અમદાવાદની ઇન્ટરનેશનલ સ્કૂલમાં શરમજનક ઘટના: 5 વર્ષની બાળકી સાથે અડપલાં કરનાર 54 વર્ષીય સફાઈ કામદારની ધરપકડ

Written By: વેબદુનિયા ન્યુઝ ટીમ

Updated: Sat, 27 Jun 2026 (15:29 IST)

અમદાવાદ ગ્રામ્ય વિસ્તારના ઘુમામાં આવેલી એક પ્રતિષ્ઠિત ઈન્ટરનેશનલ સ્કૂલમાંથી બાળકોની સુરક્ષા અંગે ગંભીર સવાલો ઉઠાવતી એક ચોંકાવનારી ઘટના સામે આવી છે. શાળામાં હાઉસકીપિંગ સ્ટાફ તરીકે ફરજ બજાવતા 54 વર્ષીય સફાઈ કામદારે શાળા પરિસરમાં જ એક 5 વર્ષની માસૂમ વિદ્યાર્થિની સાથે અયોગ્ય વર્તન (અડપલાં) કર્યું હોવાનો આરોપ લાગ્યો છે. આ શરમજનક કૃત્ય બાદ આરોપીએ માસૂમ બાળકીને ડરાવીને આ બાબતે કોઈને પણ જાણ ન કરવા માટે ધમકી આપી હોવાનો ફરિયાદમાં ઉલ્લેખ કરાયો છે.

બાળકી સાથે બનેલી આ ઘટનાની જાણ તેના વાલીને થતાં, તેમણે તુરંત જ આ અંગે બોપલ પોલીસ સ્ટેશનમાં ન્યાયની માંગ સાથે ફરિયાદ નોંધાવી હતી. વાલીની ફરિયાદના આધારે બોપલ પોલીસે ૨૫ જૂનના રોજ ત્વરિત કાર્યવાહી હાથ ધરી હતી. પોલીસે આ મામલાની ગંભીરતાને ધ્યાનમાં રાખીને આરોપી સામે ભારતીય ન્યાય સંહિતા (BNS)ની સંબંધિત કલમો અને બાળકોને જાતીય ગુનાઓ સામે રક્ષણ આપતા પોક્સો (POCSO) એક્ટ હેઠળ ગુનો નોંધીને કાયદેસરની તપાસ શરૂ કરી હતી.

પોલીસ તપાસ દરમિયાન પકડાયેલા નરાધમ આરોપીની ઓળખ 54 વર્ષીય પશા નાનુ તરીકે થઈ છે. આરોપી મૂળ પાટણ જિલ્લાના સિદ્ધપુર તાલુકાના ડેદર ગામનો વતની છે અને હાલમાં તે સરખેજ વિસ્તારમાં સનાથલ ટોલ પ્લાઝા નજીક આવેલા મનમોહનનગરમાં રહેતો હતો. પોલીસે ગણતરીના કલાકોમાં જ આ આરોપીની ધરપકડ કરી લીધી છે અને તેની સામે જેલના સળિયા પાછળ ધકેલીને આગળની કાયદેસરની કડક કાર્યવાહી હાથ ધરી છે.