ પર FSSAI લાઇસન્સ અથવા રજિસ્ટ્રેશન નંબર પણ દર્શાવવામાં આવ્યા હતા.

વિભાગે આ મામલાને ગંભીર ગણાવ્યો છે. અધિકારીઓના જણાવ્યા અનુસાર, ધતુરો એક ઝેરી છોડ છે અને તેનું સેવન સ્વાસ્થ્ય માટે ગંભીર જોખમ ઊભું કરી શકે છે.

ઓનલાઈન લિસ્ટિંગ અને જાહેરાતો હટાવવાનો આદેશ

કર્ણાટક ફૂડ સેફ્ટી ઓથોરિટીએ Amazon, Swiggy Instamart અને BigBasketને માનવ ઉપયોગ માટે ધતુરાના વેચાણ સાથે સંબંધિત તમામ ઓનલાઈન લિસ્ટિંગ અને જાહેરાતો તાત્કાલિક દૂર કરવા જણાવ્યું છે.

આ ઉપરાંત ધતુરાને ખાદ્ય પદાર્થ તરીકે વેચવા, તેનું વિતરણ કરવા અને તેને ખાદ્ય વસ્તુ તરીકે પ્રદર્શિત કરવા પર પણ રોક લગાવવાનો નિર્દેશ આપવામાં આવ્યો છે.

Amazon તરફથી કોઈ જવાબ નહીં

વિભાગના જણાવ્યા અનુસાર, આ મામલે Amazon તરફથી હજુ સુધી કોઈ જવાબ આપવામાં આવ્યો નથી. બીજી તરફ, Swiggy Instamartએ જરૂરી દસ્તાવેજો રજૂ કરવા માટે વધુ સમયની માગણી કરી છે.

જ્યારે BigBasketએ ઓથોરિટીને જણાવ્યું છે કે તેણે ધતુરા સંબંધિત પ્રોડક્ટનું વેચાણ બંધ કરી દીધું છે. કંપનીએ એમ પણ કહ્યું કે ભવિષ્યમાં જો આવી કોઈ લિસ્ટિંગ કરવામાં આવશે તો તેના પર સ્પષ્ટ રીતે “NOT FOR HUMAN CONSUMPTION” એટલે કે “માનવ ઉપયોગ માટે નથી” લખવામાં આવશે.