પ્રધાનમંત્રી મોદી 10 જૂનના રોજ ગુજરાતના નવસારીમાં આદિવાસીઓના સંમેલનને કરશે સંબોધિત
વડાપ્રધાન નરેન્દ્ર મોદી 10 જૂને ગુજરાતના નવસારી જિલ્લાના ખુડવેલ ગામમાં આદિવાસીઓના સંમેલનને સંબોધિત કરશે. અધિકારીઓએ બુધવારે આ માહિતી આપી હતી. ચીખલી તાલુકાના ગામમાં ''આદિવાસી ગૌરવ સંમેલન''માં નવસારી તાપી, ડાંગ અને વલસાડ જિલ્લાઓ સહિત દક્ષિણ ગુજરાતના ત્રણ લાખ જેટલા આદિવાસીઓ ભાગ લે તેવી અપેક્ષા છે.
સ્થાનિક વહીવટીતંત્રે જણાવ્યું હતું કે ગુજરાતના મુખ્યમંત્રી ભૂપેન્દ્ર પટેલ પણ આ બેઠકમાં હાજરી આપશે. રાજ્યના મુખ્ય સચિવ પંકજ કુમારે મંગળવારે સ્થળની મુલાકાત લીધી હતી અને તૈયારીઓની સમીક્ષા કરી હતી અને અધિકારીઓને જરૂરી સૂચનાઓ આપી હતી.
ઉલ્લેખનીય છે કે થોડા મહિનાઓ પહેલા સ્થાનિક ધારાસભ્ય અનંત પટેલની આગેવાની હેઠળ આ વિસ્તારના આદિવાસીઓએ વિસ્થાપનના ભયથી પ્રસ્તાવિત પાર-તાપી-નર્મદા નદી-લિંક પ્રોજેક્ટ સામે ભારે વિરોધ શરૂ કર્યો હતો.
ગુજરાતના મુખ્યમંત્રીએ ગયા મહિને જાહેરાત કરી હતી કે આ પ્રોજેક્ટને રદ કરવામાં આવ્યો છે. જો કે, ગુજરાત આદિવાસી કોંગ્રેસના પ્રમુખ અનંત પટેલ હજુ પણ પ્રોજેક્ટને રદ કરવા માટે "શ્વેત પત્ર"ની માંગ કરી રહ્યા છે.
