ગોધરા રેલવે સ્ટેશન પર ટ્રેન રોકીને કરાવી બે બાળકોની ડિલીવરી આરપીએફએ કરી મદદ

વેસ્ટર્ન રેલ્વેની આરપીએફ ટ્રેનોમાં મુસાફરી કરતા મુસાફરોની મદદ કરવા અને ખાસ કરીને સંભાળ અને સુરક્ષાની જરૂરિયાતવાળા મહિલાઓ અને બાળકોને મદદ કરવામાં મહત્વપૂર્ણ ભૂમિકા ભજવે છે. એક અનોખા કિસ્સામાં, 29 ઓક્ટોબર, 2022 ના રોજ, પશ્ચિમ રેલવેના RPF કર્મચારીઓએ બે અલગ-અલગ ટ્રેનોમાં બે મહિલાઓને તેમના બાળકોને જન્મ આપવામાં મદદ કરી અને પ્રશંસનીય કાર્ય કર્યું છે.

પશ્ચિમ રેલવેના સીપીઆરઓ સુમિત ઠાકુરે જાહેર કરેલી પ્રેસનોટ મુજબ, મૈસુર-અજમેર એક્સપ્રેસમાં સવાર એએસઆઈ સંદીપ રેપે, એચસી રવિકિરણ શર્મા, સીટી જયનારાયણ મીના અને સીટી નટવર ભાઈ સહિત નડિયાદથી ટ્રેન એસ્કોર્ટિંગ ટીમને સવારે 5.20 વાગ્યાની આસપાસ માહિતી મળી હતી. એક મુસાફર મોહન લાલ પાસેથી જાણવા મળ્યું કે તેની સાથે મુસાફરી કરી રહેલી તેની પત્નીને અચાનક પ્રસૂતિની પીડા થવા લાગી. તે જ કોચમાં એક વૃદ્ધ મુસાફરની મદદથી વટવા અને અમદાવાદ સ્ટેશન વચ્ચે જતી ટ્રેનમાં આ મહિલા મુસાફરે બાળકીને જન્મ આપ્યો હતો.

ટ્રેનની એસ્કોર્ટિંગ પાર્ટીએ અમદાવાદના સિક્યુરિટી કંટ્રોલ રૂમને જાણ કરી અમદાવાદ સ્ટેશન પર મહિલા આરપીએફ જવાનો અને એમ્બ્યુલન્સને વધુ સારવાર માટે એલર્ટ કરી. સ્ટેશન પર પહોંચ્યા પછી, માતા અને બાળકને કોચની અંદર એક રેલવે ડૉક્ટરે તપાસ કરી અને વધુ સારવાર માટે તેમના પતિ સાથે હોસ્પિટલમાં મોકલ્યા. તેમણે વધુમાં જણાવ્યું હતું કે, "બીજા કિસ્સામાં, 29 ઓક્ટોબરના રોજ મથુરાથી વડોદરા, હઝરત નિઝામુદ્દીન-તિરુવનંતપુરમ સેન્ટ્રલ એક્સપ્રેસમાં મુસાફરી કરી રહેલી 29 વર્ષીય મહિલા મુસાફરને ચાલતી ટ્રેનમાં અચાનક પ્રસૂતિની પીડા થઈ હતી."

માહિતી મળતાં ગોધરા સ્ટેશન પર ટ્રેનનું કોઈ નિર્ધારિત સ્ટોપેજ ન હોવા છતાં ઓપરેશન કંટ્રોલ અને આઈપીએફ ગોધરાને જાણ કરતાં તેને અટકાવવામાં આવી હતી. સ્ટેશન પર પહોંચ્યા બાદ મહિલા મુસાફરે બાળકને જન્મ આપતા તેને વધુ સારવાર માટે ગોધરા સિવિલ હોસ્પિટલમાં મોકલવામાં આવી હતી. પ્રેસ નોટમાં જણાવવામાં આવ્યું છે કે મહિલાના પતિને જાણ કરવામાં આવી હતી, જેમણે પાછળથી તેમની મદદ અને સંભાળ માટે આરપીએફનો આભાર માન્યો હતો.