ગુજરાતને મળી શકે છે મેગા ટૅક્સટાઇલ પાર્ક
ટાઇમ્સ ઑફ ઇન્ડિયાના એક અહેવાલ પ્રમાણે ટૅક્સટાઇલનાં કેન્દ્રીય રાજ્યમંત્રી દર્શના જરદોશે શનિવારે આ મામલે સ્પષ્ટતા કરતાં કહ્યું હતું કે ગુજરાત સહિત 13 રાજ્યોમાંથી મેગા ટૅક્સટાઇલ પાર્ક માટે અરજી મળી છે. આ અંગે ફાળવણી મામલે ટૂંક સમયમાં જ નિર્ણય લેવાશે.
અરજી કરનાર તમામ રાજ્યો પૈકી ગુજરાત આગામી મેગા ટૅક્સટાઇલ પાર્ક ફાળવણી મામલે કેટલાંક આગળ પડતાં રાજ્યો પૈકી એક છે.
દર્શના જરદોશે આ વિશે વાત કરતાં કહ્યું હતું કે, "કેન્દ્ર સરકારે તાજેતરમાં જ સમગ્ર દેશમાં સાત મેગા ટૅક્સટાઇલ પાર્ક ફાળવવાના કામને મંજૂરી આપી છે. ગુજરાતે પણ નવસારી ખાતે પાર્કની સ્થાપના માટે અરજી કરી છે."
તેમણે કહ્યું હતું કે, "તમામ અરજીઓને વિભિન્ન ધોરણો અંતર્ગત ચકાસવામાં આવશે. આગામી બે મહિનામાં આ અંગે નિર્ણય લેવાય તેવી આશા છે."
