ગુરુવાર, 28 માર્ચ 2024
  1. સમાચાર જગત
  2. ગુજરાત વિધાનસભા ચૂંટણી 2022
  3. ગુજરાત ચૂંટણી સમાચાર
Written By
Last Modified: બુધવાર, 7 સપ્ટેમ્બર 2022 (11:21 IST)

Gujarat Assembly Election 2022- ગુજરાતમાં નવા ચહેરાઓની પસંદગી કરશે કોંગ્રેસ, યુવાનો અને મહિલાઓને આપશે પ્રાથમિકતા

Gujarat Assembly Election 2022: આ વર્ષના અંતમાં યોજાનારી ગુજરાત વિધાનસભાની ચૂંટણી માટે કોંગ્રેસ ટિકિટ વિતરણમાં યુવાનો અને મહિલાઓને પ્રાધાન્ય આપશે. પાર્ટીની રાજ્ય એકમ સ્ક્રીનિંગ કમિટીના અધ્યક્ષ રમેશ ચેન્નીથલાએ આ માહિતી આપી. તેમણે કહ્યું કે કોંગ્રેસ રાજ્યની ચૂંટણીમાં "નવા ચહેરા" ને પણ તક આપશે. ઓલ ઈન્ડિયા કોંગ્રેસ કમિટીએ ગયા મહિને આ વર્ષે ડિસેમ્બરમાં યોજાનારી ગુજરાત વિધાનસભાની ચૂંટણી માટે પાર્ટીના ઉમેદવારોને ''છટણી" કરવા માટે ત્રણ સભ્યોની સ્ક્રીનિંગ કમિટીની રચના કરી હતી. ચેન્નીથલાને સમિતિના અધ્યક્ષ તરીકે નિયુક્ત કરવામાં આવ્યા હતા. મહારાષ્ટ્ર કોંગ્રેસના નેતા શિવાજીરાવ મોઘે અને દિલ્હીના ભૂતપૂર્વ ધારાસભ્ય જય કિશન તેના સભ્યો છે.
 
ગુજરાત કોંગ્રેસના પ્રભારી રઘુ શર્મા, પ્રદેશ પક્ષ પ્રમુખ જગદીશ ઠાકોર અને વિરોધ પક્ષના નેતા સુખરામ રાઠવા સ્ક્રીનીંગ કમિટીના હોદ્દેદારો છે. રાહુલ ગાંધીએ સોમવારે અમદાવાદમાં બૂથ લેવલના કાર્યકરોને સંબોધિત કર્યા હતા, ત્યારબાદ સાંજે સ્ક્રીનિંગ કમિટીના સભ્યોએ કોંગ્રેસની રાજ્ય ચૂંટણી સમિતિ સાથે સંયુક્ત બેઠક યોજી હતી, જેમાં શર્મા અને ઠાકોર સહિત 39 સભ્યોએ ભાગ લીધો હતો. ચેન્નીથલાએ મંગળવારે સ્ક્રીનીંગ કમિટીની બીજી બેઠક પહેલા પત્રકારોને કહ્યું, “આ વખતે અમે ટિકિટ વિતરણમાં નવા ચહેરા, યુવાનો અને મહિલાઓને પ્રાથમિકતા આપીશું. આ વખતે ગુજરાત વિધાનસભાની ચૂંટણી માટે અમારા ઉમેદવારોની યાદી પ્રભાવશાળી રહેશે.
 
ગુજરાત કોંગ્રેસના પ્રવક્તા મનીષ દોશીએ જણાવ્યું હતું કે, "સંયુક્ત બેઠકમાં એકબીજાનો પરિચય કરાવવાનો હતો અને ઉમેદવારોના નામને આખરી ઓપ આપવા માટે લાગુ કરવાના વિવિધ માપદંડો અંગે ચર્ચા કરવામાં આવી હતી." તેમણે કહ્યું કે સ્ક્રીનીંગ કમિટી મંગળવારે ઉમેદવારોના નામ ફાઇનલ કરતા પહેલા જમીની સ્થિતિને સમજવા માટે દરેક વિધાનસભા સીટના વરિષ્ઠ નેતાઓ અને પાર્ટીના પ્રભારીઓને મળશે. કોંગ્રેસ સપ્ટેમ્બરના અંત સુધીમાં 182 સભ્યોની ગુજરાત વિધાનસભા માટે ઉમેદવારોની પ્રથમ યાદી જાહેર કરે તેવી શક્યતા છે. આમ આદમી પાર્ટી (AAP) 19 ઉમેદવારોના નામની જાહેરાત કરી ચૂકી છે. સત્તાધારી ભાજપે કોઈ ઉમેદવારનું નામ જાહેર કર્યું નથી.