ગાંધીનગર કોર્ટે કહ્યું 'દારૂ પીવાના કેસમાં છ મહિનાની જેલ એકદમ લાંબો સમયગાળો છે'

ગાંધીના ગુજરાતમાં દારૂબંધી છે. પ્રોહિબિશન એક્ટર હેઠળ અવાર નવાર દંડ કે સજા ફટકારવામાં આવતી હોય છે. ત્યારે  ગાંધીનગરની સેશન્સ કોર્ટે જણાવ્યું હતું કે દારૂ પીવા માટે છ મહિનાની સખત કેદની સજા ખૂબ જ કઠોર છે અને દારૂ પીવા માટે બે વખત કેસ કરાયેલા વ્યક્તિની જેલની સજા ઘટાડીને 10 અને 15 દિવસ કરી છે.

આ કેસ ગાંધીનગર જિલ્લાના માણસા શહેરના 49 વર્ષીય અમિત મહેતાનો છે. તેની સામે 14 માર્ચ, 2015ના રોજ ગુજરાત પ્રોહિબિશન એક્ટની કલમ 66(1)(b) અને 85(1)(3) અને ગુજરાત પોલીસ એક્ટની જોગવાઈઓ હેઠળ જાહેરમાં ઉપદ્રવ સર્જવા બદલ પ્રથમવાર ગુનો નોંધવામાં આવ્યો હતો. ત્રણ મહિના પછી, તા. 12 જૂન માણસા પોલીસે તેના ઘરે દરોડો પાડ્યો અને દારૂના નશામાં તેની ધરપકડ કરી અને તે જ જોગવાઈઓ હેઠળ તેની સામે ગુનો નોંધ્યો હતો.

માણસાની મેજિસ્ટ્રિયલ કોર્ટે ટ્રાયલ હાથ ધરી હતી અને 7 એપ્રિલ, 2018 ના રોજ મહેતાને કલમ 66(1)(b) હેઠળ બન્ને કેસમાં દારૂ પીવા માટે દોષિત ઠેરવ્યો હતો. ટ્રાયલ કોર્ટે તેને અન્ય આરોપોમાંથી મુક્ત કર્યો હતો. બંને કેસમાં તેને છ મહિનાની જેલ અને 1000 રૂપિયાનો દંડ ફટકારવામાં આવ્યો હતો. કાયદામાં પહેલીવાર નશામાં પકડાય તો વધુમાં વધુ છ મહિનાની જેલ અને રૂ. 1,000ના દંડની જોગવાઈ છે અને બીજીવાર ગુનામાં બે વર્ષની જેલ અને રૂ. 2,000 સુધીનો દંડ થઈ શકે છે.

મહેતાએ સેશન્સ કોર્ટમાં પોતાની સજાને પડકારી હતી અને નિર્દોષ હોવાનો દાવો કર્યો હતો. સેશન્સ કોર્ટે બંને કિસ્સાઓમાં પ્રતિબંધ કાયદાના ભંગ બદલ મહેતાને દોષિત ઠેરવવાના ટ્રાયલ કોર્ટના નિર્ણયને સમર્થન આપ્યું હતું. જ્યારે તે સજાની માત્રાની વાત આવે છે, ત્યારે અદાલતને લાગ્યું કે છ મહિનાની જેલ “એકદમ લાંબો સમયગાળો છે અને આરોપીને ન્યાયી અને વાજબી સમય માટે સળિયાની પાછળ રાખવાની જરૂર છે”