Mayank Agarwal Health Update : પાણી સમજી એસિડ પી ગયો ભારતીય ક્રિકેટર?

Mayank Agarwal Health Update: ભારતીય ક્રિકેટર મયંક અગ્રવાલ (Mayank Agarwal)  સાથે એક મોટી ઘટના બની છે. અગરતલાથી પરત ફરતી ફ્લાઈટમાં ચડતી વખતે તેને ઘણી વાર ઉલ્ટી થઈ હતી. તે અત્યારે બરાબર બોલી પણ શકતો નથી. તેના ચહેરા પર સોજો છે.  ઉલ્લેખનીય છે કે કર્ણાટક ટીમના કેપ્ટન મયંક અગ્રવાલની તબિયત બગડતાં અગરતલાની હોસ્પિટલમાં દાખલ થવું પડ્યું હતું. તે રણજી મેચ રમીને અગરતલાથી પરત ફરી રહ્યો હતો પરંતુ ફ્લાઈટમાં બેસતાની સાથે જ તેને અસ્વસ્થતા અનુભવવા લાગી. બાદમાં જાણવા મળ્યું કે તેણે પાણી સમજીને એસિડ જેવો પદાર્થ પીધો હતો.

પાણી સમજી એસિડ પીધો

કર્ણાટકના અનુભવી ઓપનર અને કેપ્ટન મયંક અગ્રવાલ સોમવારે રણજી ટ્રોફી મેચ રમીને અગરતલાથી પરત ફરી રહ્યા હતા ત્યારે એરપોર્ટ પર ફ્લાઈટમાં ચઢતાની સાથે જ તેમની તબિયત બગડી હતી. તેને મોં અને ગળામાં તકલીફ થવા લાગી. તેને તાત્કાલિક અગરતલાની હોસ્પિટલમાં દાખલ કરવામાં આવ્યો હતો. મયંકને હાલ કોઈ ખતરો નથી અને તેની હાલત સારી છે. હવે એવી માહિતી મળી છે કે મયંકે બોટલમાંથી એસિડ જેવો પદાર્થ પાણી સમજીને પીધો હતો.

ફ્લાઇટમાં થઈ હતી ઉલ્ટી .

ઈન્ડિગો દ્વારા જારી કરવામાં આવેલા એક નિવેદનમાં કહેવામાં આવ્યું છે કે, 'અગરતલાથી દિલ્હી જઈ રહેલી ઈન્ડિગોની ફ્લાઈટ નંબર 6E 5177ને એરક્રાફ્ટમાં ઈમરજન્સી મેડિકલ સિચ્યુએશનના કારણે તેના મૂળ સ્થાને પરત ફરવું પડ્યું હતું. મુસાફરને બહાર કાઢીને વધુ તબીબી સહાય માટે હોસ્પિટલમાં લઈ જવામાં આવ્યો હતો. પ્લેન 4.20 વાગ્યે તેના ગંતવ્ય માટે ફરીથી ઉપડ્યું.' 

અધિકારીએ આપ્યું અપડેટ

 ત્રિપુરા ક્રિકેટ એસોસિએશનના કાર્યકારી સચિવ વાસુદેવ ચક્રવર્તીએ મયંક અંગે અપડેટ આપી છે. તેણે કહ્યું, 'મને ફોન આવ્યો કે મયંક અગ્રવાલને ઈમરજન્સીમાં દાખલ કરવામાં આવ્યો છે. મયંકે તેને પાણી સમજીને બોટલમાંથી કંઈક પીધું, ત્યારબાદ તેને સોજો આવ્યો. તે એસિડ જેવું હતું. હોસ્પિટલ પહોંચ્યા ત્યારે અમે જોયું કે તેનો ચહેરો સૂજી ગયો હતો અને તે બોલી શકતો ન હતો.

પોલીસ તપાસ શરૂ 

સૂત્રો તરફથી મળતી માહિતી મુજબ મયંકે બપોરે 2:30 વાગ્યે અગરતલાથી ફ્લાઈટ પકડવાની હતી. તે ફ્લાઈટમાં પણ ચઢ્યો હતો, તે દરમિયાન તેને ગળામાં થોડી સમસ્યા થવા લાગી. આ પછી મયંકને ફ્લાઈટમાંથી ઉતારીને હોસ્પિટલના ઈમરજન્સી વિભાગમાં લઈ જવામાં આવ્યો હતો. તેમને આઈસીયુમાં દાખલ કરવામાં આવ્યા હતા. હાલ તેની સારવાર ચાલી રહી છે. પોલીસ આ ઘટનાની પણ તપાસ કરી રહી છે. મયંકે હાલમાં જ અગરતલામાં ત્રિપુરા વિરૂદ્ધ મેચ રમી હતી, જે 26 જાન્યુઆરીથી શરૂ થઈ હતી. આ મેચમાં મયંકે 51 અને 17 રનની ઇનિંગ રમી હતી. તેમની ટીમ કર્ણાટક 29 રને મેચ જીતી હતી.

Edited by - kalyani deshmukh