ગુજરાતમાં સિઝનનો 68% વરસાદ છતાંય જળાશયોમાં હજુ સરેરાશ 55% ઘટ

ચોમાસાની વર્તમાન સિઝનમાં ૨૨.૩૪ ઈંચ સાથે મોસમનો ૬૮.૨૯% વરસાદ નોંધાયો છે. જેની સામે જળાશયોમાં હજુ સુધી સરેરાશ ૪૪.૧૯% જળસ્તર છે. ગુજરાતમાં કુલ ૨૦૩ સ્કિમમાંથી ૧૫ જળાશયો ૧૦૦% ભરાયા છે જ્યારે ૯ સંપૂર્ણ ખાલીખમ છે. રાજ્યની જીવાદોરી સમાન સરદાર સરોવર નર્મદા ડેમમાં જળસ્તર ૪૮.૧૮% છે.  આ અંગે પ્રાપ્ત માહિતી અનુસાર ૨૩ ઓગસ્ટ સુધી સૌરાષ્ટ્રના સૌથી વધુ ૮, દક્ષિણ ગુજરાતના ૫ અને મધ્ય ગુજરાતના ૨ જળાશયો સંપૂર્ણ ભરાયા છે. કચ્છમાં હજુ સુધી ૧૬.૪૧ ઈંચ સાથે મોસમનો ૨૩.૮૯% વરસાદ પડયો છે. કચ્છના ૨૦ જળાશયોમાં માત્ર ૧૨.૨૨% જથ્થો છે. આમ, કચ્છમાં સાધારણ વરસાદને લીધે સ્થિતિ સૌથી ચિંતાજનક છે. બીજી તરફ ઉત્તર ગુજરાતમાં ૧૦.૬૨ ઈંચ સાથે મોસમનો ૩૭.૩૪% વરસાદ પડયો છે.
જેની સામે ઉત્તર ગુજરાતની ૧૫ સ્કિમમાંથી ૩૨.૯૬% જથ્થો  છે. માત્ર મધ્ય ગુજરાતમાં સ્થિતિ મહદ્અંશે સારી છે. મધ્ય ગુજરાતમાં ૧૯.૯૬ ઈંચ સાથે મોસમનો ૬૧.૩૫% વરસાદ પડયો. જેની સામે તેના ૧૭ જળાશયમાંથી ૨ સંપૂર્ણ ભરાયા છે અને તેમાં કુલ ૬૯.૫૨% જથ્થો છે. સૌરાષ્ટ્રની ૧૩૮ સ્કિમમાંથી ૮ સંપૂર્ણ ભરાયા છે અને તેમાં ૪૪.૪૯% જળનો જથ્થો છે.  કુલ ૨૫ જળાશયમાં ૯૦%થી વધારે જળનો જથ્થો હોવાથી તેમાં હાઇ એલર્ટ, ૧૨ જળાશયમાં ૮૦%થી ૯૦% જળનો જથ્થો હોવાથી એલર્ટ, ૮ જળાશયોમાં ૭૦%થી ૮૦% જથ્થો હોવાથી તેમાં વોર્નિંગ જાહેર કરાઇ છે. હવામાન વિભાગની આગાહી અનુસાર ગુજરાતમાં આગામી એક સપ્તાહ હળવાથી મધ્યમ વરસાદની સંભાવના છે. આ સ્થિતિમાં ગુજરાતના જળાશયોની સ્થિતિમાં વધુ સુધારો જોવા મળી શકે છે તેમ મનાય છે.