ગુજરાત સરકારે 8 IPS અધિકારીઓને સોંપી સરહદની જવાબદારી: વાવ, પાટણ અને કચ્છ સરહદે બે દિવસીય સઘન સુરક્ષા કવાયત

Written By: વેબદુનિયા ન્યુઝ ટીમ

Updated: Mon, 8 Jun 2026 (13:20 IST)

gujarat pakistan boarder

ગુજરાત સરકાર દ્વારા રાજ્યની સરહદોને વધુ સુરક્ષિત કરવા માટે એક વિશેષ અને પ્રશંસનીય ઝુંબેશ શરૂ કરવામાં આવી છે. આ અંતર્ગત, આગામી 11  અને 12  જૂનના રોજ ભારતીય પોલીસ સેવા (IPS) ના આઠ વરિષ્ઠ અધિકારીઓ પાકિસ્તાન સરહદ નજીક આવેલા 16 ગામોની મુલાકાત લેશે. આ અભિયાનનો મુખ્ય હેતુ ભારત-પાકિસ્તાન આંતરરાષ્ટ્રીય સરહદ પર સુરક્ષા વ્યવસ્થાઓનું જમીની મૂલ્યાંકન કરવાનો અને છેવાડાના વિસ્તારોમાં તૈનાત પોલીસ કર્મચારીઓનું મનોબળ વધારવાનો છે.

સામાન્ય નાગરિકોના ઘરમાં રાત્રિ રોકાણ અને સંવાદ

આ સમગ્ર કાર્યક્રમ ગુજરાતના ગૃહ રાજ્યમંત્રી હર્ષ સંઘવીના સીધા માર્ગદર્શન હેઠળ યોજાઈ રહ્યો છે. આ મુલાકાત માત્ર એક ઔપચારિક સરકારી પ્રવાસ બનીને ન રહે તે માટે તમામ અધિકારીઓ સોંપાયેલા સરહદી ગામોમાં સ્થાનિક લોકોના ઘરોમાં જ રાત વિતાવશે. રાત્રિ રોકાણ દરમિયાન અધિકારીઓ ગ્રામજનો સાથે સીધો સંવાદ કરશે, તેમની મુશ્કેલીઓ અને ચિંતાઓને સમજશે તેમજ સ્થાનિક સ્તરે સુરક્ષા વ્યવસ્થાને મજબૂત કરવા માટે બેઠકોનું આયોજન કરશે.

વાવ-થરાદ, પાટણ અને કચ્છ સરહદના ગામો આવરી લેવાશે

બે દિવસીય ચાલનારી આ સઘન ગ્રાઉન્ડ કવાયત મુખ્યત્વે બનાસકાંઠાના વાવ-થરાદ સરહદી વિસ્તારો, પાટણ જિલ્લો અને કચ્છ પૂર્વ-પશ્ચિમ જિલ્લાના અત્યંત સંવેદનશીલ ભાગોને આવરી લેશે. આ અંતર્ગત સરહદી પેટ્રોલિંગ કામગીરીનું કડક નિરીક્ષણ કરવામાં આવશે. આ ઉપરાંત, રાત્રિ સમીક્ષા બેઠકો યોજીને પ્રદેશના વર્તમાન સુરક્ષા માળખાની સમીક્ષા કરવામાં આવશે, જેથી કોઈપણ પ્રકારની રાષ્ટ્રવિરોધી પ્રવૃત્તિઓ સામે કડક નજર રાખી શકાય.

જાણો કયા વરિષ્ઠ અધિકારીઓને કયા ગામોની સોંપાઈ જવાબદારી

આ ખાસ ફરજ માટે નિયુક્ત થયેલા અધિકારીઓમાં એડીજીપી વાબાંગ જામીર (અસારગામ અને રાચેના) અને એડીજીપી અજય કુમાર ચૌધરી (શિરાણી વાંધ અને જટવાડા) નો સમાવેશ થાય છે. આ સિવાય આઈજીપી બિપિન શંકરરાવ આહિરે ધોકવાડા-ચારણકા, ડીઆઈજીપી એ.એમ. મુનિયા રાડોસણ-ગોલાપ, ડીઆઈજીપી કે.એન. ડામોર જુના-દેઢિયા, ડીઆઈજીપી ડો. લીના પાટિલ ઉધમ-પટાગર, એસીપી આર.ટી. સુસારા પુનરાજપર-ગુનૌ તેમજ ડીજીપી સુધા એસ. પાંડે દિનારા અને ભીતારા મોટા ગામમાં રાત્રિ રોકાણ કરી કાયદો અને વ્યવસ્થાની સમીક્ષા કરશે.