Air India Plane - TATA ગ્રુપ મૃતકોના પરિવારજનોને 1 કરોડ રૂપિયાનું વળતર આપશે, જાણો બીજું શું કહ્યું ?
Air India Plane Crash: ગુરુવારે અમદાવાદમાં એક વિમાન ક્રેશ થયું હતું. એર ઇન્ડિયાના આ વિમાનમાં 242 લોકો સવાર હતા. અત્યાર સુધી મળેલી માહિતી મુજબ, વિમાનમાં સવાર ફક્ત એક જ વ્યક્તિ બચી શક્યો છે. બાકીના લોકોના મોતની આશંકા છે. હાલમાં રાહત અને બચાવ કામગીરી હજુ પણ ચાલુ છે. આ દરમિયાન, ટાટા ગ્રુપે વિમાન દુર્ઘટનામાં પીડિતો અને તેમના પરિવારો માટે એક મોટી જાહેરાત કરી છે.
ટાટા ગ્રુપે અકસ્માત પર દુઃખ વ્યક્ત કર્યું
ટાટા સન્સના ચેરમેન એન ચંદ્રશેખરને સોશિયલ મીડિયા પ્લેટફોર્મ X પર પોસ્ટ કરીને એક નિવેદન બહાર પાડ્યું છે. આ નિવેદનમાં લખ્યું છે કે, "એર ઇન્ડિયા ફ્લાઇટ 171 સાથે થયેલી દુ:ખદ ઘટનાથી અમે ખૂબ જ દુઃખી છીએ. આ સમયે અમે જે દુઃખ અનુભવી રહ્યા છીએ તે શબ્દોમાં વ્યક્ત કરી શકાતું નથી. અમારી સંવેદના અને પ્રાર્થના એવા પરિવારો સાથે છે જેમણે પોતાના પ્રિયજનો ગુમાવ્યા છે અને ઘાયલ થયા છે."
પ્રત્યેકને 1 કરોડ રૂપિયાનું વળતર
આ ઉપરાંત, ટાટા સન્સ દ્વારા વળતરની પણ જાહેરાત કરવામાં આવી છે. પોસ્ટમાં વળતરની જાહેરાત કરતા લખ્યું છે કે, "ટાટા ગ્રુપ આ દુર્ઘટનામાં જીવ ગુમાવનારા દરેક વ્યક્તિના પરિવારને 1 કરોડ રૂપિયાની સહાય પૂરી પાડશે. અમે ઘાયલોનો તબીબી ખર્ચ પણ સહન કરીશું અને ખાતરી કરીશું કે તેમને જરૂરી તમામ સંભાળ અને સહાય મળે. વધુમાં, અમે બીજે મેડિકલના હોસ્ટેલના નિર્માણમાં સહાય પૂરી પાડીશું. આ અકલ્પનીય સમયમાં અમે અસરગ્રસ્ત પરિવારો અને સમુદાયો સાથે ઉભા છીએ."
એક વ્યક્તિ જીવતો બચ્યો
આ ફ્લાઇટમાં બચી ગયેલા વ્યક્તિની ઓળખ રમેશ વિશ્વાસ કુમાર તરીકે થઈ છે. આ મુસાફર બોઇંગ 787 ડ્રીમલાઇનરની '11A' સીટ પર બેઠો હતો, જેમાં 242 મુસાફરો અને ક્રૂ સભ્યો હતા. તે તેના ભાઈ સાથે લંડન જઈ રહ્યો હતો. અમદાવાદ સિવિલ હોસ્પિટલના ટ્રોમા વોર્ડમાં કાર્યરત ડૉ. શારિક એમ. એ જણાવ્યું હતું કે રમેશ વિશ્વાસ કુમારને હોસ્પિટલમાં દાખલ કરવામાં આવ્યા છે. વિમાનમાં 242 લોકો સવાર હતા, જેમાં બે પાઇલટ અને 10 ક્રૂ સભ્યોનો સમાવેશ થાય છે. એર ઇન્ડિયાના જણાવ્યા અનુસાર, વિમાનમાં સવાર 230 મુસાફરોમાંથી 169 ભારતીય, 53 બ્રિટિશ, એક કેનેડિયન અને સાત પોર્ટુગીઝ નાગરિક હતા.
