વર્લ્ડ કપ ટ્રોફી જીતતા જ ટીમ ઈન્ડિયા પર થયો પૈસાનો વરસાદ, ઈનામી રકમ તરીકે મળ્યા આટલા કરોડ રૂપિયા
ભારતીય મહિલા ક્રિકેટ ટીમે ફાઇનલ મેચમાં દક્ષિણ આફ્રિકાને 52 રનથી હરાવીને પ્રથમ વખત ICC ODI વર્લ્ડ કપ 2025 ટ્રોફી જીતી છે. નવી મુંબઈમાં DY પાટિલ સ્પોર્ટ્સ એકેડેમી ખાતે રમાયેલી આ ટાઇટલ મેચમાં, ટીમ ઇન્ડિયાએ પ્રથમ બેટિંગ કરીને 50 ઓવરમાં 298 રન બનાવ્યા હતા, ત્યારબાદ દક્ષિણ આફ્રિકા ફાઇનલ મેચમાં 246 રન પર સિમિત રહ્યું હતું. આ સાથે, ટીમ ઇન્ડિયાએ ઇનામી રકમ તરીકે મોટી રકમ પણ જીતી છે, જેમાં તેમને ICC તરફથી વિજેતા તરીકે કુલ 41.77 કરોડ રૂપિયા મળ્યા છે. જ્યારે દક્ષિણ આફ્રિકાની ટીમને રનર-અપ તરીકે કુલ 21.88 કરોડ રૂપિયા મળ્યા છે.
ફાઇનલમાં શેફાલી અને દીપ્તિ શર્માએ બેટ અને બોલ બંનેથી કર્યું શાનદાર પ્રદર્શન
શેફાલી વર્મા અને દીપ્તિ શર્માએ બેટ અને બોલ બંનેથી શાનદાર પ્રદર્શન કરીને ભારતને દક્ષિણ આફ્રિકા સામે ફાઇનલ જીતવામાં મદદ કરી. શેફાલી વર્માએ બેટથી 87 રન બનાવ્યા, જ્યારે તેણીએ સાત ઓવરમાં 36 રન આપીને બે વિકેટ પણ લીધી. ટુર્નામેન્ટમાં ઓલરાઉન્ડ પ્રદર્શન કરનાર દીપ્તિ શર્માએ ફાઇનલ મેચમાં પણ આ પ્રદર્શન ચાલુ રાખ્યું. દીપ્તિએ બેટથી 58 રનની શાનદાર ઇનિંગ રમી, જ્યારે તેણીએ 9.3 ઓવરમાં માત્ર 39 રન આપીને પાંચ વિકેટ પણ લીધી.
દીપ્તિ શર્મા આ સિદ્ધિ મેળવનારી પ્રથમ મહિલા ખેલાડી બની.
જ્યારે ટીમ ઇન્ડિયાની સ્ટાર ઓલરાઉન્ડર, દીપ્તિ શર્માએ દક્ષિણ આફ્રિકા સામે ODI વર્લ્ડ કપ ફાઇનલમાં પાંચ વિકેટ લીધી, ત્યારે તે મહિલા ODI વર્લ્ડ કપના ઇતિહાસમાં એક જ મેચમાં પચાસથી વધુનો સ્કોર અને પાંચ વિકેટ લેનારી પ્રથમ ખેલાડી બની. દીપ્તિ શર્માએ આ વર્લ્ડ કપમાં કુલ 22 વિકેટ લીધી.
