દુબઈથી પતિ-પત્ની ચોરી છુપેથી લઈ આવ્યા હતા 28 કિલો સોનાની પેસ્ટ, ચાલ બગડતા પકડાયા
Gold Smuggling: સુરત એરપોર્ટ પર એક દંપતી સોનાની દાણચોરી કરતા ઝડપાયું છે. તેમના પર સોનાની પેસ્ટને કપડાં નીચે છુપાવીને ભારતમાં દાણચોરી કરવાનો પ્રયાસ કરવાનો આરોપ છે. જ્યારે અધિકારીઓને તેમનું વર્તન વિચિત્ર લાગ્યું, ત્યારે શંકાના આધારે તેમની તલાશી લેવામાં આવી અને મોટી માત્રામાં સોનું મળી આવ્યું.
શું છે આખો મામલો?
આ ઘટના 20 જુલાઈની રાત્રે બની હતી, જ્યારે આ દંપતી દુબઈથી ભારત પરત ફરી રહ્યું હતું. બંને એર ઈન્ડિયાની ફ્લાઇટ દ્વારા સુરત એરપોર્ટ પર ઉતર્યા હતા અને ગુજરાતના રહેવાસી હોવાનું કહેવાય છે. જ્યારે CISF ઇન્ટેલિજન્સ વિંગના અધિકારીએ તેમને એરપોર્ટ પર પકડ્યા, ત્યારે CISFના એક વરિષ્ઠ અધિકારીએ પીટીઆઈને જણાવ્યું, "તેમની ચાલ સામાન્ય લાગતી ન હતી અને પેટની આસપાસ થોડો ફુલાવો દેખાતો હતો, જે શરીરની રચના સાથે મેળ ખાતો ન હતો."
28 કિલો સોનાની પેસ્ટ, 20 કિલો શુદ્ધ સોનું
તલાશી દરમિયાન, તેમના શરીરની આસપાસ અને બંનેના ઉપરના ભાગમાં (ધડ) કુલ 28 કિલો સોનાની પેસ્ટ મળી આવી હતી. મહિલા પાસેથી 16 કિલો સોનાની પેસ્ટ અને પુરુષ પાસેથી 12 કિલો સોનાની પેસ્ટ મળી આવી હતી. અધિકારીઓના જણાવ્યા અનુસાર, આ પેસ્ટમાંથી 20 કિલોથી વધુ શુદ્ધ સોનું કાઢી શકાય છે.
બંને મુસાફર (પતિ અને પત્ની) સુરેશભાઈ અને ડોલીબેનની તપાસ અને વ્યક્તિગત શોધખોળ દરમિયાન, કુલ 28.100 કિલો સોનું પેસ્ટ સ્વરૂપમાં મળી આવ્યું હતું, જે જીન્સ/પેન્ટ, આંતરિક વસ્ત્રો, હેન્ડબેગ અને ફૂટવેરમાં કુશળતાપૂર્વક છુપાવવામાં આવ્યું હતું. આ કાર્યવાહીમાં સ્થાનિક બજારમાં આશરે 25.57 કરોડની કિંમતનું 24.827 કિલોગ્રામ સોનું મળી આવ્યું હતું. બંને વ્યક્તિઓની કસ્ટમ્સ એક્ટ, 1962ની સંબંધિત જોગવાઈઓ હેઠળ ધરપકડ કરવામાં આવી છે અને કોર્ટમાં રજૂ કરવામાં આવ્યા છે. આ કેસમાં શોધાયેલી મોડસ ઓપરેન્ડી સોનાની દાણચોરી કરવા માટે એડવાન્સ્ડ બોડી કન્સીલમેન્ટ ટેકનીકોનો ઉપયોગ કરવા તરફ નિર્દેશ કરે છે. હજુ વધુ તપાસ ચાલુ છે.
સુરત એરપોર્ટ પર અત્યાર સુધીની સૌથી મોટી સોનાની જપ્તી?
CISF અધિકારીએ એલર્ટ જારી કરતાની સાથે જ કસ્ટમ વિભાગે તાત્કાલિક કાર્યવાહી કરી અને બંનેને પકડી લીધા. તે સમયે પુરુષે શર્ટ-પેન્ટ પહેર્યું હતું અને મહિલાએ સલવાર-સૂટ પહેર્યો હતો. એક તપાસ અધિકારીએ જણાવ્યું હતું કે, "સુરત એરપોર્ટના ઇતિહાસમાં આ સૌથી મોટી સોનાની જપ્તી હોઈ શકે છે."
