અરબી સમુદ્રમાં કોસ્ટ ગાર્ડ અને ગુજરાત ATSનું મોટું ઓપરેશન: રૂપિયા 3,000 કરોડનું 526 કિલો ડ્રગ્સ જપ્ત
Arabian Sea Drug Seizure
અરબી સમુદ્રમાં શંકાસ્પદ જહાજ પર સતત નજર રાખ્યા બાદ ભારતીય કોસ્ટ ગાર્ડ અને ગુજરાત ATSએ સંયુક્ત ઓપરેશન હાથ ધરીને જાસૂસી અને દરિયાઈ દેખરેખના આધારે એક જહાજને અટકાવ્યું હતું. આ જહાજની તલાશી લેતાં સુરક્ષા એજન્સીઓના હોશ ઊડી ગયા હતા. જહાજમાંથી આશરે 526 કિલોગ્રામ જેટલો ઉચ્ચ-ગ્રેડ ડ્રગ્સનો મોટો જથ્થો મળી આવ્યો હતો, જેની આંતરરાષ્ટ્રીય બજારમાં અંદાજિત કિંમત ₹3,000 કરોડથી વધુ હોવાનું માનવામાં આવે છે.
લક્ષદ્વીપ નજીક શંકાસ્પદ ઈરાની હોડીમાંથી હેરોઈન અને મેથામ્ફેટામાઈન પકડાયું
ગુપ્ત માહિતીના આધારે ૨૫ સપ્ટેમ્બરના રોજ લક્ષદ્વીપની પશ્ચિમે અરબી સમુદ્રમાં શંકાસ્પદ ઈરાની હોડી (Boat)ને આંતરવામાં આવી હતી. સુરક્ષા દળોના અધિકારીઓએ જહાજ પર ચઢીને તપાસ હાથ ધરતાં તેમાંથી પ્રતિબંધિત માદક દ્રવ્યો હેરોઈન અને મેથામ્ફેટામાઈનનો મોટો જથ્થો મળી આવ્યો હતો. દરિયા અને હવામાંથી સતત વોચ રાખ્યા બાદ હાથ ધરાયેલા આ ઓપરેશનથી દરિયાઈ માર્ગે ચાલતી ડ્રગ્સની ગેરકાયદેસર હેરાફેરી પર મોટો પ્રહાર થયો છે.
#WATCH | The Indian Coast Guard, operating in coordination with the Anti-Terrorism Squad (ATS), Gujarat, successfully thwarted a major maritime narcotics-smuggling attempt in the Arabian Sea, west of Lakshadweep. Acting on actionable intelligence, the Indian Coast Guard assets… pic.twitter.com/bMLZFuZUJN
— ANI (@ANI) September 30, 2026
જહાજ પર સવાર 5 પાકિસ્તાની નાગરિકોની ધરપકડ, મુંબઈ ખાતે સંયુક્ત તપાસ શરૂ
આ હાઈ-પ્રોફાઈલ કાર્યવાહી દરમિયાન શંકાસ્પદ જહાજ પર સવાર તેને ચલાવતા પાંચ પાકિસ્તાની નાગરિકોની ધરપકડ કરવામાં આવી છે. ભારતીય કોસ્ટ ગાર્ડે જપ્ત કરાયેલું જહાજ, ડ્રગ્સનો જથ્થો અને પાકિસ્તાની ક્રૂ મેમ્બર્સને આગળની કાનૂની કાર્યવાહી માટે મુંબઈ ખાતે મોકલી આપ્યા છે. મુંબઈમાં વિવિધ કેન્દ્રીય અને રાજ્ય કક્ષાની સુરક્ષા એજન્સીઓ દ્વારા આ સમગ્ર નેટવર્ક અંગે ઊંડાણપૂર્વક સંયુક્ત તપાસ હાથ ધરવામાં આવશે.
આંતરરાષ્ટ્રીય ડ્રગ્સ સ્મગલિંગ નેટવર્કની કમર તોડી નાખતું ઓપરેશન
ભારતીય કોસ્ટ ગાર્ડના અધિકારીઓના જણાવ્યા અનુસાર, આ સફળતા આંતરરાષ્ટ્રીય ડ્રગ સિન્ડિકેટ સામે કરાયેલી અત્યાર સુધીની સૌથી મોટી સીમાચિહ્નરૂપ કાર્યવાહી છે. શંકાસ્પદ જહાજને ભારતીય દરિયાઈ સીમા અથવા કિનારા સુધી પહોંચે તે પહેલાં જ મધ્ય સમુદ્રમાં આંતરી લેવાતાં ડ્રગ સ્મગલરોનો મોટો મનસૂબો નિષ્ફળ જઈને આંતરરાષ્ટ્રીય સ્મગલિંગ નેટવર્કને ભારે આર્થિક અને વહીવટી ફટકો પડ્યો છે.
દરિયાઈ સુરક્ષા પ્રણાલી મજબૂત, ગેરકાયદે પ્રવૃત્તિઓ સામે 'ઝીરો ટોલરન્સ' નીતિ
આ સફળ ઓપરેશન સાબિત કરે છે કે દેશના દરિયાઈ વિસ્તારો પર સુરક્ષા એજન્સીઓનું નેટવર્ક અને ચોકીયાત દેખરેખ અત્યંત સક્રિય છે. ભારતીય કોસ્ટ ગાર્ડે સ્પષ્ટ કર્યું છે કે દરિયાઈ માર્ગે થતી કોઈપણ પ્રકારની ગેરકાયદેસર પ્રવૃત્તિ, તસ્કરી કે દેશની સુરક્ષા સામેના જોખમ સામે 'ઝીરો ટોલરન્સ' (શૂન્ય-સહિષ્ણુતા) નીતિ હેઠળ આગળ પણ કડકમાં કડક કાર્યવાહી ચાલુ રાખવામાં આવશે.

