ગાઝિયાબાદમાં જ્યુસ વેચનારની ધરપકડ, ફળોના રસમાં ભેળવતો હતો માનવ પેશાબ
ગાઝિયાબાદ જિલ્લાના લોની બોર્ડર વિસ્તારમાં પોલીસે ફળોના રસમાં માનવ પેશાબ ભેળવવાના આરોપમાં 29 વર્ષીય જ્યુસ વિક્રેતાની ધરપકડ કરી છે જ્યારે કે તેના સગીર (15) સહયોગીની અટકાયત કરી છે. પોલીસે શુક્રવારે આ જાણકારી આપી. અંકુર વિહાર વિસ્તારના આસિસ્ટન્ટ પોલીસ કમિશનર (એસીપી) ભાસ્કર વર્માએ જણાવ્યું કે લોકોની ફરિયાદના આધારે આ ધરપકડ કરવામાં આવી છે. તેમના જણાવ્યા મુજબ, લોકોએ ફરિયાદ કરી હતી કે આ જ્યુસ વિક્રેતા માનવ પેશાબમાં ભેળવીને ગ્રાહકોને ફળોનો રસ પીરસે છે. તેણે જણાવ્યું કે જ્યુસ વેચનારની ઓળખ આમિર (29) તરીકે થઈ છે.
પોલીસે જ્યુસના સ્ટોલમાંથી પેશાબથી ભરેલો કેન કબજે કર્યો હતો.
વર્માએ કહ્યું કે માહિતી મળ્યા બાદ પોલીસ ત્યાં પહોંચી અને તેના જ્યુસની લારીની ચકાસણી કરી અને તેમાં પેશાબથી ભરેલું પ્લાસ્ટિકનું કેન મળ્યું. તેના કહેવા મુજબ પોલીસે આ અંગે આમિરની પૂછપરછ કરી હતી પરંતુ તે કોઈ સંતોષકારક જવાબ આપી શક્યો નહોતો. આસિસ્ટન્ટ પોલીસ કમિશનરે જણાવ્યું કે પોલીસે તેની ધરપકડ કરી અને તેના કિશોર સાથીની અટકાયત કરી. તેમણે કહ્યું કે આ મામલે કાયદેસરની કાર્યવાહી ચાલી રહી છે. છેલ્લા કેટલાક દિવસોમાં આ પ્રકારનો વીડિયો ઘણો જોવા મળી રહ્યો છે. જ્યાં ખાણીપીણીની ચીજવસ્તુઓ સાથે વિક્રેતાઓ વિચિત્ર વર્તન કરી રહ્યા છે. આવો જ એક વીડિયો દિલ્હી-દહેરાદૂન હાઈવે પર છુતમલપુરમાં જોવા મળ્યો હતો, જ્યાં દસ્તરખાન નામના મુસ્લિમ ઢાબા પર તંદૂરમાં પકવતા પહેલા રોટલી પર થૂંકવામાં આવી હતી.
અગાઉ પણ આવી ઘટનાઓ બની છે
આ વીડિયો વાયરલ થયા બાદ ચૂતમલપુરની રહેવાસી સોના પંડિતે ફતેહપુર પોલીસ સ્ટેશનમાં ફરિયાદ નોંધાવી હતી. આ પછી પોલીસે રોટલી બનાવનાર વ્યક્તિ વિરુદ્ધ કેસ નોંધીને તેની ધરપકડ કરી હતી. તેની ધરપકડ બાદ યુવકે કબૂલ્યું હતું કે તે રોટલી બનાવતી વખતે તેના પર થૂંકતો હતો. પોલીસ અને ફૂડ વિભાગે કાર્યવાહી કરીને ઢાબાને સીલ કરી દીધા હતા. પોલીસનું કહેવું છે કે આરોપી સગીર છે. આ મામલામાં એસપી સિટી અભિમન્યુ માંગલિકે જણાવ્યું કે, ઘટનાનો વીડિયો સોશિયલ મીડિયા પર વાયરલ થયા બાદ સ્થાનિક પોલીસે કાર્યવાહી કરી અને આરોપી યુવકની ધરપકડ કરી. આરોપીની ઉંમર 15 વર્ષ હોવાનું કહેવાય છે.
